غزل

انور ندیم علوی

مہربانی پیار دی اے رابطہ ٹُٹیا نہیں
دور اکھیاں توںبرابر مینوں اوہ بھلدا نہیں
پیار دنیا‘ پیار مذہب‘ سانوں دسیا پیار نے
نفرتاں دے نال مُکیا کوئی وی جھگڑا نہیں
چڑھ پیا چن چودھویں دا‘ دور ہنیرے ہو گئے
بند اکھیاں نوں مگر کجھ وی نظر آئوندا نہیں
کوئی کنی وی کرے کوشش‘ اساں ازما لیا
ایہناں پھوکاں نال بجھنا‘ پیار دا دیوا نہیں
نعرہ حق دا مار کے سولی نوں چم لتا ندیم
بادشاہ دے سامنے ایہہ سر کدی جھکیا نہیں