تیراکی توں امور سلطنت تک

لکھت:خالد مسعود خان

وزیراعظم عمران خان دی ضد دی بیماری وچ مبتلا کومے وچ پئی پنجاب حکومت نوں اک واری فیر تبادلیاں دے وینٹی لیٹر تے پا کے ہوش وچ لیان دی کوشش کیتی گئی اے۔ جے ایہناں تریخی تبادلیاں دے بعد وی حالات ٹھیک نہ ہوئے تے ایس عاجز نوں گمان اے کہ جناب عثمان بزدار تبادلیاں دی اک ہور فہرست بنا کے عمران خان دے حضور پیش ہون گے۔
شاہ جی بالکل دوجی گل دس رہے نیں۔ اوہناں دا کہنا اے کہ پچھلے تبادلیاں دے جھکڑ وچ جہڑی چیز سب توں پہلاں اڑی اے اوہ بذات خود وزیراعلیٰ پنجاب جناب عثمان بزدار دے اختیارات نیں۔ میں حیرانی نال پچھیا: شاہ جی! ایہناں کول جے اختیارات سی وی تے اوہ کہڑا ایہناں نوں چنگے انداز وچ استعمال کر رہے سن؟ شاہ جی کہن لگے: ایہو تے ساری خرابی سی۔ ایہناں کول جنے وی اختیارات سن اوہ ایہناں نوں صرف تے صرف اقربا پروری وچ استعمال کر رہے سن۔ ایہناں اختیارات دے سلب ہون تے ایہناں دی سرکاری معاملات اُتے تے کوئی فرق نہیں پوے گا پر ایہناں اے ذاتی معاملات تے بالکل ٹھپ ہو کے رہ جان گے۔ باقی چھڈو! ایہناں دے علاقے وچ ہن سارے افسران اوہ لائے گئے نیں جہناں نوں آپ عثمان بزدار جاندے تک نہیں۔ ایہناں دے لائے گئے سارے دے سارے اوہ افسران جہڑے دو نمبری وچ شہرت رکھن دی وجہ توں چن چن کے ڈیرہ غازی خان وچ لائے گئے سن تتر بتر کر دتے گئے نیں۔ ہن لائے گئے سارے افسراں نوں جناب عثمان بزدار دی تصویر وکھا کے آکھیا گیا اے کہ ہور کسے دی گل سنن یاں نہ سنن ایس بندے دی بالکل نہیں سننی۔ میں آکھیا: شاہ جی! جے ایہ حال اے تے فیر ایہ اپنے بزدار صاحب استعفیٰ کیوں نہیں دے دیندے۔ شاہ جی راز داری نال کہن لگے: اجے ایہناں دے علاقے دی سڑک مکمل نہیں ہوئی۔ اجے شاہ جی شاید کجھ ہور وی دسدے پر ایہناں دے سگنل خراب ہو گئے تے کال کٹ گئی۔
ڈیرہ غازی خان وچ ہن نسیم صادق نوں کمشنر بنا کے گھلیا گیا اے۔ جدوں میاں شہباز شریف نے اوہنوں ملتان وچ ڈپٹی کمشنر بنا کے گھلیا سی تے سب توں ودھ مشکل ملتان دے ارکان اسمبلی نوں پیش آئی سی۔ نسیم صادق کسے دی سن دا ای نہیں سی۔ اک رکن اسمبلی نے کسے گل تے نسیم صادق نوں آکھیا اوہ ایہناں دی شکایت وزیراعلیٰ اگے کرے گا۔ راوی بڑا ای معتبر اے تے دسدا اے کہ نسیم صادق نے اپنے فون توں وزیراعلیٰ دا نمبر ڈائل کردیاں اوس رکن اسمبلی نوں آکھیا: شاید میاں صاحب تہاڈا نمبر نہ چُکن ایس لئی میں اپنے فون توں تہاڈی اوہناں نال گل کروا دینا آں۔ راوی ایہدے بعد چپ اے۔ اللہ مینوں بدگمانی توں بچاوے۔ ہن جے کسے نے نسیم صادق نوں آکھیا کہ اوہ ایہناں دی شکایت وزیراعلیٰ توں کرے گا تے ایس واری نسیم صادق عثمان بزدار نوں فون ملان دے بجائے ایس رکن اسمبلی توں کہے گا کہ ’’کہڑا وزیراعلیٰ؟‘‘
