شیر شاہ……SORRY

لکھت: ڈاکٹر اختر شمار

دو مصری قاضی مرن دے بعد وکھریاں وکھریاں تھاواں تے اپڑے، اک دن جنت وچ اپڑن والے قاضی دی ملاقات دوزخ وچ جان والے قاضی نال ہوئی تے دوویں اپنی اپنی مصروفیات دا حال سنان لگ پئے۔
دوزخی قاضی بولیا: بڑی چنگی گزر رہی اے صبح گیارہ وجے تک منصفی دا سارا کم پورا ہو جاندا اے، ہر بندے دے مقدمے دا فیصلہ اک ای دیہاڑ ہو جاندا اے، ادھے گھنٹے توں ودھ سانوں لوکاں نوں کم نہیں کرنا پیندا، تہاڈی کیہ صورتحال اے؟ جنتی قاضی نے جواب دتا: صبح اٹھ وجے عدالت دا کم شروع ہوندا اے تے ختم ہوندیاں ہوندیاں رات دے دس گیارہ وج جاندے نیں، اک اک مقدمے دا فیصلہ ہون دچ دس ویہہ ورھے لگ جاندے نیں۔
دوزخی قاضی نے پچھیا: تعجب اے تینوں ایناں کم کرنا پیندا اے؟
؎جنتی قاضی نے جواب دتا: اصل وچ ساڈے ایتھے قاضیاں دی بہت کمی اے ناں، سارے تے تہاڈے ول ہوندے نیں۔
ایہ لطیفہ سانوں واپڈا دے اک میٹر ریڈر نے سنایا جہڑا اگلے دیہاڑ ساڈے نال کار واشنگ سٹینڈ تے اپنی مہران دی سروس کران آیا ہویا سی، میں اوہنوں آکھیا منصفاں بارے ذرا دھیان نال گل کرنی چاہید ی اے بھاویں اوہ مصری ای کیوں نہ ہون، تے فیر کہنوں خبر کون رب ذوالجلال دے نیڑے کناں پسندیدہ اے؟
اوہ بولیا بزرگو؟ میں واپڈا وچ آں مینوں پتہ اے میں نوکری کیویں کر رہیا آں، سانوں وی پتہ اے کہ اللہ دی بارگاہ وچ کون چنگا یاں بھیڑا اے پر ایہ لطیفے، کہانی، تمثیلاں تے کسے وی شعبے بارے تاثر انج ای نہیں بن جاندا، ہن ویکھو ناں میں اپنا شعبہ دس دتا اے تسیں ایمانداری نال دسو کہ میٹر ریڈرز بارے عوام دا تاثر کیہ اے؟ لوک میٹر ریڈر نوں عموماً راشی سمجھدے نیں حالاں کہ میں اک دھیلے دی رشوت کدی نہیں لئی پر لوک مینوں وی ایس کیٹیگری وچ شمار کردے نیں، میں تے انج ای کار خشک کرن والے شیدے نوں لطیفہ سنا رہیا سی اصل وچ اوہ میرا محلے دار وی اے، کارخشک کرن والا مُنڈا وی ہس رہیا سی تے ایہدی تائید کر رہیا سی۔
فیر اوہ بولیا ویسے میں ذاتی طور تے نظام تے کڑھنا آں، سچی گل ایہ اے کہ ہن ایمانداری نال زندگی گزارنا اوکھا ہو چکیا اے لوک دو دو تھاواں تے نوکریاں کردیاں نیں اودوں وی گزر بسر دشوار ہو گئی اے، میں سوچنا آں کہ لوک جدوں حالات توں تنگ آندے نیں تے منفی راہواں تے چل نکلدے نیں، میں عالم دین تے نہیں پر ایم اے اسلامیات کر رکھیا اے کجھ نہ کجھ مینوں وی دین دا علم ضرور اے، بیشتر چوری کرن والے، ڈکیتی کرن والے، بیروزگاری توں تنگ آ کے جرم دی راہ تے جا نکلدے نیں، ساڈی