قرآن مجید:پوری دنیا دی رہنمائی دا سوہنا ذریعہ

لکھت:عبدالعزیز چشتی قادری

اسلام امن پسند مذہب اے پر ایہنو ںدنیا بھر وچ ات گردی تے تشدد دا سامنا اے بھارت توں لے کے فلسطین تے عراق توں لیبیا تک ہر تھاں غیرملکی مداخلت پاروں مسلماناں تے زندگی تنگ ہو چکی اے اسلام دی امن پسندی بارے ارشاد نبویؐ اے: ترجمہ: ہر مسلمان دا دوجے مسلمان تے حرام اے اوہدا خون‘ اوہدا مال تے اوہدی آبرو۔
رسول اکرم صلی اللہ علیہ وآلہ وسلم ہوریں جس زمانے تے علاقے وچ تشریف لیائے اوہناں وچ ہر انسان دی ایہو تن چیزاں غیرمحفوظ سن نہ کسے دی جان محفوظ سی نہ کسے دا مال محفوظ سی تے نہ کسے دی عزت دی قدر سی۔ آپؐ ہوراں نے دوجیاں دی ایہناں تنے چیزاں لئی حفاظت کرن دا حکم فرمایا۔ ایتھوں تک کہ آپؐ اپنی ذات دے راہیں ایہناں اصولاں دی اعلیٰ ترین مثالاں قائم فرما دتیاں۔ جنگ بدر وچ فوج دی صف بندی ہو رہی سی اک صحابی صف دے برابر نہیں سن آپؐ ہوراں اپنے ہتھ وچ پھڑی ہوئی پتلی جہی سوٹی راہیں اوہناں نوں ٹوک دتا صحابی نے آکھیا یا رسول اللہ مینوں تے ایہدے نال تکلیف ہوئی اے آپؐ فرمایا میں موجود آں۔
حضرت ابوذر رضی اللہ تعالیٰ عنہ نے اک واری غلام نوں آکھ دتا۔ او حبشن‘ آپ صلی اللہ علیہ وسلم نے فرمایا کسے سفید کھل والے نوں کسے کالی چمڑی والے دے بچے تے کوئی فضیلت نہیں‘ فضیلت تے عمل نال اے۔ رسول اللہ صلی اللہ علیہ وآلہ وسلم نے صحابہ کرام دی تربیت وی ایس انداز نال فرمائی کہ جدوں اوہناں صحابہ کرام وچوں جدوں کوئی مسلمان دا سربراہ بنیا تے اوہناں نے دوجیاں دی جان و مال تے عزت دا خوب خیال رکھیا۔ ہن ویکھنے آں کہ دنیا بھر وچ ساڈے اُتے کیہ بیت رہی اے۔
قرآن کریم خدائے لم یزل ولا یزال وایزدمتعال دا اوہ ازلی‘ ابدی‘ مقدس کلام‘ معجزنظام اے جو وحی راہیں افضل کائنات‘ فخر موجودات‘ سید الانبیاء و المرسلین‘ رحمت اللعالمین حضرت محمد مصطفی احمد مجتبیٰ صلی اللہ علیہ وآلہ وسلم ہوراں تے اج توں تقریباً ساڑھے چوداں سو ورھے پہلاں ترئی سال دے عرصے وچ تھوڑا تھوڑا نازل ہو کے ساڈے تک ناقابل تک تواتر نال ایس طرح اپڑیا اے کہ ایہدے وچ اک لفظ‘ کیہ اک زبر‘ زیر تے پیش سگوں اک نقطہ تک دا وی تغیروتبدل نہیں۔ ایہو اوہ کتاب اے جہدی فصاحت و بلاغت نوں ویکھ کے دنیا محو حیرت ہو گئی۔ ایہدے سامنے وڈے وڈے فصحاو بلغا تے پڑھے لکھے دانشور لوکاں نوں گوڈے ٹیکنے پئے۔ ایہدے الفاظ و لکمات دی سحرانگیزی دے سامنے پتھر دل لوک وی موم ہو گئے۔ ایہدے معانی و مطالب دے بحرناپیداکنار وچ راسخین فی العلم ہمیشہ غوطہ زن رہے۔ ایہدے فائدے و ثمرات نال سارا عالم انسانیت متمتع رہیا۔ ایہدے انوارات و برکات نال مسلمان کیہ غیرمسلم وی مستفیض ہوندے رہے۔ ایہدا قیامت تک آن والے دنیا بھر دے سارے انسان و جنات نوں ایہ چیلنج اے کہ اسیں اک دوجے دے معاون و مددگار بن کے ایس ورگا اک کلام پیش کریئے۔ پر عرب و عجم‘ مشرق و مغرب دے بلند پایہ فصحا و بلغا‘ نثر نگار و شعرا‘ دانش ور تے ادباء تے ماہرین لغات ایہدی ورگی اک آیت پیش کرن توں قاصر نیں تے قیامت تک عاجز رہن گے تے ایہ کلام بلاغت نظام انشاء اللہ قیامت دی سویر تک ایسے آب و تاب نال چمکدا دمکدا رہوے گا۔
سب توں پہلاں اللہ تعالیٰ نے ایہ چیلنج دتا کہ اے پیغمبر! تسیں کہہ دیو کہ جے سارے انسان تے جنات ایس کم تے اکٹھے وی ہو جان کہ ایس قرآن ورگا کلام بنا کے لے آن‘ اودوں وی ایہدا ورگا نہیں لیا سکن گے‘ بھاویں اوہ اک دوجے دی کنی مدد کر لین۔ سورہ بنی اسرائیل: جدوں دنیا قرآن کریم ورگا کلام پیش کرن توں عاجز ہو گئی تے الٹا ایہ کہن لگ گئی کہ ایہ قرآن پیغمبر صلی اللہ علیہ وآلہ وسلم نے اپنے ولوں گھڑیا اے تے فیر اللہ تعالیٰ نے دوجا چیلنج ایہ دتا کہ اے پیغمبر! ایہناں نوں کہہ دیو کہ فیر تسیں وی ایہدی ورگیاں گھڑیاں ہوئیاں دس سورتاں بنا لیائو تے) ایس کم وچ مدد لئی (اللہ توں سوا جس کسے نوں بلا سکو‘ بلا لوو‘ جے تسیں سچے او (سورئہ ہود) جدوں قرآن مجید دیاں دس سورتاں پیش کرن توں وی دنیا عاجز ہو گئی تے فیر اللہ تعالیٰ نے تریجا چیلنج ایہ دتا کہ جے تسیں ایس قرآن دے بارے ذرا وی شک وچ ہوو تے جو اساں اپنے بندے (محمد صلی اللہ علیہ وآلہ وسلم) ہوراں تے اتاریا اے تے ایس ورگی اک سورت ای بنا لیائو تے جے سچے ہو تے اللہ توں سوا اپنے سارے مددگاراں نوں سد لوو (سورئہ بقر) ایسے طرح سورئہ یونس وچ چیلنج دیندے ہوئے فرمایا: کیہ فیر وی ایہ لوک کہندے نیں کہ پیغمبر نے ایہنوں اپنے ولوں گھڑ لیا اے؟ کہوو کہ فیر تے تسیں وی ایہدی ورگی اک سورت گھڑ کے لے آئو تے ایس کم وچ مدد لین لئی (اللہ توں سوا جس کسے نوں بلا سکو بلا لوو‘ جے سچے او (سورئہ یونس) جدوں دنیا قرآن مجید دی اک سورت وانگوں کوئی اک سورت وی پیش نہ کر سکی تے الٹا ایہ کہن لگ گئی کہ پیغمبر نے ایہنوں اپنے ولوں گھڑ لیا اے؟ تے فیر اللہ تعالیٰ نے چوتھا چیلنج ایہ دتا کہ کیہ اوہ ایہ کہندے نیں کہ ایہناں صاحب نے ایہ (قرآن) آپ گھڑلیا اے؟ جے ایہ واقعی سچے نیں تے ایہدے ورگا کوئی کلام (گھڑ کے) لے آئو یعنی گھٹ توں گھٹ قرآن مجید دی آیت وانگوں اک آیت ای پیش کر دیو (سورہ طور) سگوںآخر وچ تے پنجواں تے آخری چیلنج ایہ وی دے دتا کہ ایہ کم یقینا اوہ کدی نہیں کر سکن گے (سورئہ بقر) پر تریخ گواہ اے کہ اج تقریباً ساڑھے چوداں سو سال گزرن دے بعد وی تے انشاء اللہ قیامت دی سویر تک کوئی مائی دا لعل ایسا پیدا نہیں ہووے گا جو ایہدے چیلنج نوں قبول کر سکے تے قرآن حکیم دی فصاحت و بلاغت‘ جاہ و جلالت تے ایہدے جمال تے خوبصورتی دے سامنے اک سورت کیہ اک کلام سگوں اک کلمہ تک بنا دیوے۔
ایس بلاغت نظام پاک کلام دا حق تے ایہ سی کہ دنیائے کفر ایہدی سچائی تے حقانیت نوں دِلوں من دی ایہدے تے ایمان تے یقین لیاندی تے ایہدے احکامات تے عمل کردی کفر و شرک‘ ظلمت و جہالت تے قہرو جبر دے انھیریاں وچ ایہدیاں نورانی کرناں نوں مشعل راہ دے طور تے استعمال کرکے اللہ تعالیٰ تک اپڑن دا راہ معلوم کردی تے ایہدا قرب حاصل کردی‘ پر افسوس کہ اوہناں نے ایس پاک کلام دی ذرا وی پرواہ نہیں کیتی سگوں بڑی بھیڑی طرح ایہدی توہین تے تنقیص کیتی‘ ایہدی بے حرمتی تے پامالی کیتی‘ ایہدی ردائے تقدیس نوں پارہ پارہ کیتا تے ایہدی حرمت و عظمت دا جنازہ کڈھیا‘ ایس لئی کسے نے ایہنوں نذرآتش کیتا تے کسے نے اوہنوں گٹر وچ سٹیا‘ کسے نے اوہنوں جتیاں تھلے روندیا تے کسے نے ایہنوں پارہ پارہ کرکے کچرہ دان وچ سٹیا‘ کسے نے ایہدے اندر فحاشی تے عریانی دیاں فوٹواں چھاپیاں تے کسے نے ایہنوں پٹاکیاں وچ ورت کے ایہنوں ساڑ کے سواہ بنا دتا۔
اک افسوسناک واقعہ پچھلے دیہاڑیاں ناروے دے شہر کرسٹین سینڈ وچ اوس ویلے پیش آیا جدوں اسلام مخالف تنظیم سیان دے کارکناں نے اک ریلی کڈھی جہدے وچ تنظیم دے لیڈر لارس تھوسن نے قرآن مجید دی بے حرمتی کردے ہوئے ایہنوں اگ لائی ای سی کہ اوتھے موجود اک ترئی سالہ شامی مسلم نوجوان عمر الیاس ساریاں رکاوٹاں تے پولیس دا حصار توڑدا ہویا اگے ودھیا تے لارس تتھورسن تے ٹٹ پیا عمر الیاس نے پہلے فضا وچ جمپ لا کے ملعون لارس نوں ہوا وچ گھمایا تے فیر دوجے وار اک وچ اک زور دار لت اوہدے سینے تے کڈھ ماری تے اوہنوں زمین تے سٹ دتا مسلماناں دے ہیرو عمر الیاس دی مومنانہ جرأت نوں ویکھ کے ہور مسلم نوجواناں نوں ہمت ملی تے اوہ وی ملعون تھورسن تے حملہ آور ہوئے جہدے تے پولیس اہلکاراں دی رگ شیطانیت پھڑک اٹھی تے اوہناں نے عمرالیاس تے کئی دوجے مسلمان نوجواناں نوں پھڑ لیا جد کہ لارس تھورسن نوں وی حفاظتی تحویل وچ لے لیا گیا۔
