سیاسی شکاری تے کھڈاری دا شکار کون؟

لکھت:شاہد ندیم احمد

تحریک انصاف دے قائد عمران خان میاں برادران دے بیرون ملک جان دے بعد وی بضد نیں کہ سرکار کرپٹ لوکاں نال کسے قسم دی ڈیل نہیں کرے گی جد کہ مولانا فضل الرحمان اپنے آزادی مارچ دی کامیابی دے جھنڈے گڈدے ہوئے پیش گوئی کر رہے نیں کہ سرکار اک مہینے بعد جان والی اے۔ سرکار دے دور تک جان دے آثار نظر نہیں آ رہے ، کیوں جے مقتدر قوتاں اک پیج تے ہون دی وجہ توں اپوزیشن بے بس نظر آندی اے۔ ایہدے باوجود میاں برادران دے بیرون ملک روانگی دے بعد آصف زرداری تے دوجے سیاسی قائدین دی ضمانتاں عوام نوں سوچن تے مجبور کر رہیاں نیں کہ پس پردہ کجھ نہ کجھ اجہی ہل چل ضرور اے جو ہواواں دے رخ بدلن دا پتہ دیندیاں نیں۔
پاکستان سیاست دا لمحہ رہیا اے کہ حکمران اقتدار وچ صحت مند تے اپوزیشن وچ بیمار ہو جاندے نیں، میاں برادران دا بیماری تے ریلیف لین دے بعد آصف زرداری نے وی طبی بنیاداں تے ضمانت منظور کروا لئی اے، آصف زرداری شوگر‘ دل تے کمر دے امراض وچ مبتلا نیں، پر فاضل عدالت نے ضمانت منظور کردیاں ہوئیاں اپنے حکم وچ جہڑی صلاح دتی، اہمیت رکھدی اے۔ فاضل عدالت دے مطابق آصف زردری نوں سزا نہیں ہوئی، اوہ زیر تفتیش تے حراست وچ نیں، ایہدے تے اوہناں دی طبی رپورٹ توں ظاہر ہویا کہ اوہ بیمار نیں، ایہناں دا علاج سرکاری طور تے عوامی خزانے توں ہو رہیا اے، اوہ ضمانت تے ہون گے تے اپنے خرچ تے اپنے مرض دا علاج کرا سکن گے۔ فاضل عدالت نے اپنے فیصلے وچ جو تحریر کیتا اوہ چشم کشا اے کہ نیب دے موجودہ قنون وچ ضمانت دا تصور نہیں، نیب نوں 90دن تک ریمانڈ دا اختیار اے، پر احتساب عدالت نوں ضمانت لین دا نہیں، نیب ملزمان ایس لئی عدالت عالیہ نال ای رجوع کردے نیں۔ آصف زرداری توں پہلاں وزیراعظم نوازشریف نوں وی ہائی کورٹ توں ای ضمانت ملی تے اوہ علاج لئی لندن گئے پر اسلام آباد ہائی کورٹ دی فاضل بنچ دے فیصلے دی روشنی وچ قومی اسمبلی دی ایس قائمہ کمیٹی نوں غور کرنا ہووے گا جہدے کول نیب دا ترمیمی صدارتی آرڈیننس غور لئی گھلیا گیا تے جہنوں سفارشات دے نال واپس قومی اسمبلی وچ آنا اے، چنگا ہووے گا کہ منتخب نمائندے جہڑے نیب دے قنون تے عمل دی وجہ توں اعتراض تے تنقید کردے رہندے نیں ، اوہ اپنی توانائی نویں ترمیمی آرڈیننس دی درستگی تے خرچ کرکے تے ایہنوں ودھ توں ودھ منصفانہ تے شفاف بنا لین گے۔
ایس حقیقت توں انکار نہیں کیتا جا سکدا کہ نیب نوں ہر دور اقتدار وچ انتقامی سیاست لئی استعمال کیتا جاندا رہیا اے، اج وی ناقص تفتیشی عمل دی وجہ توں کمزور کیس تنقید دا باعث بن رہے نیں۔ بظاہر احتسابی عمل توں کسے نوں انکار نہیں، اعتراض ایہ ہوندا اے کہ قنون بہتر تے احتساب بلاامتیاز ہونا چاہیدا اے، پر پہلے گرفتاریاں تے بعدوں ضمانتاں دیندیاں ہوئیاں عدلیہ دے نیب کارکردگی تے ریمارکس غور طلب نیں۔ نیب دے کمزور مقدمات سرکار لئی وی شرمندگی دی وجہ بن رہے نیں کیوں جے جدوں نیب ولوں نامزد کیتے کرپٹ عناصر نوں عدلیہ توں ریلیف ملدا اے تے عوام وچ ڈیل تے ڈھیل دا تاثر ابھرن لگدا اے۔ مسلم لیگ (ن) تے پیپلزپارٹی دی قیادت دی بیماری توں انکار نہیں کیتا جا سکدا پر رہائی دے بعد ایہناں دی صحت وچ بہتری دے نال سرکار نوں للکارنا ناقابل فہم اے۔ اک پاسے بیماری تے ریلیف لین دے بعد لندن وچ میاں شہباز شریف حکومت نوں ایوان وچ ڈیگن دی پلاننگ کر رہے نیں جد کہ دوجے پاسے بلاول بھٹو زرداری دا کہنا اے کہ آصف زرداری شکار ی اے، اوہ ہن کھڈاری دے شکار لئی نکے گا، سرکار دا آخری سال اے، نیب تے سرکار دا گٹھ جوڑ سانوں روک نہیں سکے گا۔ ایس موقع تے جدوں ایہناں دے پیو دی ضمانت صحت دی بنیاد تے ہوئی تے ایہناں تے مقدمات بدستور موجود نیں جد کہ سرکارولوں ضمانت دی مخالفت نہیں کیتی گئی، بلاول ولوں اجہی دھمکی آمیز بیان بازی بے جا تے نامناسب اے جہدے نال سیاسی کشیدگی دی فضا ہور خراب ہو سکدی اے۔
بلاشبہ ملک دی سیاسی فضا نوں بہتر رکھنا سرکار تے اپوزیشن دے اپنے ہتھ وچ اے، پر دوواں پاسیوں سنجیدہ رویے دا فقدان نظر آندا اے۔ حکومت چور لٹیریاں نوں منطقی انجام تک اپڑان دی دعویدار اے تے ڈیل ڈھیل دین توں انکار اے، جد کہ شریف برادران ملک توں باہر علاج لئی چلے گئے یں ایہناں دے کجھ حمایتی اخباری بیانات تے پریس کانفرنساں دے راہیں پارٹی نوں زندہ رکھن وچ کوشاں نیں۔ مریم نواز نے پیو تے چاچے دی ہجرت دے بعد چپ رہندیاں ہوئیاں ملک توں باہر کجھ عرصہ گزارن لئی عدلیہ نال رجوع کیتا اے، آس اے جلد مریم نواز نوں وی اجازت مل جاوے گی تے اوہ ویلا ضائع کیتے بغیر اپنے بزرگاں دے قافلے نال لندن وچ جا ملن گے، دوجی پیپلزپارٹی دا حال وی کجھ چنگا نہیں اے، پنجاب سنے دوجے دو صوبیاں وچ پارٹی دا شیرازہ بکھر چکیا اے، پر سندھ وچ زبان تے قومیت دے حوالے نال اجے تک سروائیو کر رہی اے پر جے مسلم لیگ (ن) غیر فعال ہو جاندی اے تے کلی پیپلزپارٹی لئی اپنے آپ نوں زندہ رکھنا مشکل ہو جاوے گا۔ جیلاں دے لمے لمے چلے کٹن والے آصف زرداری جیل وچ بڑی حد تک خاموشی دی زندگی گزاردے رہے نیں، ہن اوہ اسلام آباد ہائی کورٹ توں ضمانت تے رہا ہو گئے نیں، پر بلاول ، عمران خان اُتے سلیکٹڈ دے الزامی بیانات دے نال اپنی سیاسی زندگی دی گڈی کھچ رہے نیں، جد کہ باقی میدان سیاست بیان بازیاں نال سرسبز و شاداب اے، پر مولانا فضل الرحمان نے اپنے کارکناں نوں جمع کر کے اپوزیشن لئی اک آس پیدا کیتی سی، پر کلا چنا بھلا کیہ بھاڑ پھوڑ سکدا اے، مولانا اپنی کوششاں دے نال حق رفاقت ادا کرن دے بعد سیاسی مراقبے وچ چلے گئے نیں۔ اپوزیشن دا تحریک انصاف حکومت ڈیگن دا خواب شرمندہ تعبیر ہو چکیا، کھڈاری دا شکار کسے دے دلی آرزو دے سوا کجھ نہیں، سیاسی شکاری تے کھڈاری دا اصل شکار کون ہووے گا، ایہ تے آن والا ویلا ای دسے گا۔ اپوزیشن اپنی افادیت گواچ چکی، پر تحریک انصاف حکومت لئی اپوزیشن توں ودھ اپنی ناقص کارکردگی وڈا خطرہ اے۔