استحصالی دنیا

الیاس عباسی

انسانی تواریخ توں پتا چلدا اے کہ حضرت انسان نے قدرت ولوں آئیاں مصیبتاں نال تگڑا مقابلا کیتا اے تے اپنی عقل راہیں کئی مشکلاں نوں اسانیاں وچ بدلیاایسے لئی رب سوہنے دا کہنا اے کہ ایس کائنات نوں انسان لئی مسخر کردتا گیا تے عقل والیاں لئی نشانیاں وی نیں اسیں اپنے ماضی ول جھات پائیے تاں کئی اجہیاں مثالاں وی دِسدیاں نیں جتھے انسان نے موزی بیماریاں دے مکاء لئی کامیاب جتن کیتے نیں اجہی اک مثال پاناما نہردی وی اے جہدی کھدائی دوران وبائی مرض تے قابوپالِتا گیا تے ایسے سہولت کارن لاطینی امریکا سنے پوری دنیا نوں بحری تجارت توں فائیدا ہورہیا اے انسان نوں اشرف المخلوقات دا رتبا حاصل اے ایسے لئی اگے ودھن لئی نِت نویں جتن کرنا فطری جہی گل لگدی اے کجھ چِرپہلاں مشہور ملٹی نیشنل کمپنی ٹیسلا ولوں سپیس ایکس نے کامیابی دے جھنڈے لائے تے دوجے پاسے برطانیا نے بناوٹی ذہانت راہیں عسکری سازوسامان وچ جِدت لیاوندی تے روایتی فوجیاںدے نظریے نوںپرانا ثابت کردتا ایسے طراں چین وی ہالی ووڈ دی مووی دے آئرن مین وانگوں روبوٹس فوجی بناون وچ بوہت اگے جاچکیا اے ایس بناوٹی ذہانت دے کارن عسکری ٹیکنالوجی تے منصوبہ بندی بدل چکی اے ہن روایتی جنگاں ، جھڑپاں دا ویلا لنگھ گیا اے ایس کھیتر وچ اک دوڑ لگی ہوئی اے جہدے وچ مشرق ولوں چین تے مغرب وچکارجنگ اے قومانتری میڈیا اندر ایہنوں وکھووکھ ناں دتے جاون لگ پئے نیں ایس ٹیکنالوجی دا بھرواں استعمال عسکری پدھر اتے ہورہیا اے ایسے لئی انسانی حقاں دی منگ کرن والیاں دی چنتا وی گھٹ نہیں کیوں جے ایسراں دنیا دے کجھ ملکاں نوں اجاراداری مل رہی اے تے کئی ماڑے ملکاں دی ازادی مُکدی جارہی اے ایہ غلامی دی سبھ توں بھیڑی قسم اے جتھے انسانی رویے ، اوہناں دیاں سوچاں تک کنٹرول کیتیاں جارہیاں نیں تے اجہے فورم وی بن چکے نیں جتھے کجھ تگڑے ملک باقی دنیا دا فیصلا کردے نیں کہ اوہناں دی سمت کیہ ہونی اے ؟
کجھ دیہاڑ پہلاں پاکستان دے وزیرخارجا شاہ محمود قریشی وی ایف اے ٹی ایف دے رویے توں گھبرا کے بول پئے کہ ایہ فورم سیاست دی نذر ہورہیا اے ایسے طرحاں اقوام متحدہ دی پکی سلامتی کونسل اندر کجھ ملکاں کول ویٹوپاور دا اختیار وی اجہی مثال اے جہدے راہیں عالمی طاقتاں باغی ملکاں نوں سبق سکھاندیاں نیں۔آرٹی فیشل انٹیلی جنس دی ٹیکنالوجی نے انسان لئی کئی محاذوی بنا لئے نیں کجھ دیہاڑ پہلاں ہندوستانی جموں دے علاقے وچ ڈرون حملا ویکھن وچ آیا تے ایسے طراں مغرب اندر ڈرونز راہیں ڈکیتیاں وی رپورٹ ہوئیاں نیں ماضی وچ چین ولوں خلاء وچ چھڈے گئے راکٹ دے تجربے ناکام رہے تے کجھ راکٹ خلا وچ ٹکراگئے تے اوہناں دے ملبے نوں ٹھکانے لاون دا کوئی بندوبست نہیں کیتا گیا کیوں جے ایس کھیتروچ کم ہون والا اے جہدی ٹیکنالوجی دا دعوا اجے تیکرنہیں کیتاگیا تے ایس ملبے دے کیہ اثرات ہونے نیں ایہدا اندازا لاونا کوئی سوکھا کم وی نہیں پرعالمی طاقتاں دی اخلاقی ذمہ داری وی اے کہ اوہ خلاء وچ ملبے نوں ٹھکانے لاون دا بندوبست کرنااجوکی دنیا عالمی ماحولیاتی تبدیلی دا شکار ہورہی اے دنیا دے تگڑے معاشی ملکاں نے ساڈی دنیا وگاڑن وچ کوئی کسر نہیں چھڈی پاکستان ورگے ملک ایس تبدیلی توں متاثرہورہے نیں پیرس معاہدے اتے امریکا دی ہٹ دھرمی وی ویکھی گئی جہڑا کاربن دے ودھا وچ پہلے تن ملکاں وچوں اک اے جے ایہنوں ماحولیاتی دہشت گردی آکھیا جاوے تاں غلط نہیں ہووے گا کیوں جے ایس کارن کئی ملک ، قوماں دا وجود خطرے وچ پے گیا اے مراکش دی مثال وی ساڈے ساہمنے اے پاکستان ، ہندوستان اندروی بھیڑی صورتحال اے پانی دی خوفناک حد تیکرکمی انسانی وجود لئی وڈا خطرا اے دوجے پاسے چوتھے صنعتی انقلاب دا فایدا مغرب نے چکیا تے ایہدے نقصان دی قیمت ساری دنیا نوں دینی پے رہی اے اک پاسے گلیشیر پگھل رہے نیں تے دوجے پاسے ساڈی دنیا وچ تاپمان دے ودھا وچ رجحان ویکھیا گیا اے ایسے لئی کئی سوشل ماہراں مطابق اج دا انسان اپنی قبر آپے کھٹ رہیا اے۔٭