پنجابی زبان دے رنگ ۔۔۔ قوس قزہ دے سنگ

سانوں مل جل کے پنجابی زبان دے تحفظ تے بقا لئی اقدامات کرنے ہون گے
پنجابی زبان دے اخبار، رسالے تے جرائد، الیکٹرانک تے پرنٹ میڈیا ساڈا مان نیں

پروفیسر حکیم سید عمران فیاض

پنجابی زبان ساڈی ماں بولی زبان اے پر ایس دے نال سوتیلی ماں ورگا سلوک ورتیا جاندا اے۔ جس وجہ نال ہولی ہولی پنجابی زبان تے پنجاب دی دھرتی وچ رہن والیاں دے دلاں وچوں ایہہ دور ہوندی جا رہی اے۔ پنجاب دے صوفی شاعراں نے ہمیشہ محبت، پیار، اخوت تے رواداری دا درس دتا۔ پنجابی دے پہلے صوفی شاعر حضرت بابا فرید گنج شکر جیہڑے کہ بارھویں تے تیرھویں صدی دے عظیم شاعر سن۔ ایہناں دا بیشتر کلام سکھاں دی مقدس کتاب گرنتھ توں ملیا اے۔ پنجابی زبان دے دیگر عظیم شاعراں وچ دمودر،گرونانک ، گروانگد دیو ،گروامرداس ، گرورامداس ،حضرت شاہ حسین ؒ، گروارجن دیو ،بھائی گرداس ، حضرت سلطان باھو ؒ ، گروتیغ بہادر ، گروگوبند سنگھ ، صالح محمد صفوری ، حضرت بلھے شاہ ؒ،حضرت شاہ حسین ؒ، حضرت خواجہ غلام فرید ؒ، بابو رجب علی ، میاں محمد بخش ، مولوی غلام رسول عالم پوری ، قادر یار ، پیلو ، شاہ محمد ، موہن سنگھ ،امرتا پریتم ، ہاشم ، شریف کنجاہی ، میر تنہا یوسفی ،انور مسعود ، افضل احسان رندھالوی ، حیدرعلی آتش ،ہربانس بھالا ، شائستہ نزہت ،بھائی ویر سنگھ ،امرتا پریتم ، جسونت سنگھ راہی ،فیض احمد فیض ، درشن سنگھ آوارہ ،ڈاکٹر ہربجن سنگھ ، شیو کمار بٹالوی ، شریف کنجاہی ،سرجیت پاتر ،محمد افضل راز ، انور مسعود ، سکھبیر ، استاد دامن ، منیر نیازی ، شہزاد اسلم،چمن لال چمن ،خشونت کنوال ، احمد راہی ، مظہر ترمذی،
فرخ ہمایوں جہے کئی عظیم شاعراں دی لسٹ وچ شامل نیں جیہڑے کہ بارھویں صدی توں بیسویں صدی دے وچکار اپنے صوفی ازم تے شاعری دی بدولت پنجابی حلقیاں وچ ای نہیں بلکہ عوامی حلقیاں وچ وی مقبول نیں۔
کوئی بن گیا رونق پکھیاں دی
کوئی چھوڑ كے شیش محل چلیا
کوئی پلیا ناز تے نخریاں وچ
کوئی ریت گرم تے تھل چلیا
کوئی بُھل گیا مقصد آون دا
کوئی کر كے مقصد حَل چلیا
اتھے ہر کوئی فرید مسافر اے
کوئی آج چلیا کوئی کل چلیا
پنجابی زبان ایس ویلے تیکر پروان نہیں چڑھ سکدی جدوں تیکر اسیں سارے مل جل کے ایس نوں پروان نہیں چڑھائواں گے۔ سانوں ساریاں نوں پنجاب زبان دی ترقی تے بحالی لئی دن رات کم کرنا ہوئے گا کیوں جے ایہہ ساڈی ماں بولی زبان اے۔ ایہہ ساڈا مان اے ایہہ ساڈے پنجابی کلچر دی دھنگ اے۔
چل بولیا ہون اوتھے چلئے جتھے سارے انے
نہ کوئی سانو پہچانے نہ کوئی سانو مَنّے
برے بندے نوں میں لبن ٹریا پر برا لبا نہ کوئی
سانوں اپنے ایس پنجابی کلچر تے زبان نوں فروغ دین دی خاطر پنجابی زبان نوں پرموٹ کرنا ہوئے گا۔ ایس نال جڑے رسالے، جرائد، اخبار، کتاباں نوں اپنے اآن والی نسلاں دے مستقبل دی خاطر ایہناں دے زیر مطالعہ لیانا ہوئے گا۔ تے آپس وچ اردو زبان دے نال پنجابی زبان نوں وی پرموٹ کرنا ہوئے گا۔ حکومت نوں وی چاہیدا اے کہ اوہ پنجابی زبان نوں پرائمری توں ہائی سکول دی سطح اُتے رائج کیتا جائے تے سرکاری سطح اُتے ایس دی مکمل سرپرستی کریئے تاکہ پنجابی زبان نوں ایس دا اصل حق مل سکے۔
پڑھ پڑھ کتاباں علم دیاں توں نام رکھ لیا قاضی
ہاتھ وچ پھڑ كے تلوار نام رکھ لیا غازی
مکے مدینے گھوم آیا تے نام رکھ لیا حاجی
او بھلیا حاصل کی کیتا ؟ جے تو رب نا کیتا رضی