جاگ پنجابی جاگ

ارشاد کھوکھر

جھُلے وچوں نکل پنجابی
دیس دی کر لے دور خرابی
دیس تیرے وچ ویری وڑیا
نکا وڈا ہر کوئی ڈریا
تھاں تھاں ویری اگاں لائیاں
دن دیہاڑے شاماں پائیاں
راہی سارے راہواں بھُلے
چھیڑو مجھاں گاواں بھُلے
ہر چہرے دسدی بے تابی
جھُلے وچوں نکل پنجابی
سارے کردے حال او پاہرے
سبھناں نوں منگھیائی مارے
آٹا گھیو وی نظر نہ آئوندا
بجلی دا بل خون سُکاندا
آپے حاکم موجاں کردے
دیس دے واسی بھکھے مردے
بن گئے سادھو چور شرابی
جُھلے وچوں نکل پنجابی
جھاکے شرماں ساریاں لاہ دے
اپنا سارے رُعب جما دے
لاچا کڑتا پگڑی پا اچ
دھیاں بھیناں دے سر کج
جبرو بن ملنگی دُلا
دیس دا کر توں اُچا کلا
بازوں نہ ہن بن مرغابی
جُھلے وچوں نکل پنجابی
ماں بولی دا مان ودھائیں
وارثؒ ورگا لیکھ جگائیں
پیاراں والے بیج اُگا دے
دیس دے سارے روگ مُکا دے
کھیتاں دے وچ ہل چلا دے
سُتے بھاگ ارشاد جگا دے
دیس دی ہتھ وچ لے لے چابی
جھُلے وچوں نکل پنجابی