اج دی گل

سید فراست بخاری

اوہناں کیہ کرنی جمہور دی گل
جنہاں کرنی جی حضور دی گل
سب اپنی اپنی کردے نیں
کوئی کردا نہیں منشور دی گل
ایویں پج پاندے ججاں دا
وچوں کردے نت فتور دی گل
اوس گل وچ گھاٹا ہندا اے
جے ہووے تکبر غرور دی گل
ساڈے دیس چ اک وی لیڈر نہیں
ہے لیڈر شپ تے دور دی گل
ایتھے پیسے والے جت دے نیں
کوئی سن دا نہیں مجبور دی گل
ہر گل بن دی اے پیسے نال
نہیں قصور‘ بے قصور دی گل
تہانوں ساری مستی کرسی دی
تسی بھلے سکون سرور دی گل
ہر شے چڑھی اسماناں تے
کیہ پچھدے او مزدور دی گل
نہ کر گل کوئی کرگل دی
کرزخمی کشمیر ناسور دی گل
سانوں دوزخ توں ڈراندا اے
مُلاںکردا آپ حور دی گل
موسیٰ کیتی سی بس اک واری
فر کیتی نہیں اوس طور دی گل
رب سوہنا کردا عرشاں تے
ہر ویلے آپ حضورؐ دی گل
چھڈ یار فراست لوکاں دی
کر پنجتن پاک دے نور دی گل