کچن وچ وڈے بھانڈیاں دا آپس وچ ٹکرانا چنگی گل اے پر ہر ویلے اٹ کھڑکا چنگی گل نہیں

لکھت:ایثار رانا

ایہنوں کہندے نیں نذر اللہ نیاز حسین، اللہ تے توکل دی ایس توں چنگی مثال نہیں ہو سکدی جہڑی ساڈے پیارے حسین نواز نے قائم کیتی اے۔ اوہناں نے اپنے ابو دی ترجمانی کردیاں ہوئیاں مشرف دا معاملہ اللہ تے چھڈ دتا اے۔جدوں میاں صاحب دی حکومت سی تے مشرف بمعہ اہل و عیال جنج ٹر پئی واجیاں نال گجدے وجدے باہر چلے گئے سن اودوں وی شیراں نے سابق کمانڈو دا معاملہ اللہ تے ای چھڈ دتا سی۔ اک مراثی دا دیسی ککڑ بھج نکلیا، ککڑ چھت تے اپڑیا مراثی وی اپڑ گیا، ککڑ نے میدان وچ چھلانگ لائی مراثی نے وی لا دتی۔ اچانک ککڑ نے کول دریا وچ چھلانگ لا دتی، سردی سی پانی دا بہاء تیز سی، مراثی چھلانگ نہیں مار سکدا سی اوہنے کنارے تے ہتھ اُتے چکے تے بولیا لو جی فیر نذر اللہ تے نیاز حسین۔ ایہ میرے پیارے پیارے نونہال نہ ہون تے سیاست وچ دندیاں کڈھ کے ہسن دا موقع نہ ملے۔ اجہی معصوم گلاں کر جاندے نیں ، ایہ منے منے پالے پالے لاج دلارے۔ ہن اپنے بلاول بھانجے نوں لے لو، اوہناں نوں وی مشرف دے کیڑے نظر آن لگے نیں۔ بھیا تسیں پنج ورھے وچ اپنی شہید ماں دے قاتلاں نوں تختہ دار تے نہ ٹنگ سکے۔ مشرف نوں کٹہرے وچ نہ لیا سکے۔ ہن تہانوں کیڑے نظر آ رہے نیں۔ کچن وچ وڈے بھانڈیاں دا آپس وچ ٹکرانا چنگی گل اے پر ہر ویلے ایہناں دا اٹ کھڑکا رہنا زیادہ چنگی گل نہیں۔ اسیں تے پیدائشی نوازشریف نال ست اکیونجا رکھنے آں پر جدوں ایہناں نوں سسلین مافیا انڈر ورلڈ دا ڈان آکھیا گیا تے کدھرے اندر اک صلح جہڑی بندے نوں بدمزگی محسوس ہوئی سی۔ اج جدو پہرہ ’’66‘‘ ساہمنے آیا سی تے گل سمجھ آئی کہ ہوا کسے دی نہیں ہوندی اوہ انھے واہ چلدی اے۔ اسیں تے بابا بوٹے نوں گالھاں کڈھن توں نہیں روک سکے۔ بابا رحمتے نوں کہن دی کیویں جرات کردے، فیر ٹکور کردے پھردے کیہ فائدہ سی۔ خیر ایس لمحے موجود میں وی اسیں ایسے بہادرانہ کیفیت دا شکار میں ایس لئی اپنے پشاور دے بابا رحمتے دی خدمت وچ کجھ عرض کرن توں قاصر آں۔ دودھ وچ اک ادھ مینگن ای کافی ہوندی اے ایتھے تے مینگناں نے سارا دودھ غٹا غٹ کر لیا۔ نتیجہ ایہ ہویا کہ ادارے اک واری فیر آستیں چڑھائے کھلوتے نیں پر ساڈا یقین اے ایسے ریگستان وچ پھل کھڑن گے۔ جسٹس گلزار نال ایہ چمن ضرور گل و گلزار ہووے گا۔ ساڈے مقدر وچ کیہ بس بری خبراں تصادم تے ٹکراؤ ویکھنا ری رہ گیا اے۔ وڈے لوکو بڑے رہنماؤ ، وڈے دانشورو آخر ساڈا قصور کیہ اے؟ سانوں کہڑے جرم دی سزا مل رہی اے۔ سنتا سنگھ اپنے باپو منتا سنگھ توں بولیا باپو ہوم ورک کرکے لک دوہرا ہو گیا اے۔ تھوڑا ٹی وی ویکھ لواں۔ باپو بولیا ویکھ لے پر آن نہ کریں۔ آخر کدوں تک ایس معاشرے دے باپو سانوں آن کیتے بناں ٹی وی وکھاندے رہن گے۔ قوم دے منور جن دا کیہنے خیال کرنا اے۔ کدوں اسیںمیچور ہواں گے کدوں اسیں گالھاں دے بجائے اپنے کردار نال چنگے تے بھیڑے دی تمیز پیدا کراں گے۔ 72ورھیاں توں قوم دیاں اکھاں اڈیک رہیاں نیں تے دل واجے مار رہیا اے، پر سانوں تصادم تے ٹکراؤ توں فرصت ملے تے گل اے۔ ایہ انا دی جنگ کیہ کیہ تباہ کرے گی۔ بنتا سنگھ جنگل توں لنگھدا اک سپ ٹہنی نال لٹکا اے۔ بنتا بولا کاکا صرف لمکن نال کم نہیں چلے گا وڈا ہونا اے تے کمپلان وی پیا کر، کہڑا کمپلان لیایئے بھائی جہدے نال اسیں وڈے ہویئے۔ آخر کدوں تک انتظار دیاں ٹہنیاں تے لٹکے رہیے؟ عدالت وچ جج صاحب نے 60سالہ بابے توں آکھیا تہاڈے تے کُڑی نوں تنگ کرن دا الزام اے۔ جے ایہ حرکت توں 25ورھے پہلاں کیتی ہوندی تے میں معاف کر دیندا۔ اپنی عمر ویکھو تے حرکتاں ویکھو۔ ملزم بولیا مائی باپ تنگ 25ورھے پہلاں ای کیتا سی کیس ہن تک چل رہیا اے۔ پتہ نہیں قوم نوں کدوں فیصلہ سنایا جاوے گا۔ 1947وچ ساڈا کیہ ہویا ہن تک بھگت رہے آں۔ تریخ تے تریخ، تریخ تے تریخ، بہرحال جان دی امان پاندیاں ہوئیاں اینی ای عرض اے کہ پاکستان حسب معمول تے حسب عادت اک خوفناک دور توں لنگھ رہیا اے۔ بھارت کسے وی ویلے جنگ چھیڑ سکدا اے۔ خطے وچ تباہی دے سامان ہو رہے نیں، انٹرنیشنل اسٹیبلشمنٹ پاکستان دے پچھے ہتھ دھو کے پئی اے۔ ففتھ جنریشن وار سر تے چیل وانگوں چلاندی پھر رہی اے۔ تھوڑا جہیا استحکام پیدا ہوندا اے تے کوئی دھبڑ دوس جہیا واقعہ ہو جاندا اے۔ سپ پوڑھی دے کھیڈ وچ اسیں ڈنگ کھا کے فیر زیرو تے آ جانے آں۔ کلاس وچ ٹیچر نے سوال کیتا، کتے دی دم کیوں ہلدی اے، سنتا سنگھ بولے سر سائنس دے اصول دی وجہ توں، کیوں جے دم کتے نوں نہیں ہلا سکدی، قوم اک دم دی طرح اجہے نظام نال جڑی اے جہڑا جیویں چاہندا اے قوم نوں ہلائے رکھدا اے۔ اجہے اجہے رنگ باز اجہے اجہے بازیگر سانوں ٹکرے نیں کہ مجال اے ایہ دم کدی آرام لئی ساکت ہووے، جتھے نظام چاہندا اے قوم ہلدی ہلاندی ایہدے پچھے لگی رہندی اے۔ قائداعظم تے اوہناں دے رفقا نے کہڑے جتن نال کھیر پکائی تے ایہ نظام کہڑی خوبصورت نال ایس کھیر نوں کھا گیا تے اسیں بس دم ہلاندے رہ گئے۔ پاکستان ملائیشیا نہ جا سکیا، جا ای نہیں سکدا، ساڈی حمیت ساڈے فیصلیاں دی قوت تے گروی پئی اے، اسیں اپنے فیصلے کیویں کر سکنے آں۔ ہن چاہوے ایہدی لکھ وضاحتاں آن پر 40لکھ پاکستانی تے زرمبادلہ دے مصنوعی طور تے ودھے ذخائر ساڈے گٹے گوڈیاں وچ بیٹھ گئے، ڈرائیور بس بہت ہولی ہولی چلا رہیا سی۔ پچھے بیٹھے سنتا سنگھ بولے پتر تیری ریساں لان دی عادت مکی نہیں۔ ساڈی معیشت بہت تیزی نال ترقی کر رہی اے پر ریس دی کلی تے پیر ساڈا نہیں، سٹیرنگ تے ہتھ ساڈا نہیں، بلھے وئی بلھے کیہ آزاد قوم آں اسیں۔