اپریل 2018ء وچ ترکی دی بحریہ دے کسے ساحل تے اک پرائیویٹ بحری جہاز تے رقص و سرود دی اک محفل منعقد کیتی گئی جہدے وچ شرکاء دی گنتی تقریباً تن ہزار توں وی ودھ سی ناچ گانا کرن والیاں دی گنتی وی واہوا سی۔ 30 توں ودھ عسکری قیادت دے جرنیل شریک سن۔ اک افسر نے کپتان توں قرآن کریم دا اک نسخہ منگوایا‘ تے اوہنوں پڑھن نوں کہیا اوہنے جدوں پڑھیا تے جنرل نے اوہدی تفسیر پچھی‘ اوہنے لاعلمی دا اظہار کیتا تے اوس جنرل نے اوہ نسخہ شہید کر دتا۔ اوہنے کہیا کہ ایس قرآن نوں نازل کرن والا کتھے اے‘ کون ایہدی حفاظت تے ایہدا دفاع کرے گا؟ اوہدی ایہ آواز سن کے اوہنے لیان والے کیپٹن تے بڑا خوف تے لرزہ طاری ہو گیا تے اوہ تیزی نال ایس بھرے اڈے چوں باہر آ گیا۔ اوہدے باہر آئوندیاں ای اک خوفناک روشنی آئی جنہے ویکھدیاں ای ویکھدیاں ایس پورے علاقے نوں اپنی لھویٹ وچ لے لیا۔ سمندر پھٹ گیا تے ایہدے وچوں اگ دے شعلے بھڑکن لگ پئے۔ لوکاں دے پھٹن دیاں آوازاں آن لگ پئیاں اللہ تعالیٰ نے ایس پورے بحری اڈے نوں چک کے سمندر تو ںاٹھن والی خوفناک لہراں دے وچکار سٹ دتا‘ تے آل دوالے دے علاقے وی بھچال دی لھویٹ وچ آ گئے۔ عجیب گل ایہہ وے کہ دوجے علاقیاں توں آن والیاں دیاں لاشاں وی نہ مل سکیاں۔ قرآن کریم دی بے حرمتی کرکے ایہناں لوکاں نے اللہ تعالیٰ دے عذاب نوں دعوت دتی سی تے اللہ تعالیٰ نے انصاف کر دتا۔
حضرت انس بن مالک رضی اللہ عنہ توں روایت اے کہ اک غیرمسلم مسلمان ہویا تے اوہنے سورہ بقرہ تے سورہ آل عمران پڑھی تے رسول اکرمؐ ہوراں لئی (وحی دی) کتابت کرن لگ پیا پر بعد وچ مرتد ہو گیا تے کہن لگا کہ محمد(ﷺ) نوں تے (معاذاللہ) کسے گل دا پتہ ای نہیں اللہ تعالیٰ نے جدوں اوہنوں موت دتی تے اوہنوں قبر وچ دفن کر دتا گیا‘ سویر ہوئی تے لوکاں نے ویکھیا کہ زمین نے اوہنوں باہر کڈھ کے سٹ دتا سی لوکاں نے آکھیا کہ ایہ آپؐ دے صحابہ کرام چوں سی کیوں جے اوہ اوہناں دے دین توں نس کے آیا اے ایس لئی اوہناں نے اوہدے لئی دوجی قبر کھٹی تے پہلے دی نسبت بڑی گہری قبر بنائی تے اوہنوں دفن کر دتا۔ جدوں سویر ہوئی تے لوکاں نے ویکھیا کہ زمین نے اوہنوں باہر کڈھ دتا سی۔ اوہناں نے فیر الزام لایا کہ ایہ آپؐ دے صحابہ کرام نے کیتا اے۔ ایس لئی لوکاں نے تریجی واری قبر اینی ڈونگھی کھٹی جنی ڈونگھی اوہ بنا سکدے سی جدوں سویر ہوئی تے لوکاں نے ویکھیا کے زمین نے فیر باہر کڈھ سٹیا فیر اوہناں نوں یقین ہویا کہ ایہ کم مسلماناں دا نہیں‘ ایس لئی اوہناں نے اوہدی لاش انج ای چھڈ دتی۔ (صحیح بخاری)
