بندا کہانی وی اک ہوندا اے

خالدحسین تھتھال

بندا کہانی وی اک ہو ندا اے
جس دے سے ا ی پاتر ہوون
مُکھی پاتر وی ہوندا اے
بندے دے جمن تیں پہلاں
کہانی اوہدی جم پیندی اے
جمن مگروں کہانی اوہدی
ویلے دے نال ٹر پیندی اے
ہر کہانی اک وکھری دُنیا
جس وچ دوزخ جنت جتنے
وِتھاں پاڑے
ہر بندے دی کہانی وکھری
آپو اپنا تانا پیٹا
آپو اپنی بُنتر ویتر
آپو اپنی سیدھ سیہان
آپو اپنا گُن گیان
آپو اپنا دھرم دھیان
آپو اپنا پِڑ میدان
کہانی وچ کوئی کسے کلا دے
رنگ وی ہوون
رُوپ سروپ بہروپ وی ہوون
بندہ کہانی سُندا پڑھدا
کہانی پاؤندا کہانی گھڑدا
کہانیاںوچ ای بیڑیا بنکیا رہندا اے
دُوجیاں ولوں دیکھ سُن کے
اپنا تے کہانی دا گھیرا
موکلا کردا رہندا اے
کہانیاں پِچھے دوڑدا رہندا اے
کہانی بندہ ٹوردی رہندی اے
بندہ کہانی ٹورد ا رہندا اے
بند ہ ٹُرٹُرہف وی جاندا اے
کہانی سے پلسیٹے کھاندی اے
بندہ لوٹ پلوٹ وی ہووندا اے
بھوں وی بندے نوں چڑھ جاون
ماڑے چنگے موڑ وی آون
بندے پُٹھے سِدھے ہڑاپھے مارن
اپنی کہانی سودھن سنوارن
کسے دی چا کھُدیڑن
ہر کہانی دی کوئی تند تانی
دُوجی کسے کہانی دے وچ
رلدی مِلدی ٹُٹدی بھجدی
وِگڑدی سنوردی وی رہندی اے
اپنی کہانی توڑ چڑھن تیں پہلاں ای
نویں نویں کسے کہانی دا
مُنڈھ نواں کوئی بنھدا رہندا اے
بندا کہانی تیں ڈر جاندا اے
کہانی ڈیہل بندے تیں کھا ندی اے
بندے کہانیاں ویر کرودھ
دے ہتھے چڑھ کے
اک دوجے دا ناس کرن تے بیں مکاون
دے آہرے وی لگے رہندے
ایہناں دے وچ کجھ کجھ کدہرے
جِن چڑیلاںدیواں پریاں دے
جھلکارے وی ہوندے نیں
جہڑے ست سمندر ٹپ کے
جھیرے جھاگ کے
انبھاکھے ان ڈِٹھے جہان وچ
جا کے بھُومی بن جاندے نیں
جِتھے دے رنگ رُوپ وی وکھرے
ہسن کھیڈن بولن وکھرا
سوچ ترکڑی تولن وکھرا
بندے وچوں کہانی کڈھ لئو
بندہ لُگا ہو جاندا اے
کہانی وچوں بندہ کڈھ لئو
کہانی دی کُنج رہ جاندی اے
نہ کہانی وچ بندہ رہندا
نہ بندے وچ کہانی
بندہ ڈھونڈنا پے جاندا اے
کہانی لبھنی پے جاندی اے
اُنج ہر بندہ کہانی اوہدی
آپواپنے چوگردے وچ
اپنا سِیر رلاندے رہندے
وکھو وکھریاں کہانیاں رل کے
نویں کہانی بن جاندی اے
بندہ نواں بن جاندا اے
ساہواں دے سنگ ٹُری کہانی
ساہواں نال ای مُک جاندی اے
پچھے سُنج مسان
وسدا رہوے جہان
نِت نویں اس جہان دے اندر
نِت نواں کوئی بندہ جمدا
نِت نویں کوئی کہانی ٹُردی