غزل

الیشع ایاز

ماں بولی وچ لکھناں سننا چاہنا واں
کناں دا منہہ مٹھا کرنا چاہنا واں
باقی دیوے دھوواں کر کے اکو دیوا
واء دے ہتھاں اُتے رکھنا چاہنا واں
اج وی شاموں پہلاں آن دا آکھیا سی
اج وی سورج بعدوں بجھنا چاہناواں
کیہ جاناں میں تیرے پنجرے پنجرے نوں
بدھے پنکھاں نال وی اڈنا چاہنا واں
اوہ تے چن دی لوئے دسنا چاہندا اے
میں بدلاں دے اولھے لُکنا چاہنا واں
آئوندی رُتے کسے توں مدھ نہ ہوواں گا
میں شیشے دے اندر اگنا چاہنا واں
کئی واری فر چپ دا چپ ای ہو جانا
کئی واری کجھ رب توں پچھنا چاہنا واں