تباہی دی خوفناک سازش تے یادگار پاکستان!

حناپرویزبٹ

جدوں توں قومی یادگار دے سائے وچ قومی سانحہ برپا ہویا اے کیہ سوشل میڈیا تے کیہ مین اسٹریم میڈیا‘ ہر کوئی دور دیاں کوڑیاں لیان لئی پورا ٹل رہیا اے۔ کئی ایہنوں سوشل میڈیا اسسٹنٹ تے فالوورز دی بھکھ قرار دے کے دلیلاں دے ڈھیر لان وچ مصروف نیں بہت سارے ایس واقعے نوں سکرپٹ قرار دیندے ہوئے ایہ وی پیش گوئی کر رہے نیں کہ ویکھنا کجھ ای دیہاڑیاں وچ ددھ دا ددھ تے پانی دا پانی ہو جاوے گا۔ ناقدین دا مننا اے کہ ایہ فکس میچ سی تے چھیتی سامنے آ جاوے گا کہ ایہ ڈیل کنہے کنہے کنے وچ کیتی؟ کوئی ایہ ججمنٹ پاس کر رہیا اے کہ کڑی ہے ای انج دی سی‘ اوہنے محرم مہینے وچ ٹک ٹاک بنان دی غیراخلاقی حرکت کیتی ای کیوں؟ آئو ایس واقعے بارے کجھ نکتیاں تے غور کرنے آں۔
پہلا نکتہ فرض کرو ٹھیک اے کہ ایس کڑی نے اپنے ساتھی دے نال رَل کے دوجے ٹک ٹاکراں نوں مینار پاکستان اپڑن دی دعوت دتی سی۔ دوجا نکتہ‘ اوہ یوم آزادی دے موقعے تے اپنے فالوورز دے نال ویڈیو بنا کے اپنے فالوورز ودھانا چاہندی سی۔ تریجا نکتہ اوہنے ایہ سب کجھ حفاظتی اقدامات دے الٹ کیتا۔ ایہناں تنے نکات دا ایہ جواب ہو سکدا اے کہ ایہ غلطی‘ بے وقوفی تے حماقت ضرور ہو سکدی اے پر جرم بالکل وی نہیں جہدی اینی شرمناک سزا کڑی نوں ملی۔ چوتھا نکتہ فرض کرو کہ ایہ ٹھیک اے کہ اوہ قابل اعتراض ٹک ٹاک بناندی رہی اے پنجواں نکتہ‘ بہت سارے حلقے الزام لاندے نیں کہ کیوں جے ایہنے محرم دے مہینے دے تقدس نوں پامال کیتا ایس لئی اوہدے نال انج ہونا ای سی چوتھے تے پنجویں نکتے دا جواب ایہہ وے کہ فرض کرو اوہ انج دی ای سی جے اوہ ایس توں وی ودھ کے ہوندی تے کوئی قنون اوہناں نوجواناں نوں ایہ لائسنس نہیں دیندا کہ اوہ حوا دی دھی دی عزت نوں پامال کرن۔ ایہناں ظالماں نوں کنہے ایہ حق دتا سی کہ اوہ اوہنوں ننگا کردے‘ مینوں یقین اے کہ انج کرن والے دنیاوی قنون توں بچ وی گئے تے اللہ دی لاٹھی توں نہیں بچ سکن گے۔ کون جان دا سی کہ خوشیاں بھریا یوم آزادی حوا دی ایس بدقسمت دھی لئی یوم گریہ بن جاوے گا۔ ایس کڑی نوں جے بھل گیا سی تے اوہناں چار سو بگھیاڑاں وچ کجھ تے چنگی طرح جان دے سن کہ ایہ کہڑا محترم مہینہ اے ایس پاک مہینے دے کیہ تقاضے نیں؟ مینوں شک نہیں سگوںپک اے کہ ساڈے معاشرے دی توڑ پھوڑ لئی گرینڈ گیم آف فیملی ڈسٹرکشن دا سیاہ کھیڈ دھڑلے نال جاری اے ساڈے نوجواناں نوں بے راہ روی دے انھے ٹوئے ول دھکیا جا رہیا اے۔
ایتھے سوال ایہ وے کہ مقامی طور تے کہڑے خفیہ ہتھ ایس شرمناک کھیڈ وچ اوہناں دا ساتھ دے رہے نیں؟ ریاست ایس حوالے نال کنی ذمہ داری نبھا رہی اے؟ پیمرا دا ایس سارے عمل وچ کیہ کرداراے؟ کیہ مین اسٹریم میڈیا ٹک ٹاک سٹارز نوں پروموٹ کر کے بے راہ روی نوں ودھا نہیں رہیا؟ کیہ مین اسٹریم میڈیا نوں انج ای کرنا چاہیدا اے؟ میرا مننا اے کہ ٹک ٹاک بنان والے پاکستانی منڈے تے کڑیاں ییلو توں ریڈلائن تک اپڑ چکے نیں جہناں نوں روکن لئی سنجیدہ اقدامات کرنے ہون گے۔ ایس حوالے نال ریاست تے سماج سنے سارے اداریاں نوں رَل کے کم کرنا ہووے گا بڑا چنگا ہوندا کہ ایس عظیم مقصد لئی سوشل میڈیا کنٹرول اتھارٹی بنا دتی جاوے جہدے وچ استاداں سنے ہر متعلقہ شعبہ دے نمائندہ بندیاں نوں شامل کیتا جاوے تے جو قواعد و ضوابط دی تشکیل‘ پالیسی سازی تے عملداری لئی سارا کم جنگی بنیاداں تے کرن کیوں جے سوشل میڈیا بڑی تیزی نال ساڈیاں زندگیاں وچ وڑ چکیا اے۔ ایہ ساڈی نوجوان نسل نوں شہراہ بے راوی تے پا چکیا اے۔
آخری گل ایہہ وے کہ 14اگست نوں ایسے تھاں صرف اک نہیں سگوں دوجا واقعہ وی ہویا سی جہدے وچ اک عورت نوں اوہدے بچے سنے بچایا گیا سی تن دیہاڑ تک ایس شرمناک واقعے نوں چھپایا گیا پولیس نے تے روایتی بے حسی وکھائی ای سی اوہ اوہنے وکھائی جد کہ کٹھ پتلی پنجاب سرکار نے وی خواب خرگوش توں اٹھ کے اوہو بیان دتا جو اوہنے سانحہ ساہیوال دے ویلے دتا سی کہ انصاف ہوندا نظر آوے گا لوکاں نوں سب یاد اے کہ سانحہ ساہیوال دے سارے مجرمان چھٹ گئے سن‘ کٹھ پتلی سرکار تے اوہدے ترجمان دا ہنا سی کہ محرم دیاں چھٹیاں مگروں نادرا دے دفتر کھلن گے تے کاروائی شروع ہووے گی۔ افسوس اوہناں نوں تے دنیاداری نبھان دی وی عقل نہیں حقیقت تے ایہہ وے کہ ایس واقعے وچ صرف قوم دی دھی نہیں سگوں کٹھ پتلی سرکار دی کارکردگی وی فیر واضح ہو گئی عقلمنداں لئی ایہدے وچ بڑیاں نشانیاں موجود نیں۔٭