دشمن مرے تے خوشی نہ کرئیے

عتیق انور راجہ

خبراں دے مطابق بھارت وچ کرونا وائرس دی تباہ کن کاروائیاں توں بعد حالات اینے خراب ہو چکے نیں کہ ہن بھارتی ہندوواں نوں اپنے مردے ساڑن لئی نہ لکڑی مل رہی اے تے نہ شمشان گھاٹاں وچ تھاں مل رہی اے، ایس لئی ہن سنن و چ آیا اے کہ ہندو اپنے مردیاں نوں دریا وچ سٹن اُتے مجبور ہو چکے نیں۔ کرونا وبا نے بھارت نوں اپنے شکنجے وچ لے لیا اے تے ایس دے پچھے بھارت سرکار دی اپنی لاپروائیاں دا اک سلسلہ اے۔ ہن بھارت وچ کرونا دی وجہ نال روزانہ ہزاراں دی تعداد وچ لوک مر رہے نیں۔ انج پاکستانی قوم بھارتی لوکاں نال انسانی ہمدردی دا بوہت زیادہ اظہار کر رہی اے۔بھارتی لوکاں لئی انسانی ہمدردی دے ناں اُتے دعائواں کیتیاں جا رہیاں نیں۔ حکومت ولوں بھارت نوں امداد دی پیشکش کیتی جا رہی اے تے انسانی ہمدردی دے ناں اُتے بھارت نوں پوری دنیا توں امدادی سامان اپڑنا شروع ہو چکیا اے۔چنگا اے انسانی ہمدردی کیتی جانی چاہیدی اے تے دشمن دے وبا وچ بے بس ہو جان اُتے ایس دی ہر ممکن مدد کر لین وچ وی کوئی قباحت نہیں پر سانوں ایہہ وی ویکھینا اے کہ انسانی ہمدردی دے حوالے نال بھارت سرکار دا اپنا رویہ اپنے ملک وچ وسن والے مسلماناں تے کشمیر وچ رہن والے مسلماناں نال کنج دا اے۔ سانوں ویکھنا اے کہ کس طرح بھارتی حکومت دی شہ اُتے متشدد سوچ دے حامل ہندو غنڈے بھارت وچ رہن والے مسلماناں دی زندگیاں عذاب بناندے چلے آ رہے نیں۔ سانوں ایہہ وی ویکھنا اے کہ بھارتی جابر و قابض فوج کس طرح مقبوضہ کشمیر وچ مسلمان نوجواناں نوں شہید کر رہی اے۔ مسلماناں دے گھر نوں ساڑ رہی اے۔ معصوم بچیاں توں لے کے عمر رسیدہ عورتاں تیکر دی عزتاں لُٹیاں جا رہیاں نیں۔ سانوں ویکھنا اے کہ بھارت سرکار کس طرح اقوام متحدہ دی انسانی حقوق لئی تجویز کیتی گئی قرار داداں توں انحراف کر رہی اے۔
بھارت وچ کرونا نال مرن والیاں، بیماراں نال ہمدردی کرن توں کجھ پہلے سانوں ایہہ وی ویکھ لینا چاہیدا اے کہ قابض بھارت تے اسرائیل ولوں کشمیر و فلسطین دے مسلماناں دے نال کنج دا رویہ رکھیا جا رہیا اے۔ ہجے دو دن پہلے کس طرح اسرائیلی فوج دے درندیاں نے نماز پڑھدے مسلماناں اُتے گولیاں دی بارش کیتی اے۔ انسانی ہمدردی دی گل کرن والیاں نال اینا ای کہنا اے کہ ذرا تصور وچ کشمیری لوکاں دی حالت دے بارے وچ سوچ لین کہ جنہاں لوکاں دے گھراں دے دروازیاں اُتے فوج کھڑی ہوئے، ایہناں دا کیہ حال ہوندا ہوئے گا۔جتھے ہر دن بازار بند ہو جاندے ہون اوتھے لوکاں نوں کھان پین، جین مرن لئی کیہ کیہ مصیبتاں دا ساہمنا کرنا پیندا ہوئے گا۔
صاحبو! سانوں اج ویکھنا اے کہ کیہ بھارت دی پاکستان متعلق پالیسیاں تبدیل ہو چکیاں نیں۔ سانوں اج ایہہ وی ویکھنا اے کہ ایس وبا دے دور وچ کیہ بھارت سرکار کشمیری مسلماناں نوں انسانی ہمدردی دے ناں اُتے ایہناں دا پیدائشی حق یعنی حقِ خودارادیت دین نوں تیار ہو رہی اے۔ ایس دا جواب اے کہ بھارت سرکار نوں بھارت وچ وسن والے تے کشمیر وچ رہن والے مسلماناں لئی انسانی ہمدردی نال کوئی سروکار نہیں تے فیر سانوں وی بھارت نال دوستی مسئلہ کشمیر دے حل دے نال مشروط کر دینی چاہیدی اے۔ کشمیر وچ اگ تے خون دا کھیڈ مسلسل کھیڈیا جا رہیااے۔ ہر دن بھارتی درندے بیگناہ کشمیری نوجواناں نوں شہید کر رہے نیں۔ خواتین دیاں عزتاں نال کھیڈیا جا رہیا اے پر انسانی ہمدردی دے ناں اُتے کدھروں وی ایس ظلم نوں روکن لئی بامقصد کوششاں ہوندیاں نظر نہیں آ رہیاں۔ بھارت جنہا ظلم کشمیریاں اُتے کر رہیا اے مہذب اکھوان والی دنیا دی اکھاں وچ جے ذرا وی شرم ہوندی تے اوہ انسانی ہمدردی دے ناں اُتے بھارت نوں ضرور ایس توں روکدا۔
ساڈی حکومتاں نے ہر دور وچ عوا م دیاں اکھاں وچ دھول پان دی کوشش کیتی اے۔ صرف سال وچ اک دن کشمیریاں دے حقوق دی گل کر کے سمجھنے آں کہ بس حق ادا ہو گیا۔ ساڈے حکمران بھُل جاندے نیں کہ پاکستان نے تے کشمیریاں دا وکیل بن کے ایہناں دا کیس مسلسل لڑنا سی۔ اج جس ویلے وچ ایہہ تحریر لکھ رہیا واں حضرت مجید نظامی دا یوم وصال اے تے اج انسانی ہمدردی دے ناں اُتے بھارت ول ہتھ ودھان والیاں نوں ویکھنا واں تے مینوں جناب مجید نظامی صاحب دے الفاظ یاد آ جاندے نیں کہ جدوں ایہناں نوں اک قافلے وچ بھارت جان دی پیشکش کیتی گئی تے جناب نے فرمایا کہ میں ٹینک اُتے بہہ کے تے بھارت جا سکنا واں۔ مسافر جہاز اُتے بہہ کے نہیں۔ میں سمجھنا واں کہ ایہہ جناب مجید نظامی صاحب دی اک پاسے پاکستان نال محبت سی تے دوجے پاسے آپ بھارتی متشدد ہندوواں دی سوچ سمجھدے ہوئے بھارت نال تعلقات استوار کرن وچ احتیاط ورتن دے حامی سن۔ سانوں بھارت وچ کرونا کیسز دی ودھدی تعداد تے ایس دے نتیجے وچ موتاں اُتے تشویش اے پر سانوں کشمیری مسلماناں دی حالت زار اُتے بھارت سرکار دا رویہ بالکل وی قبول نہیں۔