خدمات تے قائمہ کمیٹی دا ایکشن

لکھت:حمیداللہ بھٹی

ٍٍسپین دے ساحلی شہر بارسلونا دے نجی ریسٹورنٹ وچ منعقدہ حمایتی اجلاس وچ دھواں دار تقریراں ہو رہیاں سن کوئی قونصلیٹ جنرل نوں فرشتہ سیرت کہہ رہیا سی تے کوئی پاکستانی تارکین وطن لئی مسیحا دا لقب دے رہیا سی پر راقم نوں سمجھن توں قاصر سی کہ معاملہ کیہ اے؟ کسے نے قونصلیٹ جنرل دی شان وچ گستاخی کیتی اے؟ یاں اوہناں نوں ڈرایا دھمکایا اے عمران علی چوہدری دی حمایت وچ شعلہ بیان مقررین دلائل دے رہے سن رات ڈھلدی جا رہی سی پر مقررین دے جوش و خروش وچ وادھا ہو رہیا سی حمایتی تقریب رکھن دی لوڑ کیوں پیش آئی؟ وضاحت نہیں ہو رہی سی مینوں وی بارسلونا وچ پاکستانی قونصل خانے وچ سی جی توں اک دو واری اوہناں دے دفتر وچ ملن دا موقع اتفاق ہویا اوہ ہر واری پرتپاک طریقے نال ملے جہڑی وی گل کیتی شائستگی نال دھیمے لہجے وچ جواب دتا اک واری پاکستانی کمیونٹی نوں درپیش مسئلیاں تے گل چلی تے کہن لگے پاکستانیاں دا وڈا مسئلہ سپورٹ اے قنونی طریقے نال جہڑے بیرون ملک نہیں آندے اوہناں کول سفری دستاویزات نہیں ہوندیاں جہدی وجہ توں اوہناں نوں رہائشی کاغذات بنوان وچ مشکل ہوندی اے کہن لگے میں اپنی حد تک سہولت دتی اے جہڑا وی پاکستانی ہون دا ثبوت پیش کردا اے اوہنوں عارضی پاسپورٹ جاری کر دینے آں تاں جے اوہ مقامی سطح تے اپنا اندراج کرا سکے اندراج نال صحت دی سہولت وی مل جاندی اے تے عارضی رہائش دے کاغذات بنوان دا مرحلہ شروع ہوجاندا اے اوہ قیدی ہم وطناں دی رہائی لئی وی متحرک رہندے نیں اوہناں نے قونصلیٹ نوں کمیونٹی دا مرکز بنا دتا اے جتھے شیر خوار بالاں نوں مناسب طریقے نال رکھن دی سہولت اے جہڑے بچے کھیڈنا چاہن قونصلیٹ وچ وکھرا حصہ مختص اے جد کہ سائلین دے مسئلے حل کرن دا پیچیدہ عمل وی آسان بنایا اے ہن ہر پاکستانی کسے وی ویلے سی جی نال براہ راست رابطہ کر سکدا اے، اوہ شکایت سن کے حل ہون تک دے سارے عمل دی نگرانی کردے نیں جے سائل دفتر آن توں قاصر ہووے تے قونصل جنرل آپ ملن چلے جاندے نیں تے مسئلہ حل کرا کے دم لیندے نیں طریقے و سلیقے نال کم کرن پاروں نہ صرف اوہ اپنے ہم وطناں وچ مقبول نیں تے سارے عزت و احترام دیندے نیں سگوں اوہناں نوں سپین دے حکومتی حلقیاں وچ وی پذیرائی حاصل اے فیر مسئلہ کیہ ہو گیا اے کیوں پاکستانی کمیونٹی اضطراب دا شکار اے؟
میرے لئی حیرانگی دی گل ایہ سی کہ حمایتی اجلاس وچ مسلم لیگ ن، مسلم لیگ ق، پیپلزپارٹی، تحریک انصاف سنے ہر جماعت دے عہدیدار شریک سن۔ کاروباری، سیاسی، مذہبی حتیٰ کہ سماجی شعبے دے معتبرین دی چوکھی تعداد نمایاں سی سب دا اک ای نقطے تے اتفاق سی کہ بارسلونا دے قونصل جنرل چنگے تے ایماندار بندے نیں جہناں نے پاکستانیاں دے مسئلے حل کران وچ کلیدی کردار ادا کیتا اے ایس لئی اوہناں نوں کسے دی ناپسندیدگی دی وجہ توں تبدیل کرنا ٹھیک نہیں میں کول بیٹھے اک صاحب توں پچھیا مسئلہ کیہ اے؟ کجھ مینوں وی تے آگاہ کیتا جاوے جہڑا بندہ ہر مکتبہ فکر وچ یکساں مقبول اے اوہنوں کون تبدیل کر رہیا اے؟ اودوں مینوں دسیا گیا کہ بیلجیم دے پرویز اقبول لوہسر نے مشاہد حسین سید دے ذریعے سینٹ دی قائمہ کمیٹی نوں درخواست گزاری اے کہ قونصلیٹ عمران علی چوہدری دا رویہ ٹھیک نہیں جہدے تے کاروائی کیتی جاوے قائمہ کمیٹی نے باز پرس لئی ایہ مسئلہ اجلاس دے ایجنڈے تے رکھ لیا اے جہدی وجہ تو پاکستانی کمیونٹی بہت مضطرب اے تے عمران علی چوہدری جہے بندے دے خلاف قرارداد پیش ہون تے رنجیدہ اے ایہ میرے لئی اک انکشاف توں گھٹ نہیں سی جدوں موجودہ قونصل جنرل نال بغیر کسے تعارف دے میری پہلی ملاقات ہوئی اودوں وی اوہناں دا رویہ دل جوئی کرن والا سی ایہ اوہ دن سی جدوں اوہ قونصلیٹ دے بوہے تے کھلو کے مسئلے سن رہے سن تے نال نال عملے نوں ہدایت دیندے جا رہے سن کہ مسئلہ کیویں حل کرنا اے جدوں ہجوم قدرے گھٹ ہویا تے میں وی علیک سلیک کیتی گلے لا کے پرتپاک طریقے نال ملے تے مسئلہ پچھیا: جناب میں آکھیا کوئی مسئلہ نہیں انج ای ملن لئی آگیا آں تے کہن لگے تہانوں کیوں جے کوئی مسئلہ درپیش نہیں ایس لئی مینوں ہم وطناں دیاں مشکلات سن لین دیو تاں جے کوئی مایوس نہ پرت جاوے فیر تہانوں چاء پیانا آں ایہ پہلا تاثر سی جہدی وجہ وں عمران علی چوہدری دیمیرے دل وچ عزت پیدا ہوئی نیں تاں وزارت خارجہ دے افسراں بارے میری رائے کدی چنگی نہیں رہی نک سک جہے تے بے زار جہے چہرے ویکھ ویکھ کے مینوں چڑ ہوندی اے پر عمران علی چوہدری نال مل کے ذہن وچ بنے امیج وچ پہلی واری شکست وریخت ہوئی بعدوں چاء پیاندیاں ہوئیاں کنی عاجزی تے شفقت دا مظاہرہ کیتا اوہ میرے تصورات توں قطعی وکھرا سی پر میں دل نوں تسلی دتی ممکن اے اج صاحب دا موڈ انج وی خوشگوار ہووے۔
قونصل جنرل نال دوجی ملاقات پاکستان وچ ہوئی اودوں وی افسرانہ نخوت محسوس نہ ہوئی فیر وی ذہن وچ بنے تصوراتی خاکا تبدیل نہ ہویا کہ ممکن اے اپنے دیس آ کے رویہ چنگا ہو گیا ہووے پر کجھ گھنٹیاں تے محیط ملاقات وچ راقم نے محسوس کیتا کہ عمران علی چوہدری روایتی بابو نہیں سگوں روایت شکن تے بااخلاق بندے نیں اوہ گلاں کردے نیں تے ملک دا درد صاف محسوس ہوندا اے اوہناں نوں ہم وطناں دیاں پریشانیاں دا پورا ادراک اے اوہ فرائض ادا کردیاں ہوئیاں اپنے آرام دی پرواہ وی نہیں کردے کیوں جے فرائض دی بجا آوری ثواب دی نیت نال کردے نیں سپین وچ تیجی ملاقات دے دوران اوہناں نے پہچان لیا تے آکھیا کہ اج وی تہانوں کوئی کم نہیں تے آؤ خلوص والی چاء پینے آں عملہ لنچ کرن گیا اے ایس لئی اجے فارغ آں گلاں دے دوران کشمیریاں دی حمایت لئی اپنی کوششاں دا ذکر کیتا تے آکھیا ہن قونصل خانے دا بوہا بند نہیں رہندا نہ ای کسے نوں مایوس جان دینے آں سگوں میں بیرونی بوہے تے کھلو کے مسئلے سنن دا سلسلہ جاری رکھیا ہویا اے غلط راہواں توں آن والیاں دی حوصلہ افزائی تے نہیں کر رہیا پر جہڑے راہواں دیاں مشکلات برداشت کرکے آجاندے نیں میری کوشش اے کہ اوہناں نوں ہور امتحان وچ نہ پایا جاوے اجہے مہربان بندے دے خلاف کاروائی توں پہلاں سینیٹ دی قائمہ کمیٹی تے مشاہد حسین سید نوں کجھ سُن گُن لے لینی چاہیدی اے جہدی حمایت وچ پوری پاکستانی کمیونٹی متحد اے حالاں جے اسیں تے جماعتاں دی تفریق دا بری طرح شکار آں پر عمران علی چوہدری نال تے خدمات دی بدولت سارے پیار کردے نیں کسے حاسد، مخالف یاں منافق دی خوشی تے نیک ناں تے فرض شناس افسر قربان کرنا انصاف نہیں ہم وطناں نال دشمنی اے سینٹ دی قائمہ کمیٹی نوں خدمات تے ایکشن لین دی بجائے فرض شناساں دی حوصلہ افزائی کرنی چاہیدی اے۔