پہلاں ایہ مسئلہ سی کہ پنجاب حکومت دی بس دا ڈرائیور اناڑی سی سگوں اناڑی دا لفظ وی مناسب نہیں پر ڈرائیورنگ سیٹ تے کوئی بیٹھا نظر تے آندا سی۔ ہن بس دی ساریاں سواریاں تبدیل کرکے ڈرائیور نوں آخری سیٹ تے بٹھا دتا گیا اے تے دو چار ایچ ٹی وی ڈرائیونگ لائسنس یافتہ سواریاں نوں آکھیا گیا اے کہ ہن ایس بس نوں تسیں چلانا اے۔ آخری سیٹ والے ڈرائیور دی کوئی گل نہیں سننی تے بس نوں اپنی صوابدید تے تجربے دی بنیاد تے چلا کے منزل مقصود تک اپڑانا اے۔ یاد رہوے کہ ایس توں پہلاں ڈرائیور بھائی جان نے اختیارات دے استعمال دا ریکارڈ توڑیا ہویا سی۔ پچھلے اک ورھے توں پنجاب بھر وچ تبادلیاں تے پابندی سی۔ چپڑاسی تک دا تبادلہ وزیراعلیٰ دے حکم دے بغیر ممکن نہ سی تے ایس دوران جنے وی تبادلے ہوئے سب دے سب جناب عثمان بزدار دے صوابدیدی اختیارات دے تحت ہوئے۔ ایسے اختیار دے تحت ملتا ن دے تن کمشنر تبدیل ہوئے۔ تن تن مہینے وچ چار چار صوبائی سیکرٹری تبدیل ہوئے۔ ایہناں چار توں مراد تسیں ایہ نہ لے لینا کہ کل چار صوبائی سیکرٹری تبدل ہوئے سگوں اک اک محکمے دے سیکرٹری چار چار سگوں پنج پنج واری تبدیل ہوئے۔ ڈیرہ غازی خان دی ساری دی ساری انتظامی مشینری ایہناں دی مرضی تے منشا دے مطابق تبدیل ہوئی۔ شیخ عمر جہے نہایت ای عمدہ تے شاندار پلس افسر نوں آر پی او ڈیرہ غازی خان توں ہٹا کے واپس گھل دتا گیا کہ ایہدی موجودگی وچ موصوف نوں اپنے الٹے سدھے احکامات دی بجا آوری وچ مشکل پیش آ رہی سی تے ایس طرح کھل کھیڈن دا موقع نہیں مل رہیا سی جیویں اوہ چاہندے سن۔ سو شیخ عمر تے ایہناں ورگے دو چار لوکاں توں پہلی فرصت وچ نجات حاصل کیتی گئی تاں جے بقول حافظ برخوردار
سنجیاں ہو جان گلیاں
تے وچ مرزا یار پھرے
سو پہلے ڈیرہ غازی خان دیاں گلیاں ایس طرح سنجیاں کیتیاں گئیاں ۔ ہن ڈیرہ غازی خان دیاں گلیاں ایہناں دے حساب نال سنجیاں کر دتیاں گئیاں نیں۔ پچھلے والے چیف سیکرٹری کئی واری سگوں کافی واری ایہ درخواست کردے رہے کہ تبادلیاں دا اختیار اوہناں نوں دتا جاوے تاں جے اوہ اپنی مرضی دی ٹیم تشکیل دے کے نتائج حاصل کر سکن پر ٹیم وزیراعلیٰ صاحب دی مرضی دی ہوندی سی تے نتائج دی توقع چیف سیکرٹری توں کیتی جاندی سی۔ ساری ٹیم وزیراعلیٰ دی منتخب کیتی سی تے ایہدے نتائج دی ذمہ داری بے چارے چیف سیکرٹری دے موڈھیاں تے پا دتی گئی سی۔ پنجاب دی ساری بیورو کریسی دے سلیکٹر وزیراعلیٰ سن تے وزیراعلیٰ دا سلیکٹر وزیراعظم اے۔
