پی آئی سی تے وکیلاں دی غنڈہ گردی

لکھت:حسنین نثار

اک نکی جہی ڈرپ زندگی تے موت دے وچکار استعمال کیتے جان والے آخری حربیاں وچوں اک اے تے ایہنوں 10-5 قطرے فی منٹ دے حساب نال لایا جاندا اے تے ڈاکٹر تے سینئر نرس دا سر تے کھلونا ضروری اے۔ انج دے 78 مریض سن ایمرجنسی وچ جہناں دا علاج جاری سی جدوں وکیلاں نے حملہ کیتا تے مریضاں دے وارثاں نے وی ڈاکٹراں نو ںنسن دا مشورہ دتا تے فیر دل دے ہسپتال وچ اوہ واقعہ ہویا جہدی مثال جنگ دے دیہاڑیاں وچ وی نہیں ملدی ایمرجنسی تے حملہ سی سی یو تے حملہ آئی سی یو تے حملہ تے دل دے اپریشن تک رکوا دتے گئے تے مریضاں دے آکسیجن ماسک لاہ دتے گئے۔ ڈاکٹر عرفان دی بچگانہ حرکت تے وکیلاں دی غنڈہ گردی دا نقصان صرف پی آئی سی ہسپتال تے اوتھے آئے مریضاں تے اوہناں دے وارثاں نوں ہویا۔
جدوں سینئر ڈاکٹراں دی سربراہی وچ سارے معاملے طے پا جان دا فیصلہ ہو چکیا سی تے ڈاکٹر عرفان نوں اپنے نان سیریس انداز تے قابو رکھنا چاہیدا سی۔ ویڈیو جہڑی سوشل میڈیا تے وائرل ہوئی ڈاکٹر عرفان ہسپتال دے احاطے وچ کھلو کے وکیلاں تے ڈاکٹراں دے وچکار پچھلے دیہاڑیاں ہون والی گل بات عملے تے دوجے ڈاکٹراں نوں دس رہے نیں جہدے وچ اوہناں دا دعویٰ سی کہ وکیلاں نے آکھیا کہ اسیں ڈاکٹراں نوں پی آئی سی دے اندر جا کے کجھ نہیں کر سکدے ایس ویڈیو وچ ڈاکٹر عرفان وکیلاں دیاں نقلاں وی لاہندا رہیا۔ جے وکیل ڈاکٹر عرفان دے کیتے دی سزا اوہناں نوں دیندے تے معاملہ ایناں نوں وگڑدا۔ حملہ کرن توں پہلاں اک واری وی دل وچ خیال نہیں آیا کہ کتھے حملہ کرن جا رہے آں پرجے دل ہوندا تے فیر ای سوچ آئوندی کے اوتھے دل دے مریض نیں۔
ایہ اوہ ہسپتال اے جتھے پیر رکھن دے بعد بندہ اُچا بولن توں وی گریز کردا اے کہ ایتھے دل دے مریض داخل نیں بدلہ پورا ہویا یاں نہ پر لوکاں دیاں نظراں وچ ایس کالے کوٹ دی پچھان صرف اک بدمعاش دی بن چکی اے۔ گن پوائنٹ تے دکاناں بند کروا کے راہیاں نوں مار کٹ کے راہ بند کروا کے اک پڑھے لکھے بدمعاش ہون دا چنگا تاثر دتا اے۔ لہور دے وکیلاں دے خلاف پرانی ویڈیو فیر وائرل ہون تے لہور ڈسٹرکٹ بار ایسوسی ایشن دے سینکڑوں وکیل سراپا احتجاج بن گئے تے اوہناں نے پنجاب انسٹیٹیوٹ آف کارڈیالوجی دے ینگ ڈاکٹراں تے پیرا میڈیکس دے خلاف احتجاج کردے ہوئے ہسپتال تے دھاوا بول دتا۔ ایس موقعے تے سینکڑوں وکیل ہسپتال دا مرکزی بوہا بھن کے اندر وڑ گئے۔ ایس صورتحال پاروں علاج معالجے دے سلسلے وچ آئے ہوئے مریض ہسپتال وچ قید ہو کے رہ گئے۔ ایس ہنگامی ارائی دوران پولیس دی چوکھی نفری وی موجود سی پر اہلکار وکیلاں تے قابو پان وچ نکام رہے۔ بھوترے وکیلاں نے ہنگامہ ارائی کردے ہوئے ہسپتال دی عمارت تے گڈیاں دے شیشے وی بھن دتے۔ ایہ سلسلہ جاری سی کہ ڈی آئی جی اپریشنز رائے بابر ہسپتال اپڑے جہناں دے حکم تے ہسپتال وچ موجود پولیس دی بھاری نفری نے احتجاجی وکیلاں تے لاٹھی چارج کر دتا تے اتھرو گیس دا بھرواں استعمال کیتا۔ پولیس کاروائی دے جواب وچ وکیلاں نے ہسپتال دے اندر پتھرائو شروع کر دتا تے پولیس دی اک گڈی نوں اگ لا دتی۔ وکیل پولیس ولوں لائیاں جان والیاں ساریاں رکاوٹاں ہٹا کے ہسپتال وچ وڑ گئے تے ڈاکٹراں دے خلاف نعرے بازی کردے ہوئے ہسپتال دے اندر احاطہ وچ دھرنا دے دتا تے جیل روڈ تے ٹریفک بند کر دتی۔
