نورمقدم قتل

طلعت عباس خان

غیرانسانی رویاں نوں روکن لئی ساڈے ایتھے ان گنت قنون موجود نیں پر ایہناں توں کوئی ڈردا نہیں جانواں دے نال وی اوہو وحشیانہ سلوک ویکھن وچ آیا جو انساناں دے نال کردے نیں۔ جانوراں تے اسلحے دا کھلا استعمال ہویا پہلے گولیاں دا وار کیتا گیا فیر اوہدے تے چھری چھلائی۔ ایسے طرح اسلام آباد وچ اک کڑی تے پہلے وحشیانہ تشدد فیر سر لاہ دتا۔ ملزم گرفتار ہو چکیا اے آلہ قتل برآمد ہو چکے نیں۔ کیس ٹر پیا اے جے فیصلہ تن دیہاڑیاں وچ نہیں تے تن ہفتیاں وچ ہو جاوے گا تن مہینے وچ وی ہو جاوے تے کوئی برا نہیں پر تن ورھیاں وچ نہ ہووے؟ لگدا اے ساڈے ایتھے کرونا وائرس وانگوں ہن وحشی وائرس وی پھیل چکیا اے۔ ایہ وائرس انساناں تے جانوراں تے اکوجیہا حملہ کر چکیا اے مقصود جعفری صاحب نے ٹھیک کہیا:
بہتر یہی ہے جعفری جنگل میں جابسیں
شہروں میں ناگ پھرتے ہیں انساں کے روپ میں
شہراں وچ ہن ناگ نہیں اژدھا تے خونخوار بھیڑیے پھر رہے نیں جہناں نوں کوئی پچھن والا نہیں۔ پتہ نہیں ایس قاتل ورگے ذہنیت سوچ دے سنگدل اوہدے حلقہ احباب وچ کنے ہور ساتھی ہون گے۔ اوہہناں تے وی ورک کرو‘ اوہناں توں پچھو اوہناں دے ذرائع آمدن تے پیشے دا پچھو‘ کہڑے کہڑے فعلاں نال اوہناں دا تعلق اے کس قسم دا نشہ کردے نیں لگدا ایہو اے ایہ قاتل اکلا نہیں ایہدے ورگے اوہدے ہور ساتھی ہون گے اوہناں توں سوسائٹی نوں خطرہ اے۔ حکومتی ادارے جہناں دا کم ای ایہو ہونا چاہیدا اے کہ کرائم تے نظر رکھن‘ نشہ آور شیواں نوں نہ وکن دین‘ پر جتھے تسیں ددھ دی رکھوالی تے بلے بٹھائو گے تے فیر نتیجہ تے ایہو نکلے گا؟ افسوس نال کہنا پیندا اے کہ ساڈی سوچ دا انداز ٹھیک نہیں‘ نظام اجیہا ہوندا کہ ہفتہ دس دن وچ انج دے مجرم نوں سرعام لمکا دتا جاندا پر انج ممکن نہیں۔ ایہ تہانوں وی پتہ اے تے ایہناں جرائم کرن والیاں نوںوی پتہ اے۔ اجہے واقعات تے چھیتی سزا ملنی چاہیدی اے پر موجودہ قنون وچ انج ممکن نہیں جہالت ایہہ وے کہ اکثر ایہ تبصرے وی ہو رہے نیں کہ مقتول یاں مقتولہ نے ایہدے ورگے نال دوستی کیوں کیتی؟ گھر والیاں نوں اعتماد وچ کیوں نہیں لیا۔ اوہدے کپڑیاں اوہدے بنائو سنگھار نے اوہنوں اجہی واردات کرن تے مجبور کیتا۔ وغیرہ وغیرہ‘ اجہے سوال کرن والیاں تے اسیں افسوس ای کر سکنے آں۔ اجہے سوال کرن والے اک خاص قسم دا مائنڈ سیٹ رکھدے نیں۔ اجہے لوک اعلیٰ عہدیاں تے نیں جہناں نوں انصاف دینا اے اوہ وی ایسے سوچ دے حمایتی نیں۔ اک واقعہ یاد آ گیا نیوجرسی ٹائم وچ پاکستان دے حوالے نال فرنٹ صفحے تے خبر چھپی سی۔ جہنوں ویکھ کے دل بڑا خوش ہویا کہ وڈے اخبار وچ اج پاکستان دی خبر چھپی اے۔ اوس خبر نوں جدوں پڑھیا تے سر شرم نال جھک گیا۔ اوس زمانے وچ وی اسلام آباد دے کجھ انج دے ای حالات سن کہ کڑیاں وارداتاں دے ڈر پاروں گھروں کالج نہیں سن جاندیاں۔ ایس لئی آئی جی صاحب نے ایہناں حالات وچ ایف سیون کالج دا وزٹ کیتا کالج دے اپنے خطاب وچ فرماندے نیں میری بیٹیو ایس شہر دے حالات جس طرح خراب نیں تہانوں چاہیدا اے کہ گھراں چوں غیرضروری نہ نکلیا کرو نکلن ولے چادر نال سر منہ کج کر لیا کرو۔ اوس اخبار نے آئی جی دی قسم دیاں کجھ لائناں لکھ کے خبر دا مذاق اڑاندے ہوئے لکھیا کہ کیہ آئی جی صاحب کالج وچ بطور کسے مذہبی شخصیت دے خطاب کرن گئے سن یاں اک سکیورٹی دے اعلیٰ ادارے دے سربراہ دے طور تے اوہناں دا کم تے ایہ سی ایہ ساریاں نوں دسدے کہ اسیں اسلام آباد وچ سکیورٹی دے سارے انتظامات مکمل کر لئے نیں ہن تہانوں کسے قسم دی کوئی فکر نہیں ہونی چاہیدی۔ تسیں کسے ویلے تے اکلے کدھرے وی آ جا سکدیاں جے۔ اخبار نے لکھیا کہ اوہنے اپنا تے اپنے ادارے دا مذاق اڈایا اے۔ ہن اینے عرصے بعد انج دی ای سوچ ہن وی وکھائی دیندی اے۔ جد کہ لوڑ ایس گل دی اے کہ سکیورٹی ادارے اینے مضبوط ہون کہ کوئی ظالم اجہی واردات کرن دا سوچے وی نہ۔ حضرت عمرفاروقؓ دے عدل دی مثال سامنے آپ دا انتقال ہویا تے اک چرواہا نسدا ہویا آیا تے چیک کے بولیا لوگو حضرت عمرفاروق رضی اللہ عنہ ہن ساڈے درمیان نہیں رہے۔ لوکاں نے حیرت نال پچھیا توں مدینہ توں ہزاراں میل دور جنگل وچ ایں‘ تینوں ایس سانحے دا کیویں پتہ لگا؟ چرواہا بولیا جدوں تک حضرت عمر فاروقؓ زندہ سن میریاں بھیڈاں جنگل وچ بے خوفی نال پھردیاں سن تے کوئی درندہ اوہناں ول ویکھن دی جرأت نہیں سی کردا پر اج پہلی واری بھیڑیا ایتھے بھیڈ دا بچہ چک کے لے گیا اے۔ اک ہور موقع تے آپ نے فرمایا سی کہ کوئی وی خاتون سونے نال جے لدی ہوئی وی اے تے مکہ توں مدینہ رات دے انھیرے وچ آ جا سکدی اے۔ کسے دی کوئی مجال نہیں کہ اوس عورت ول کوئی ویکھے وی۔ ایہ مدینہ دی ریاست ہوندی سی۔ اسلام آباد پولیس کول سارے وسیلے نیں پر فیر وی درندے ایس شہر وچ سرعام گھمدے پھردے نیں۔ جدوں تک پولیس کرائم پشہ بندیاں توں اپنے آپ نوں وکھرا نہیں کردی اپنی تنخواہ تے گزارا نہیں کردی ایہ وارداتاں انج ای ہوندیاں رہن گئیاں۔ اسلام آباد دے سابق سیشن جج صبا محی الدین صاحب عدالت وچ پولیس نوں مخاطب ہو کے کہندے سن جنہے بندہ مارنا ہووے اسلام آباد لیا کے مار لوے اسلام آباد پولیس اوہنوں کجھ نہیں کہندی۔ ایہ گل تہاڈی اج وی ٹھیک اے۔ انج ای اے سکیورٹی دین دی تھاں کہندے نیں عورتاں منہ چادر نال کج کے گھراں چوں نکلن۔
ہر بچہ جوڈو کراٹے لکھے جد کہ ایہناں اداریاں دا کم اے اپنے شہریاں دی حفاظت کرنا نہ کہ باپ بن کے مولوی بن کے لیکچر دینا۔ جی گویرا کہندا اے میں اوہناں لوکاں دیاں قبراں وی ویکھیاں نیں جو اپنے حق لئی ایس لئی نہیں سن لڑدے کہ اسیں مارے نہ جائیے۔ اپنے حق تے سچ دی خاطر لڑنا سکھو۔ نہ کوئی موت دے سکدا اے تے نہ ای کوئی رزق کھوہ سکدا اے جنہے ایہناں دو گلاں تے عمل کیتا اوہ معاشرے دا چنگا شہری ثابت ہویا۔٭٭