ایہ پاکستان دی سیاست وچ اک محیر العقول واقعہ ہووے گا کہ وزیراعلیٰ موجود وی ہووے گا تے نہیں وی ہووے گا یعنی طبعی طور تے وزیراعلیٰ موجود ہووے گا پر عملی طور تے ناموجود ہووے گا۔ انگریزی وچ ایہنوں Disfunctionalآکھیا جا سکدا اے۔ ہن عمران خان نوں آپ وی شاید احساس ہو چکیا اے کہ وسیم اکرم پلس دی استعداد کار بس ایس قدر اے جنی پندرہ مہینے وچ ساہمنے آ چکی اے یعنی ایہناں وچ کم کرن دی صلاحیت سرے توں مفقود اے ایس لئی ایہناں نوں صرف اک پاسے بٹھایا جا سکدا اے تاں جے وزیراعلیٰ دی کرسی بھری ہوئی نظر آئے کیوں جے آئینی طور تے ایہ کرسی خالی نہیں رکھی جا سکدی ایس لئی ایہدے تے ساڈے پیارے عثمان بزدار موجود نیں پر ایہ صرف تے صرف عمران خان دی انا دا مسئلہ اے کہ ایہناں نوں گھر نہیں گھل رہے پر ہن عمران خان دی انا صرف ایہناں دی موجودگی تک باقی بچی اے نہیں تاں ہن جہڑا نواں سیٹ اپ ترتیب دتا گیا اے ایہدے وچ عثمان بزدار دا کدھرے کوئی ذکر نہیں تے نہ ای ایہناں دا کدھرے کوئی کم اے۔ بس اوہ ناں دی حد تک وزیراعلیٰ نیں تے جتھے کدھرے ایہناں دے دستخطاں دی لوڑ ہووے گی ایہناں توں کروا لئے جان گے۔ اللہ دے فضل نال ہن گورنر سرور ایہناں توں کدھرے ودھ بااختیار ہون گے، حالاں کہ گورنر دی جہڑی آئینی حیثیت اے اوہ سب دے ساہمنے اے۔ گورنر چودھری سرور دے حوالے نال کجھ دن پہلاں خبراں سن کہ عمران خان ایہناں توں خوش نہیں تے ایہناں نوں تبدیل کرنا چاہندے نیں پر ایہنوں اللہ دی مرضی دے علاوہ کیہ آکھیا جا سکدا اے کہ جہڑے بندے نوں خان صاحب ایہناں دے متبادل دے طور تے گورنر پنجاب لیا رہے سن اوہ اللہ تعالیٰ نوں پیارا ہو گیا۔
ایمانداری دی گل اے کہ پچھلے پندرہ مہینے دے دوران اک بندہ وی اجہیا نہیں ملیا جہڑا گارنٹی دے نال دس سکے کہ عثمان بزدار صاحب نوں پاکستان دے سب توں وڈے صوبے دا وزیراعلیٰ کہڑی بنیاد تے بنایا گیا۔ جدوں وجہ پتہ نہ ہووے تے فیر افواہواں پھیلدیاں نیں تے ایہ افواہواں ضعیف العتقادی توں لے کے جادو ٹونے تک پھیلی ہوئیاں نیں پر ایہناں ساریاں گلاں نوں چھڈو تہانوں اک گل دساں جہڑی میرے لئی بڑے فخر دی اے میرے دو سالہ چھوٹے نواسے تے سوا تن سالہ وڈے نواسے نے اک سوئمنگ کلب وچ تیراکی سکھن دا آغاز تقریباً اوہناں دناں کیتا سی جدوں عثمان بزدار نے گورنر ہاؤس لہور وچ تیراکی سکھن دا آغاز کیتا سی۔ الحمد للہ میرے دوواں نواسیاں نے ڈیڑھ مہینے وچ ایہ کم سکھ لیا سی جد کہ عثمان بزدار صاحب نے اک ورھے دی بھرویں کوششاں دے باوجود اجے ایہ مشکل مرحلہ طے نہیں کیتا جہڑابندہ اک ورھے وچ تیراکی نہ سکھ سکے اوہ سواسال وچ امورِ حکومت کیویں سکھ سکدا اے؟ سگوں اوہ ساری عمر لا کے وی ایہ وزنی پتھر نہیں چُک سکدا۔ اگے تہاڈی مرضی۔