غزل
طفیل عامر
سوچنا یارا کیہ ہووے گا
کیتا کارا کیہ ہووے گا
جناں پیارا مینوں اوہ وے
اوہنوں پیارا کیہ ہووے گا
سورج چن تے نہیں سن میرے
ڈبیا تارا کیہ ہووے گا
ویکھ لے مینوں پچھدا سیں توں
کرماں مارا کیہ ہووے گا
توں میری میں تیری ٹوہ وچ
انج گزارا کیہ ہووے گا
جان جنیں پا دتی گہنے
اوہ بے ویہارا کیہ ہووے گا
چھتر پولے کھاندا بچہ
وڈا سارا کیہ ہووے گا
کل دے سچ دا کیہ بنیا سی
اج نتارا کیہ ہووے گا
دل توں وڈا کوئی وی ایتھے
بے اعتبارا کیہ ہووے گا
ورے ہوئے نے اڈیکدے پئے آں
ہور کوئی لارا کیہ ہووے گا
Load/Hide Comments