سینئر صحافی ذبیح اللہ بلگن ہوراں ولوں معروف شاعرہ، ادیبہ تے صحافی کرن وقار دا ہِرکھ اِکٹھ

رپورٹ: آفاق بٹ

کاسمو پولیٹن کلب لہور اندرسینئر صحافی ذبیح اللہ بلگن ولوں کورونا وائرس جہے موزی مرض دا شکار ہو کے اگلے جہان جان والی شاعرہ ، ادیبہ تے صحافی کرن وقار ہوراں داہِرکھ اکٹھ ہویا جیہدے وچ صحافتی تے ادبی حلقیاں دے وڈے ناواں رَلت کیتی۔ گل بات کردیاں رلتیاں آکھیا کرن وقار نال لنگھائے ویلے دیاں یاداں کدی پھکیاں نہیں پین گیاں۔اوہناں دا کہنا سی کرن وقار چنگی شاعرہ ہون دے نال نال اِک ہنس مُکھ تے خوبصورت انسان وی سن۔

اوہناں نوں یاد کرن والے کجھ لوکاں اپنے جذبات دا اظہار شعری شکل وچ کردیاں اوہناں نوں خراج عقیدت پیش کیتا تے اوہناں دی دھی رانی نوں یاد کر کے اکھاں دے اَتھرو نہ ڈَک سکے۔
تقریب دے آرگنائزر ذبیع اللہ بلگن ہوراں کرن وقار فنڈ دا اعلان کیتا تے آکھیا کہ اسیں اوہناں دے نام نال غریب تے ماڑے شاعراں ادیباں دی مدد کر کے اوہناں دی روح نوں ایصال ثواب کراں گے۔ اوہناں دا کہنا سی کہ ایس فنڈ وچ سالانہ 5 لکھ روپیہ میں جمع کرواواں گا تے تسی کسے دی وی مدد کر سکدے او۔

معاون آرگنائزر شہزادہ ذولقرنین ہوراں گل بات کردیاں کرن وقار ہوراں نال لنگھائے ویلے دیاں یاداں سانجھیاں کیتیاں تے ہر سال سالانہ کرن وقار مشاعرہ کروان دا اعلان کرن دے نال نال کرن وقار ایوارڈز دے پربندھ دی تجویز وی دِتی جیہدے وچ سب دوستاں بھرپور تعاون دی یقین دہانی کروائی۔
چیئرمین پنجابی میڈیا گروپ مدثر اقبال بٹ ہوراں آکھیا کہ کرن وقار ہوراں بارے سب دوست اپنے وچار لکھن ، کرن وقار دے کالم تے شاعری وی اکٹھی کیتی جائے تے میرا ادارہ بابا فرید بُک فائونڈیشن ایس کتا ب نوں چھاپے چاڑھےگا۔
ہور گل بات اور رلت کرن والیاں وچ ضیاء حسن، ریاض احمر احسان، حکیم سلیم اختر، ولایت احمد فاروقی، ارشد نسیم بٹ، ڈاکٹر افتخار حسین بخاری، پروین وفا، رابعہ رحمٰن ، نواز کھرل، اقبال راہی،عالیہ بخاری، گلشن آراء، ارشد اسد میو، رضوان اصغر بٹ، ڈاکٹر دانش عزیز، توقیر احمد شریفی،کرامت بخاری،سید فراست بخاری،نجمہ شاہین،ڈاکٹر ابرار احمد،صفیہ اسحاق، افضل طارق، ممتاز راشد لاہور، شگفتہ ہاشمی،ایڈووکیٹ صلاح الدین،علی بابر بٹ، عدیل شافی،خالد شریف ہوراں دے ناں شامل نیں۔
معروف شاعرہ حسن بانو ہوراں تقریب دی میزبانی کیتی تے تقریب دے اختتام اتے کرن وقار ہوراں واسطے دعا وی کیتی گئی۔