ڈاکٹر عرفان ولوں وکیلاں دے خلاف سوشل میڈیا تے ویڈیو وائرل ہون دیاں اطلاعواں ملدے ای ماتحت عدالتاں دے وکیل بھوتر گئے۔ اوہناں نے ایوان عدل توں پی آئی سی تک پیدل احتجاجی ریلی کڈھی جہدے وچ خواتین وکیلاں دی وڈی گنتی وی شامل سی۔ وکیلاں نے ہتھاں وچ بینرز تے پلے کارڈ وی چکے ہوئے سن جہناں تے ڈاکٹراں دے خلاف وکھووکھ نعرے لکھے سن۔ وکیلاں تے ڈاکٹراں وچکار لڑائی وچ شدت آن نال مریضاں دے نال نال شہریاں نوں وی ڈاڈھیاں اوکڑاں دا سامنا کرنا پیا۔ ہسپتال دے اندر موجود اک سرکاری اہلکار نے ناں نہ دسن دی شرط تے دسیا کہ وکیل وکھووکھ راہواں توں ہسپتال وچ وڑے تے اوہناں نے پہلی منزل تے موجود ایمرجنسی‘ آئی سی یو تے سی سی یو سنے وکھووکھ تھاواں تے توڑ بھن کیتی تے مریضاں دے وارثاں نال ہاتھا پائی وی کیتی۔
لڑائی دن ساڑھے یاراں وجے شروع ہوئی اوس ویلے ہسپتال وچ کجھ مریض رہ گئے نیں نہ ڈاکٹر نیں تے نہ ای پیرامیڈیکل سٹاف‘ وارثاں نے اپنے مریضاں نوں اپنی مدد آپ دے تحت ہسپتال توں منتقل کیتا اے۔ احتجاج کردے وکیلاں نے جی پی او چوک بند کر دتا جد کہ آل دوالے دے علاقیاں وچ وی ٹریفک جام ہو گئی۔ پولیس نے جیل روڈ تے مال روڈ نوں وی بند کر دتا۔ ایس ہنگامہ ارائی وچ موقعے تے کوریج کرن والے صحافیاں نوں وی زخمی کیتا گیا تے کئی صحافیاں دے موبائل فون وی بھن دتے۔ پنجاب دے وزیر اطلاعات فیاض الحسن چوہان وی موقعے تے موجود سن۔ اوہناں نے میڈیا نال گل بات وچ الزام لایا کہ وکیلاں نے اوہناں نے اغوا کرن دی کوشش کیتی۔ مقامی ذرائع ابلاغ تے نشر کیتی جان والی فوٹیج وچ ویکھیا جا سکدا اے کہ وکیلاں دا اک گروہ فیاض الحسن چوہان نوں دھکے مار رہیا اے۔ پی آئی سی توں باہر آن والے ڈاکٹراں نوں وی ماریا کٹیا گیا تے پولیس دے ایس ایچ او بابر وی زخمی ہوئے۔ بعد وچ وکیلاں دیاں ٹولیاں تے وی حملے کیتے گئے اک لیڈی وکیل نے دسیا کہ 36وکیلاں دے سر پاٹے نیں تے لوہے دے راڈ نال خاتون وکیل نوں ماریا گیا۔
وزیراعلیٰ عثمان بزدار نوں بریفنگ دوران دسیا گیا کہ ہنگامہ ارائی وچ ملوث 34وکیلاں نوں پھڑ لیا گیا ے تے شہر وچ رینجر نوں سد لیا گیا اے۔ وزیراعلیٰ نے ہدایت کیتی کہ سی سی ٹی وی کیمریاں دی مدد نال ہسپتال وچ ہنگامہ ارائی تے تشدد دے ذمے واراں دی نشاندہی کیتی جاوے تے ذمے واراں دے خلاف قنون دے تحت مقدمے درج کیتے جان گے۔ پریس کانفرنس وچ وزیر قنون راجہ بشارت نے دسیا کہ وزیراعلیٰ نے حکم دتا اے کہ ایس واقعے دی انکوائری دو محکمیاں وچ کیتی جاوے گی تے ڈاکٹر تے مریضاں دیاں گڈیاں دے نقصان دا ازالہ کراں گے۔ اوہناں دسیا کہ میڈیا دی وجہ نال وکیلاں دی نشاندہی ہوئی اے جو ایس معاملے وچ شامل سن اوہناں خلاف سخت کاروائی کیتی جاوے گی۔ پی آئی سی دے منظر پورے ملک وچ وکیلاں دی ساکھ خراب کرن گے۔