شہرت دا جنون

تحریر حمیداللہ بھٹی

اج کل ملک وچ ٹک ٹاکراں دا چرچا اے ویڈیو بن کے فالورز ودھان دا جنون اے ایہہ اک انج دا جنون اے جیہڑا معاشرے دی اخلاقی اقدار تے اصولاں نوں اہمیت نہیں دیندا جس نال معاشرے دی بنیاداں شکستہ ہو رہیاں تے خاندانی نظام ٹوٹ پھوٹ دا شکار تے ہے ای آپ ٹک ٹاکر نوں وی آئے دن حادثیاں دا ساہمنا اے۔جی ہاں جے معاشرے نوں نقصان اپڑ رہیا اے تے ٹک ٹاکر وی غیر محفوظ نیں ایس ورہے دو فروری نوں چھ لکھ فالورز رکھن والی مسکان شیخ نوں ساتھی ٹک ٹاکر ریحان شاہ سنے گولیاں دا نشانہ بنایا گیا پر لکھاں فالورز رکھن والیاں دیاں لاشاں گھر والیاں نے لے جان توں گریز کیتا کئی دن تیکر لاشاں لاوارث ہسپتال پئیاں رہیاں پر کوئی فالور وی تدفین دی ہمت نہ کر سکیا فیر وی شہرت دے جنون وچ کمی نہیں آ رہی کوئی ٹرین دے نال ٹک ٹاک بناندے جان گنوا رہیا اے تے کوئی بندوق نال اپنی جان لے رہیا اے۔ موتاں دے باوجود شہرت دا جنون ودھدا جا رہیا اے ایہہ شہرت دا جنون معاشرتی اقدار دی وی تباہی دا باعث بن رہیا اے سوشل میڈیا دی تعمیری اہمیت توں انکار نہیں پر میرے کہن دا مقصد ایہہ وے کہ شہرت دے جنون وچ جان نوں دا اُتے لانا تے خاندانی نظام تباہ کرنا وی غلط اے بدنامی دی شہرت عارضی تے ایس دے نتیجے نہایت تباہ کن نیں جے چنگے ہوندے تے حوا دی بیٹی دی لاش وصول کرن توں گھر والے انکاری نہ ہوندے۔
سوشل میڈیا اُتے شہرت دا جنون بیماری دی حد تیکر اپڑ چکیا اے مناہل ملک ناں دی وی اک خاتون اے جیہڑی تقریباً تن ورہے توں نت نویں ٹک ٹاک بنا کے شہرت حاصل کرن دے چکر وچ سی پر فالورز ودھان وچ مسلسل ناکام سی فیر ایس نے اخلاق نوں بالائے طاق رکھدے ہوئے عریاں تصویراں لائیاں تے راتوں رات فالورز دی تعداد نصف ملین کر لئی ہن ایہنوں کیہ کہواں گے؟ اسلام تے پردے دا حکم دیندا اے عریانی و فحاشی دی کوئی گنجائش ای نہیں عورت دا حسن تے عزت پردے وچ اے جیہڑی شہرت دی بھُکی بازاری عورتاں سرعام تماشہ بن دیاں نیں ایہہ وقتی طور اُتے مشہور تے ہو جاندیاں نیں پر عزت پھوٹی کوڑی دی نہیں رہندی جدوں کوئی کھڈونا بن کے سب نوں کھیڈن دی دعوت دیوے گا تے شہرت دے جنون دا شکار خواتین نوں یقین ہونا چاہیدا اے کہ کھڈونے نال لوک کھیڈن گے ای سر اکھاں اُتے نہیں بیٹھان گے۔
14 اگست نوں لہور گریٹر اقبال پارک وچ جو ہویا اوہ غلط تے قابل مذمت اے تے کسے حوالے نال ایس دی نہ تائید کیتی جا سکدی اے نہ ای کسے ملوث نوں بے گناہ قرار دتا جا سکدا اے پر ملوث منڈیاں وانگوں عائشہ اکرام وی واقعے دی مکمل طور اُتے ذمہ دار اے تے ایہہ واقعہ وی شہرت دے بدترین جنون دا شاخسانہ اے اک کُڑی گھر توں روانہ ہون توں پہلاں ویلا تے مقام دے بارے سب نوں دسدے ہوئے مقبولیت ظاہر کرن لئی اپنے فالورز نال بر وقت اپڑن دی استدعا کرے تے ہجوم ای اکٹھا ہوئے گا۔ ایس توں لائی جان والی ویڈیوز وچ کدی منڈے کپڑے لین، کدی ٹکٹ خریدن تے کدی پیسے دین دے ناں اُتے گلاں نوں ٹویا تے فیر دعوت گناہ دیندی انج دی ہر ویڈیو نوں فالرورز توں لائیک تے شیئر کرن دا مطالبہ وی ہویا ذرا دل اُتے ہتھ رکھ کے دسو ہیجان انگیز قسم دی ویڈیوز توں شہرت ھاصل کرن والی کُڑی نال کیہ کوئی احترام نال پیش آ سکدا اے؟ عائشہ اکرام کسے دی بھین تے دھی وی ہوئے گی ایس ل ئی کسے دی بھین یا دھی نال غیر اخلاقی حرکت ہوئے ایس دی تائید ممکن ای نہیں پر میرا تے سوال اینا اے کہ کسے دی بھین تے دھی جدوں عزت کران دی بجائے شہرت دے جنون دے علاوہ کجھ ویکھن اُتے تیار نہ ہوئے تے کیہ کسے ہور نوں الزام دے سکنے آں؟