2005ء وچ افغانستان وچ امریکہ مخالف مظاہریاں دا سلسلہ دس مئی نوں اوس ویلے شروع ہویا جدوں امریکی جریدے نیوزویک نے لکھیا کہ گوانتاناموبے جیل وچ امریکی فوج دے تفتیشی افسراں نے مسلمان قیدیاں تے نفسیاتی دبائو پان لئی قرآن کریم دے نسخیاں دی بے حرمتی کیتی اے۔ عالم اسلام دے احتجاج دے بعد پچھلی امریکی وزیر خارجہ کونڈولیزا رائس سنے کجھ دوجے حکام نے وعدہ کیتا کہ جے ایہناں واقعات وچ سچائی ہوئی تے ذمے وار بندیاں دے خلاف ضروری کاروائی کیتی جاوے گی۔ اسلام دی مخالفت تے اسلامی مقدسات دی توہین ایسی پالیسی اے جہدے تے یاراں ستمبر دے واقعات دے بعدوں کجھ غیرملکی ذرائع ابلاغ عمل کر رہے نیں۔
مارچ 2011ء وچ فلوریڈا دے قصبے گینس ویل وچ ملعون پادری ٹیری جونز نے قرآن پاک دی شان وچ گستاخی لئی اک نام نہاد عدالت لائی اوہدے ساتھی ملعون ساتھی وائن ساپ نے قرآن پاک دے اک نسخے نوں شہید کرن دی کوشش کیتی۔ قرآن پاک دے خلاف مقدمہ چلایا گیا ایہدے بعد جیوری نے اٹھ منٹ تک غور کیتا تے فیر سزا سنائی۔ اوتھے 30 دے نیڑے لوک موجود سن جہناں وچ اک خاتون سنے اسلام توں مرتد ہون والے تن بدبخت وی شامل سن۔ قرآن پاک نوں شہید کرن دے موقعے تے گینس ویل شہر وچ زندگی معمول دے مطابق چلدی رہی۔ ملعون ٹیری جونز نے دعوت نامے ونڈے سن پر مقامی انتظامیہ نے ایہدا کوئی نوٹس نہ لیا۔ مسلماناں دا ڈاڈھا ردعمل سامنے آیا تے پچھلے امریکی وزیر دفاع رابرٹ گیٹس ایہ کہن تے مجبور ہو گئے کہ جے اوہنے اپنے منصوبے تے عمل کیتا تے افغانستان وچ امریکی فوجیاں دی زندگی خطرے وچ پے جاوے گی۔ پچھلے امریکی صدر باراک اوباما نے وی اوس ویلے ٹیری جونز دی مذمت کیتی جہدے تے ملعون پادری نے منصوبہ ترک کرن دا اعلان کیتا پر اوہنوں روکن لئی کوئی موثر اقدامات نہ کیتے گئے جد کہ ایہدے بعد امریکی کانگریس دی کمیٹی نے اک متعصبانہ سماعت وی کیتی جہدے وچ مسلماناں وچ ات گردی دے رجحانات دا جائزہ لیا گیا۔ ایہ سماعت اینی تعصب تے مبنی سی کہ امریکی کانگریس دے واحد مسلم رکن آبدیدہ ہو گئے۔ ایس سماعت دے بعد اسلام مخالف انتہاپسنداں دی حوصلہ افزائی ہوئی۔