سب پھڑے جان گے

لکھت:ایثار رانا

میں حیران آں بوٹا گالھاں کیوں کڈھدا اے، بوٹا ایل ایل بی اے نہ ایم بی بی ایس اوہ وزیر اے نہ مشیر۔ اوہ تے بس 20کروڑ فقیراں وچوں اک فقیر اے جہناں دے نصیب وچ اپنے چہریاں توں آکسیجن ماسک لہندیاں تے ہچکیاں لیندے لیندے مر جانا ہوندا اے۔ حیران آں ایس ہمت تے نفرت اُتے اسیں تے جہدی امت وچوں آں اوہ فرماندے نیں کہ حالت جنگ وچ ہسپتال تے دور درختا ں نوں وی نقصان نہ اپڑے۔ لگدا اے اسیں رٹو طوطے بن کے رہ گئے آں۔ کلمہ وی پڑھنے آں نمازاں وی۔ پر بس رٹو طوطیاں وانگوں، انج نہیں کہ وکلاء سارے ای اکو جہے نیں۔ میں ذاتی طور تے کردار والے خوف خدا رکھن والے وکیلاں نوں جاننا آں۔ اعتزاز احسن توں لے کے فاروق امجد میر تک اک لمی فہرست اے نیک باکردار وکیلاں دی۔ چیف جسٹس جناب باقر علی نجفی ٹھیک فرماندے نیں کہ پتہ نہیں کتھوں ایہ کالیاں بھیڈاں آ گئیاں۔ تھوڑی بہت ہون تے کم چل جاندا اے ہن تے لگدا اے کہ بس چاراں پاسے بھیڈاں ای بھیڈاں نیں یاں بھیڑیئے۔ انسان تے خال خال رہ گئے، اللہ بخشے ساڈے سابق جسٹس افتخار چودھری نوں اوہ پوری قوم نوں اک اکھ نال ویکھدے سن۔ تے اسیں اوہناں دی ایس ادا تے دندیاں وڈھدے سی پر سانوں کیہ پتہ سی ڈاہڈا بھیڑا عشق دا روگ، افتخار چودھری دی تحریک نے وکیلاں تے قوم نوں رول سٹیا، وکلاء اینگری ینگ مین بن گئے ڈاکٹر توں تو گئیوں۔ اج تیرا آپریشن اے، اسٹنٹ پین گے سنڈیاں دی لڑائی وچ ہمیشہ گھاہ رل جاندی اے۔ ایس لڑائی وچ وی تن زندگیاں گھاہ دے تیلیاں وانگوں رل گئیاں۔ ایہناں دے لواحقین ہمیشہ اپنے بالاں نوں دسن گے کہ ملک دے تعلیم یافتہ ترین طبقے دی عظمت بھری جنگ وچ مارے گئے سن۔ اوس دن تے ہر وکیل باہو بلی لگ رہیا سی۔ واہ کیہ گینگ وار سی۔
ٹیچر نے آکھیا جیسے کو تیسا دا کیہ مطلب، اپنے سردار سنتا سنگھ بولے اک واری اسیں اپنی خالہ نوں ملن گئے اوہ گھر توں باہر سن تالہ لگا سی، اک واری اوہ سانوں ملن آئیاں تے اسیں گھر نوں تالہ لا کے پتلی گلی توں نکل گئے۔ جوڑ برابر دا سی ایہدے وچ ڈاکٹر وی ڈنڈیاں نال لیس سن۔ تے فیر پی آئی سی دے نال اوہی ہویا جو سرکار تے اپوزیشن رل کے عوام نال کردی اے۔ کتھے نیں وکیلاں کالجاں دے اساتذہ، کتھے نیں میڈیکل کالجاں دے اساتذہ۔ کوئی ایہناں توں پچھے کیہ ایہو ایہناں دی تعلیم اے کیہ ایہو ایہناں دی تربیت اے۔ ٹیچر نے پچھیا بنتا سنگھ تہاڈے پاپا کیہ کردے نیں اوہ کہن لگا جو ممی کہندی اے۔ اوہ بھائی میرے کل دے مستقبل دے نوجوان وکیلو، ڈاکٹرو تسیں وی کسے دا کہنا من دے او؟ افسوس ایہ دیس ہولی ہولی جنگل توں بدتر ہوندا جا رہیا اے۔ جنگل دا وی اک قنون اک قاعدہ ہوندا اے۔ اوتھے وی طاقتور تے کمزور وچ اک توازن قائم رہندا اے۔ ایس نوجوان نسل توں کیہ گلہ۔ ایتھے ’’جہنوں بھنواوہو لال‘‘ اے۔ عالم کفر دے فتویٰ نفرت دیاں کتاباں وچ بھر کے دیندا اے۔ راہنما اوئے توئے توں باہر نہیں نکلدا تے دانشور بیچارہ ہمیشہ دولت دی تھاپ تے تاتاتھیا کردا اے۔ استاد اجہے ایل ایل بی، ایم بی بی ایس پیدا کردا اے۔ انصاف طاقتور نوں انسانی بنیاداں تے ’’وے سب توں سوہنیا، ہائے وے من ہوہنیا‘‘ گاندا پھردا اے۔ مینوں ایس لئی بابا بوٹا برا لگدا اے کہ اوہ صرف گالھاں کڈھدا اے۔ ڈرو اوس دن توں جدوں اوہنے ایہناں طاقتور بدمست غولاں وانگوں ڈنڈا سوٹا چک لیا۔ اجہے بدبودار نظام دے مکروہ چہریاں تے نرم تھاواں تے اجہی چھترول ہووے گی۔ ایہو جہے ’’گومڑ‘‘ پین گے، ایہو جہے آلو پین گے کہ اوہ منہ سٹیکر ورگا ہو جاوے گا۔ سٹیکر وی ڈوریمون والا۔ اک سوٹڈ بوٹڈ بندا ادھا کالا ادھا چٹا کوٹ پائے ماہر نفسیات سردار پروفیسر بنتا سنگھ دے کول آیا تے بولیا ڈاکٹر صاحب مینوں احساس کمتری اے میں اپنے آپ نوں گھٹیا محسوس کرنا آں، سنتا سنگھ نے مریض دی دو گھنٹہ تحلیل نفسی کیتی۔ نوٹس لئے، آخر وچ اوہ بولیا بھائی گل ایہ اے کہ تہانوں کوئی احساس کمتری نہیں۔ تسیں ہو ای گھٹیا تے چول۔ پچھلے 72ورھیاں توں اسیں چپ کرکے ایہناں برتری دے زعم وچ گم احساس کمتری دے مارے مسخرے نوں ویکھ رہے آں۔ گو اسیں زبان توں نہیں کہندے پر ایہ ضرور سوچدے آں کہ تسیں ہو ای چول۔
بنتا سنگھ اپنی بندوق تھامے گھر وچ ٹہل رہیا سی، بیگم بولیاں کدھر جا رہے او اوہ بولیا شیر دا شکار کرن۔ بیگم بولی تے جا کیوں نہیں رہے، کہن لگا باہر کتا کھڑا اے، ایس توں ڈر لگدا اے کدھرے اے پے ای جاوے۔‘‘ چلو ساڈی خیر اے آئی جی پلس دے آفس دی حفاظت دی ذمہ داری وی رینجرز نو مل گئی اے۔ ساڈی حفاظت تے گئی تیل لین، پلس افسراں دی رینجرز حفاظت کر لین تے ایہ وی قن دا پوری قوم تے احسان ہووے گا۔ مینوں ڈر اے ایہ نفرت، ایہ بدلے، ایہ مخالف نوں کچلن دی اگ کدھرے سب کجھ نہ ساڑ دیوے۔ سابق وزیراعظم نوازشریف دے لندن وچ غریب خان تے مظاہرے تے ہن حملے توں ایہ گل ثابت ہو گئی کہ پاکستان جتھے وی ہووے مستقل مزاج ہوندا اے، برطانیہ امریکا ایہناں دا کجھ نہیں وگاڑ سکدا۔ ایہ چاہوے پی ایچ ڈی کر لین پر رہندے انڈر میٹر ک ای نیں۔ بھیا میرے ایہناں دے غریب خانے تے حملے نال کیہ ہووے گا؟ شیشے دے گھر وچ بیٹھ کے دوجیاں دے گھراں تے وٹے مارن والے سن لین ایہناں تے وی ایہ ویلا آوے گا۔ جیویں شیخو تے ٹرین سفر دے دوران گندے انڈے آئے نیں۔ جدوں تسیں کسے نوں چک وڈھو تے اوہ وی تھوڑی بہت دندی وڈھے گا ای۔ سردار بنتا اپنے دوست سنتا سنگھ دے گھر گئے بیل دی اندر توں آواز آئی کون؟ بنتا سنگھ غصے نال بولے اچھا ہن اسیں کون ہو گئے۔ پر مینوں لگدا اے کہ ایہ 20کروڑ کلبلاندے ہوئے عوا م نما کیڑے زیادہ عرصہ کون کون نہیں کہن گے۔ اوہ بار بار رونگ کال دین والے نوں گریبان توں پھڑن گے فیر انھے واہ جو ہووے گا۔ ایہدا اللہ نے وی وعدہ کیتا اے۔ ایہناں جنونیاں دے تخت گریں تے تاج وی اچھلن گے بس تھوڑا تے انتظار کر لین…سب پھڑے جان گے سارے پھڑے جان گے۔