فیاض الحسن چوہان نے نواں محاذ کھول دتا

لکھت:محمد اکرم چوہدری

صوبائی وزیر اطلاعات فیاض الحسن چوہان دا کہنا اے تحریک انصاف نوں اسمبلیاں وچ واضح اکثریت حاصل نہیں اے ایس لئی سرائیکی صوبے دا قیام ممکن نہیں اے۔
9مئی 2018ء نوں سربراہ پاکستان تحریک انصاف عمران خان تے جنوبی پنجاب محاذ دے نمائندے دے طور تے خسرو بختیار نے اک معاہدے تے دستخط کیتے سن۔ ایس معاہدے دے بعد جنوبی پنجاب محاذ نامی جماعت پاکستان تحریک انصاف وچ ضم ہو گئی سی۔ جنوبی پنجاب صوبے دا قیا م حکمران جماعت دے منشور دا حصہ اے۔ معاہدہ طے پایا سی کہ حکومت وچ آن دے بعد پاکستان تحریک انصاف جنوبی پنجاب علاقیاں تے مشتمل وکھرا صوبہ بنان دی پابند ہووے گی۔ تحریک انصاف نے حکومت بنان دے بعد جنوبی پنجاب سیکرٹریٹ قائم وی کیتا سی پر ہن فیاض الحسن چوہان دے بیان مگروں نہ سیکرٹریٹ رہوے گا نہ وکھرے صوبے دی تحریک رہوے گی، نہ عوام نوں لوڑ رہوے گی نہ ایس صوبے دے ناں تے سیاست ہو سکے گی۔ مئی 2012وچ وی پنجاب اسمبلی وچ صوبہ بہاولپور تے جنوبی پنجاب دے قیام دے حوالے نال متفقہ قرارداداں منظور ہو چکیاں نیں جد کہ میاں نوازشریف دی مسلم لیگ ایس حوالے نال وکھری قرارداد وی پیش کر چکی اے۔
ایس پس منظر دے بعد ایہ کہنا مشکل نہیں اے کہ وکھرے صوبے دے قیام تے وکھرے صوبے دے ناں تے جنوبی پنجاب وچ رہن والے اک عرصے توں بیوقوف بن رہے نیں۔ ایہ سلسلہ اج وی جاری اے۔ پاکستان تحریک انصاف توں ایس حوالے نال بہت امیداں سن جہڑی سپرٹ دے نال ایہ کم شروع ہویا سی توقع سی کہ جنوبی پنجاب دے عوام دا دیرینہ مطالبہ پورا ہو جاوے گا تے محروم بندیاں نوں اگے ودھن تے ترقی کرن دے یکساں مواقع ملن گے پر افسوس دینال کہنا پیندا اے کہ پی ٹی آئی دی حکومت نے وی ماضی دیاں حکومتاں وانگوں جنوبی پنجاب دے عوام دے نال کیتا گیا وعدہ بھلا دتا اے۔
صوبائی وزیر دے ایس بیان نے اک نواں محاذ کھول دتا اے۔ چونکہ اوہ صوبائی حکومت دے وزیر اطلاعات نیں۔ ایس لئی آکھیا جا سکدا اے کہ ایہ ایہناں دی ذاتی رائے، خیال یاں سوچ نہیں اے ایہنوں حکومت دی پالیسی ای سمجھیا جاوے گا۔ انج فیاض الحسن چوہان دے بعد جنوبی پنجاب دے عوام اک واری فیر اپنے بنیادی حق توں محروم ہو گئے نیں۔ ایس بیان دے بعد اک واری فیر پاکستان دے عوام ایہ سوچن تے ضرور مجبور ہوئے نیں کہ انتخابی وعدے کیوں پورے نہیں ہوندے تے کہڑی اجہی حکومت ہووے گی جہڑی انتخابی وعدیاں تے قائم رہوے گی تے حکومت وچ آن دے بعد عوام نال کیتے وعدیاں تے کھڑی رہوے گی۔ سیاستداناں دی وعدہ خلافیاں تے کئی کتاباں لکھیاںجا سکدیاں نیں۔ بدقسمتی اے کہ ایہدے باوجود اوہ ہر دور وچ عوام دی سادگی تے مجبوری دا فائدہ چُکن وچ کامیاب رہندے نیں۔ عوام وعدیاں دی تکمیل نہ ہون دے باوجود بار بار ایہناں لوکاں تے اعتماد کرکے اپنا مستقبل ایہناں دی ہتھ وچ دیندے نیں جہڑے ماضی وچ وی وعدہ خلافی کرچکے ہوندے نیں۔ ایہ کسے اک صوبے، کسے اک اسمبلی تے اک حلقے دا مسئلہ نہیں اے۔ ساریاں اسمبلیاں وچ بیٹھے سیاستداناں دی اکثریت دا ایہو مسئلہ اے۔ عوام نال وعدے نبھائے نہیں جاندے، سیاستدان اپنے کماں وچ لگے رہندے نیں تے سیاستدان اپنے نکے نکے فائدیاں لئی عوام نوں استعمال کردے رہے نیں۔ ایہو وجہ اے کہ اسیں اج تک چنگا سیاسی ماحول قائم نہیں کر سکے، ایہو وجہ اے کہ اج تک ووٹراں نوں اپنے ووٹ دی اہمیت دا علم نہیں ہو سکیا۔ عوام نوں اپنے ووٹ دی اہمیت دا علم نہیں اے تے سیاستدان اج تک ایہناں نوں ووٹ دی اہمیت دا احساس کران وچ نکام رہے نیں۔ ووٹ دی اہمیت صرف اک سرمایہ دار، صنعتکار، جاگیردار یاں حکمرانی دا شوق رکھن والے کسے وی بندے نوں اسمبلی وچ گھلن تک دی اے۔ جہڑے ووٹ پاندے نیں اوہناں نوں ایہ سمجھ نہیں آ سکی کہ اک ووٹ اک عام انسان نوں خاص بنا دیندا اے۔ فیر اوہ جو چاہوے کرے، نہ کوئی روکن والا اے نہ کوئی پچھن والا تے ایہو ساڈی سیاسی تریخ دا المیہ اے۔
فیاض الحسن چوہان دا بیان پڑھن دے بعد اسیں ایہ سوچ رہے آں کہ آخر کدوں تک عوام دے نال دھوکہ ہوندا رہوے گا۔ جنوبی پنجاب دے کروڑاں عوام اپنے سیاسی قائدین نوں لبھ رہے ہون گے تے ایہ گانا وی سن رہے ہون گے کیا ہوا تیرا وعدہ وہ قسم وہ ارادہ، یاں فیر کہندے ہون گے واجاںماریاں تے بلایا کئی وار میں کسے نے میرے گل نہ سنی۔ جنوبی پنجاب دے عوام لبھ رہے ہون گے اپنے محبوب قائدین نوں جہناں نے اپنی عوام توں ووٹ ای ایسے ناں تے لئے سن۔
سیاست دا حسن تے انفرادیت ایہو اے کہ مشکل نظر آن والے کماں تے مسئلیاں نوں گل بات دے ذریعے حل کیتا جاندا اے۔ مخالفاں نوں قائل کیتا جاندا اے تے عوام مسئلیاں دا حل کڈھن لئی طویل نشستاں کیتیاں جاندیاں نیں۔ سیاسی لوکاں دی خوبی ای مسئلیاں دا حل کڈھنا اے۔ ماضی وچ وی پنجاب اسمبلی وچ ایس حوالے نال کم ہویا اے تے فیر ترجیحات دے تعین وچ رکاوٹ کیہ اے۔ کدھرے انج تے نہیں کہ ایس حوالے نال بامقصد گل بات ای نہیں کیتی گئی۔ اقتدار حاصل کرن دے بعد ایس منصوبے نوں اہمیت نہیں دتی گئی۔ وزارتاں وصول کرن دے بعد اوہ جماعت جہدے قیام دا مقصد ای وکھرے صوبے دا قیام سی، وزارتاں لین دے بعد مقصد بدل دتا گیا اے۔ کجھ وی ہووے ایہ اک عمل اے جہدے بعد توں عوام دا اپنے قائدین توں اعتماد گھٹ ہونا چاہیدا اے۔ انتخابی وعدیاں نوں عملی جامہ پوائے بغیر ووٹر تے سیاستدان وچکار چنگا سیاسی تعلق قائم نہیں ہو سکدا۔ اجہے فیصلے سیاسی روایتاں تے سیاسی حکومتاں لئی چنگے نہیں ہوندے۔ ایس اعلان دے بعد جنوبی پنجاب دے عوام نوں وی سوچنا ہووے گا کہ اوہناں نے مستقبل وچ اپنے سیاسی قائدین دے نال کیسا برتاؤ کرنا اے تے ایہناں دا استقبال کیویں کرنا اے۔