کشمیر تے سنجیدگی نال پالیسی بنائو

لکھت:عتیق انور راجہ

پچھلے دیہاڑے وزیر خارجہ شاہ محمود قریشی نجی ٹی وی نال گل کردیاں ہوئیاں فرماندے سنیا گیا کہ پاکستان وچ سب نوں مذہبی آزادی حاصل اے۔ پاکستانی سرکار اقلیتاں دے حقوق لئی بہت کجھ کر رہی اے ایہدے تے کجھ لوک تے ایہ کہندے سنے گئے نیں کہ ساڈی اج سرکار دی ساری توجہ اقلیتاں دے حقوق ول ای لگی ہوئی اے۔ اقلیتاں دے حق ایہناں نوں ضرور دتے جانے نیں پر کلمہ دے ناں تے حاصل ملک وچ مسلماناں دے حقوق دی گل وی ایسے جذبے نال کرنی ہووے گی جہڑے جذبے نال ساڈے حکمران اقلیتاں دے اقدامات کر رہے نیں۔ شاہ محمود صاحب فرماندے نیں کہ مقبوضہ کشمیر دی صورتحال تے بھارت عوامی سطح تے بدنام ہو گیا اے۔ وزیر خارجہ دا ایہ بیان دسدا اے کہ اوہ کشمیر تے کیہ سوچ رکھدے نیں۔ ہن اوہ بھارت نوں برا بھلا کہہ دے یاں بددعاواں دے کے کشمیریاں دی مدد دا ارادہ رکھدے نیں۔
انج تاں تخت نشین ہون دے بعد اوہ اپنے بہت سارے وعدیاں توں یوٹرن لے چکے نیں پر اک یوٹرن تے دل بہت دکھی اے تے اوہ ایہہ کہ اوہناں نے کشمیریاں دے وکیل دا رول ادا کرنا وی بند کر دتا اے جہڑا لب و لہجہ اوہناں نے اج توں دو مہینے پہلاں اپنا یا سی اج اوہ ایس لب و لہجے توں یوٹرن لے چکے نیں۔ ایس یوٹرن دی بہت ساریاں وجوہات بیان کیتیاں جا سکدیاں نیں پر اک وڈی وجہ ایہ اے کہ ایہناں دے مشیر ایہدے نال مخلص نہیں آرہے۔ پچھلے دناں اداریاں دے وچکار جہڑی چومکھی لڑائی شروع چل رہی سی ایہدے پچھے وی ایہناں دے مشیراں دا بہت وڈا ہتھ اے۔ کدی خان صاحب کنٹینر تے کھلو کے دسدے سن کہ اوہناں کول دو سو اجہے لوکاں دی ٹیم اے جہڑے دناں وچ دیس دی قسمت بدل دین گے پر اج ایہناں نوں اقتدار حاصل کیتے ڈیڑھ سال ہو چکے نیں ایہناں دے دو سو بندیاں وچ دو بندے وی اجہے نظر نہیں آ رہے جہناں نوں واقعی حالات نوں ویکھ کے حکمت عملی اپنانی آئوندی ہووے۔ عمران خان کسے سٹیج تے اک اعلان کردے نیں ایہناں دی ٹیم دے ہونہار مشیر، وزیر کسے دوجے پلیٹ فارم تے کھڑے ایہدے خلاف بیان دے دیندے نیں۔ سانوں دسیا جا رہیا اے کہ کشمیر وچ حالات بدترین ہو چکے نیں، بھارتی فورسز طاقت دا استعمال کردیاں کشمیری نوجواناں نوں شہید کر رہیاں نیں۔ عورتاں دیاں عزتاں لٹیاں جا رہیاں نیں۔
پاکستانی حکومت اپنے اندرونی معاملیاں وچ الجھ کے کشمیریاں دے مسئلیاں نوں کنڈ پچھے سٹ چکی اے پر ایہناں حالات وچ اسلامی تعاون تنظیم دے انسانی حقوق کمیشن نے مطالبہ کیتا اے کہ بھارت مقبوضہ کشمیر وچ انسانی حقوق دیاں پامالیاں بند کرے تے کشمیریاں نوں اقوام متحدہ دیاں قرارداداں دے تحت حق خود ارادیت دتا جاوے۔ دفتر خارجہ نے دسیا کہ اسلامی تعاون تنظیم (اوآئی سی) دے انسانی حقوق کمیشن نے مسئلہ کشمیر تے اک واری فیر اپنا اصولی موقف دہراندیاں مطالبہ کیتا اے کہ بھارت مقبوضہ جموں و کشمیر وچ انسانی حقوق دیاں پامالیاں بند کرے تے کشمیریاں نوں اقوام متحدہ دیاں قرارداداں دے تحت حق خود ارادیت دتا جاوے۔ کمیشن نے دسیا اے کہ مقبوضہ جموں و کشمیر وچ کشمیریاں دی منظم نسل کشی تے قتل عام جاری اے تے بھارت دے 5اگست دے اقدامات غیر قنونی، غاصبانہ نیں، نہتے کشمیریاں تے پلیٹ گنز دے استعمال، گرفتاریاں تے ماورائے عدالت قتل دی مذمت کردیاں او آئی سی کمیشن نے اقوام متحدہ توں مطالبہ کیتا اے کہ انسانی حقوق کمشنر، اقوام متحدہ دے تحت کمیشن آف انکوائری تشکیل دیوے، بھارت دی کشمیر وچ انسانی حقوق دی بدترین پامالیاں دی تحقیقات کیتیاں جان، اقوام متحدہ، عالمی برادری بھارت تے مسئلہ کشمیر دے حل لئی اپنا دباء ودھاوے تے اپنا حقیقی کردار ادا کرے۔کجھ عرصہ پہلاں تک بھارت دے اندروں وی مودی سرکاری دے خلاف آوازاں اٹھ رہیاں سن تے مودی سرکار نوں بھارت سنے پوری دنیا وچ ہزیمت دا ساہمنا کرنا پے رہیا سی پر مولانا فضل الرحمان تے اپوزیشن دے آزادی مارچ نے کشمیر پالیسی نوں جھٹکا دتا تے پوری دنیا تے پاکستانی عوام دیا نظراں آزادی مارچ ول مبذول ہو گئیاں ایہدے توں مودی سرکاری تے بھارتی میڈیا نے خوب فائدہ چکیا۔ اوہنے آزادی مارچ نوں اچھالیا تے کشمیر کاز نوں شدید نقصان اپڑایا۔ ہن جد کہ آزادی مارچ سنے سارے معاملات ٹھیک ہو رہے نیں ، سرکار نوں اک واری فیر ساری کشمیری قیادت نوں اعتماد وچ لے کے اک واری فیر جاندار تے مضبوط کشمیر پالیسی اپنانی ہووے گی۔ چنگی سفارتکاری دے ذریعے اقوام متحدہ سنے پوری دنیا نوں بھارتی اقدامات تے سفاکانہ طرز عمل نوں اجاگر کرنا ہووے گا۔ سرکار تے اداریاں نوں اک واری فیر جارحانہ انداز نال مسئلہ کشمیر تے مضبوط موقف اپنانا ہووے گا۔ سکیورٹی کونسل تے جنرل اسمبلی دوواں نے ساڈی مدد توں ہتھ کھچ لئے۔ بھارت دی مذمت تک نہیں کیتی۔ سچ تے ایہ اے کہ جناب عمران خان صاحب دے مشیر اج وی ایہناں نوں دیس وچ عوامی مسئلیاں توں آگاہ نہیں کر پا رہے حل تے بعد وچ لبھیا جاندا اے۔ ہن بہت سارے مسئلیاں توں عوامی توجہ ہٹان دا سوکھا حل ایہ وی ہو سکتا اے کہ حکومتی ٹیم اک دھرنا کشمیر تے وی دیوے کہ عمران خان دے خیمے وچ اجہے لوک نیں جہڑے ایہناں دے فوج نال تعلق وگاڑن دی کوشش کر رہے نیں۔ فوج تے سرکار وچکار بداعتمادی نال نقصان صرف تے صرف دیس دا ہووے گا۔ دنیا وچ حساس معاملات بہت سوچ بچار دے حل کیتے جاندے نیں۔ چلو وقتی طور تے معاملات حل ہو چکے نیں۔ ہن خان صاحب دی خدمت وچ عرض اے کہ بھارت نوں برا بھلا کہن نال یاں بددعاواں دین نال اوہ کشمیریاں تے جاری جبر و ستم توں باز نہیں آوے گا۔ پاکستان سرکار نوں ایس ویلے فکری محاذ تے وی کم کرنا ہووے گا۔