اک گل پورے وثوق نال کہی جا سکدی اے کہ گریٹر اقبال پارک دا واقعہ سوچے سمجھے منصوبے دے تحت ہویا اے اچانک دی گل وچ کوئی صداقت نہیں جدوں توں میرا جسم میری مرضی دا راگ شروع ہویا اے ملک وچ انہونیاں ہو رہیاں نیں بچے، بچیاں نال زیادتی دے واقعے ودھن لگے نیں بھین بھرا، پیو دھی دے رشتے پامال ہو رہے نیں رشتیاں دا تقدس ختم ہون لگیا اے پر عالمی سطح اُتے خود نوں روشن خیال ثابت کرن لئی حکومت وی تعلیم دے نال تربیت اُتے توجہ دین دی بجائے آزادروی دی حوصلہ افزائی کرن اُتے مجبور اے ایس لئی خاندانی نظام دی ٹوٹ پھوٹ وچ سرعت آ گئی اے ڈی آئی اپریشن، ایس ایس پی اپریشن، ڈی ایس پی تے ایس ایچ او نوں معطل کر کے حکومت نے عالمی سطح اُتے ایہو پیغام دتا اے کہ عورت دی آزادی اُتے قدغن دا باعث بنن والیاں دے خلاف کاروائی ہو رہی اے ایتھے کجھ نام نہاد لبرل اینکر تے صحافی وی مورچہ سنبھالے ملک نوں بدنام کرن دی مہم وچ ودھ چڑھ کے شریک تے عورت دے احترام دا درس دیندے پھر رہے نیں ارے بھائی کون عورت دے احترام توں انکاری اے عورت دے احترام دی اسلام جنہی تلقین کردا اے کسے ہور مذہب وچ نظیر نہیں ملدی پر سوال فیر اوہ ای اے کہ کوئی عزت کران دی متمنی وی تے ہوئے۔
ایہہ جیہڑی گل گل اُتے مغرب دی مثالاں دتیاں جاندیاں نیں ذرا ایہہ تے دسن کہ کسے مغربی ملک وچ خاندانی نظام دا وجود اے؟ ٹھیک کہ کسے عورت دی مرضی دے بغیر کوئی ہتھ نہیں لا سکدا پر کیہ اوتھے عورت نوں واقع عورت کہہ سکنے آں؟ اسلام وچ تے گھر داری تے خاندان دی تربیت دا فریضہ عورت دے ذمے اے جدوں عورت اپنا فریضہ چھڈ کے شمع محفل بنے گی تے شہرت دے جنون وچ بے حیائی دی تشہیر تے دعوت گناہ دیوے گی تے جنسی مریض معاشرہ ای وجود وچ آئے گا جس وچ زندہ تے قبر وچ سُتے ہوئے وی نشانہ بن سکدے نیں ام المومنین حضرت عائشہ صدیقہ ؓ دی پاک دامنی دی گواہی قرآن دیندا اے جے عائشہ اکرام اپنے ناں دی ای کجھ لاج رکھ لیندی تے اج ملک تے مذہب دی ملک توں باہر رسوائی دا باعث نہ بن دی حالت ایہہ وے کہ سپین دا سب توں وڈا اخبار صفحہ اول اُتے اک عورت نوں چار سو مرداں ولوں چھیڑ چھاڑ دی کہانی شائع کردا اے مستقبل وچ وی جے انج دے واقعے ہون تے اچھنبے دی گل نہیں ہوئے گی ایس لئی حریم شاہ، جنت مرزا، کنول آفتاب جہی کُڑیاں ملک، مذہب تے خاندان دی بدنامی دے اشتہار لا کے سستی شہرت حاصل کرن دی بجائے جے ملک وچ نیکی تے تعمیری کماں وچ حصہ لین تے کوئی قندیل بلوچ بے موت نہ ماری جائے۔ نیکی تے تعمیری سرگرمیاں توں خاندان دی عزت وچ وی وادھا ہوئے گا جے مادام رتھ فائو غیر ملکی ہو کے پاکستان وچ تکریم حاصل کر سکدیاں نیں تے پاک وطن دیاں دھیاں کیوں ملک، مذہب تے خاندان دی بدنامی توں شہرت کشید کرن اُتے تلیاں نیں؟ جنہاں نے عزت بچانی اے اوہ کینیڈین وی لاگرروزی گبرئیل دے پاکستان دے طول و عرض وچ سفر توں ای کجھ سکھ لین گل فیر اوہ ای اے کہ شہرت دا جنون تباہی دا باعث اے بدنام ہوں گے تو کیا نام نہ ہو گا، اُتے یقین کرن والیاں یاد رکھن ماروی سرمد جہے کردار قابل تقلید نہیں۔