حکومت وچ ایناں دم خم نہیں اے کہ جرائم تے قابو پا سکے، ساڈیاں عدالتاں وچ وی کئی کئی ورھے مقدمیاں دے فیصلے نہیں ہوندے، ججاں دی تعداد گھٹ ہو سکدی اے پر پلس والے کیس ای اجہیا بناندے نیں کہ مجرم بری ہو جاندے نیں، اجے کجھ دناں پہلاں تسیں اخبار وچ پڑھیا ہووے گا سیالکوٹ دی اک ماں نے اپنے پتر دے قاتل نوں ہلاک کرکے پتر دا بدلہ لیا اے، کیوں جے قاتل سزا ملن دے باوجود وڈی عدالت توں بری ہو گیا سی، ایس طرح دے فیصلیاں تے عام بندہ دلبرداشتہ ہوندا اے، کدھرے نہ کدھرے نظام وچ خامیاں نیں تے مجرم بری ہوندے نیں۔ ایہدے وچ عدالت دا قصور شاید نہ ہووے کہ قنون تے ثبوت منگدا اے جے کیس ای اجہیا بنایا گیا ہووے تے اوتھے وکیل یاں جج کیہ کرے۔ ساہیوال وچ بے گناہ مارے جان والیاں دی ویڈیو دنیا بھر نے ویکھی، قاتل بری ہوئے کیوں؟
حکمراناں نوں غور کرنا چاہیدا اے اے صرف آئی جی بدلن نال کیہ ہووے گا، کنے افسران بدل چکے ساڈی پلس وچ کوئی تبدیلی نہیں آئی…اک واری اُتوں وی تبدیلی کرکے ویکھو، ہن تے وسیم اکرم پلس ناں وی مذاق دی علامت بن گیا اے۔
شخصیت ظاہری باطنی توں اک تاثر بن دا اے شخصیت وی اک کرنسی اے جے کرنسی دی قدروقیمت نہ ہووے تے فائدہ…؟
ہن ساڈے وزیر اطلاعات فیاض صاحب وزیراعلیٰ شیر شاہ سوری جہی تعریف چاہندے نیں۔ سوری سر! شیر شاہ سوری دی شخصیت اجہی سی کہ اوہدے دور وچ چڑی پر نہیں ما رسکدی سی، ایس ویلے پنجاب وچ کرائم کناں ودھ گیا اے اُتے ذرا سخت تے بارعب حکمران ہووے تے بیورو کریسی وی چوکس رہندی اے کہ کدھرے بے عزتی سرعام نہ ہو جاوے…ساڈے وزیراعلیٰ تے معصوم تے شریف الفنس انسان نیں ایہ چاہن وی تے غصہ وکھان وی تے لوک ایہناں نوں وی باانسان ای سمجھن گے۔ کیہ خیال اے تہاڈا؟ میں آکھیا تہاڈیاں گلاں نال اتفاق اے پر سانوں کجھ ویلا تے عمران خان نوں دینا ہووے گا۔
اوہ بولیا: ضرور ویلا لوے پر جتھے اینے یوٹرن لئے نیں بزداری یوٹرن دا کوڑا گُھٹ وی بھر لین شاید پنجاب وچ کجھ بہتری آ جاوے۔ فیر اٹھدیاں ہوئیاں بولیا:
میری گڈی تیار اے چلدیاں چلدیاں ایہ لطیفہ وی سن لو بغیر مائنڈ کیتے۔
اک ماں اپنے خاوند نال بچے دیاں عادتاں بارے دس رہی سی۔
ساڈا بچہ بہت ذہین اے جدوں ایہ چلدا اے تے انج لگدا اے کہ کوئی وڈا افسر چل رہیا اے، مطمئن ایناں اے جیویں ملک دا وزیراعظم ہووے، باخبر ایناں اے جیویں وزیر اطلاعات و نشریات ہووے، سمجھدار ایناں جیویں قائد حزب اختلاف ہووے، شوہر نے آکھیا:
اندازہ لا کے ایہ وی دسو کہ جیل وچ کناں عرصہ رہوے گا۔