اج بدھ نہیں

حمیداحمد سیٹھی

زندگی تے موت بارے شاعر نے کہیا اے کہ موت اک زندگی دا وقفہ اے یعنی اگے چلو گے ساہ لے کے اوہدے مطابق تے موت نوں جو اک حقیقت اے ایہنوں بہرحال قبول کر لینا چاہیدا اے پر ایہدا ڈر تے اگوں بارے لاعلمی انسانی جذبات نوں شاعر دی اوس منطق نوں سمجھن تے قبول کرن دے وچکار رکاوٹ بن کے اوہنوں ناقابل قبول قرار دیندی اے یعنی موت نوں خاتمہ بالخیر تے رضائے الٰہی من لینا چاہیدا اے پر جو حق اے اوہو سچ اے۔
ایہہ بحث جو کجھ لوکاں دے وچکار اک مرگ تے جاندے ہوئے موٹرکار وچ ہوئی نظرانداز کرکے مینوں ذکر کرنا اے اوس بہادر ڈاکٹر دا جو ڈیڑھ ورھے دی لمی بیماری دے بعد اللہ نوں پیارا ہویا۔ ڈاکٹر عبدالاحد دے پُتر ڈاکٹر وقاص نوں ملن تے تعزیت کرن میرے نال ڈاکٹر نصرت اللہ تے بی اے ناصر سن۔ مرحوم دوست ڈاکٹر احد دی فیملی مختصر سی۔ بیگم کئی ورھے پہلاں وفات پا لئی گئی تے احد اکلاپے دا شکار ہویا کیوں جے وقاص وی میڈیکل تعلیم دی غرض نال امریکہ وغیرہ زیادہ ویلا گزاردا۔ ڈاکٹر احد گھر تے اکلا ہوندا یاں بیرون ملک پُتر وقاص دے کول ٹر جاندا۔ ہن وقاص ای اوہدے اکلاپے دا ساتھی سی یاں اسیں لوک۔
عبدالاحد دی پیدائش 1943ء وچ شہرکوئٹہ وچ ہوئی۔ ابتدائی تعلیم دے بعد اوہنے لیاقت میڈیکل کالج تے جی سی توں ڈاکٹری پاس کیتی۔ ایہدے بعد اوہنے سرجری دی تعلیم مکمل کیتی۔ اوہدے والد وی ماہر سرجن سن تے دادا وی ڈاکٹر سن۔ عبدالاحد دی واحد اولاد وقاص اے جو سرجری دا ماہر تے اک امریکی کالج وچ پڑھاندا اے۔ ایہ مختصر خاندان چار ڈاکٹراں دے ناں توں جانیا جاندا اے۔
عبدالاحد دا پُتر وقاص والد دی بیماری دا سن کے آ گیا سی۔ ڈاکٹر احد کنگ سعود یونیورسٹی وچ پڑھاندا رہیا۔ فوجی فائونڈیشن‘ ایف جے کالج‘ شیخ زید کالج تے سنٹرل پاک وچ وی کم کیتا۔ ایہ اوہ گگھرانہ اے جہدے وچ چار ڈاکٹر انساناں دیاں زندگیاں بچان دی خدمت وچ مصروف رہے تے اک ہن وی مصروف عمل اے ڈاکٹر احد بچپن توں ای سمارٹ تے پھرتیلا‘ تیزطرار سی ایس لئی سپورٹس دا دلدادہ سی۔ اوہناں نوں اعلیٰ تے قیمتی سوٹ بطور ڈریس پان دا ای شوق نہیں سی جوانی وچ اپنی چنگی موٹرکار رکھن دا وی شوق رہیا۔ سروس توں ریٹائرمنٹ دے بعد اوہ اپنے سول سرجن دوستاں نال کنگ ایڈورڈ میڈیکل دا دورہ ضرور کردے۔ اک دن کالج دے پرنسپل نے اوہناں ریٹائرڈ سول سرجن دوستاں نوں کہیا کہ تہاڈی ظاہری جوانی دا جائزہ لین لئی تہاڈی Race ویکھنا چاہنا واں۔ تسیں سارے پرنسپل دے کمرے نوں نسدے ہوئے ہتھ لاکے واپس آئو۔ ڈاکٹر احد ایس دوڑ وچ اول آئے۔ فیر تے دوڑ دا ایہ مقابلہ اک معمول بن گیا تے ہمیشہ ڈاکٹر احد اول آئوندے۔
پونے دو ورھے پہلاں خدائی قہر دی صورت کرونا وباء اتری تے ڈاکٹر احد ایہدے وچ مبتلا ہو کے ہسپتال داخل ہو گئے۔اوہناں دے مکان تے اوہناں دا اکلوتا Cook وی ایہدے نال متاثر ہویا تے اوہدی بیوی وی۔ ایہ دوویں تے چھیتی صحت یاب ہو گئے پر ڈاکٹر احد دی صحت ڈاڈھی متاثر ہوئی۔ اوہناں دی تکلیف دہ بیماری چار مہینے تک رہی۔ ایہدے وچ بہتری تے ہوئی پر اوہناں نوں وکھووکھ بیماریاں گھیرن لگ پئیاں۔ میری اوہناں نال ٹیلی فون تے گل بات ہوندی پر اوہ مینوں ملاقات دی اجازت نہ د یندے۔
اصل وچ کرونا نے اوہناں دے دل تے پھیپھڑیاں نوں بڑا متاثر کیتا سی۔ اوہ بندہ جہدیاں چار نسلاں نے بیمار لوکاں دی صحت یابی لئی رات دن اک کیتی رکھیا اج اللہ دے رحم و کرم تے سی۔ اک لمے عرصے توں ڈاکٹر نصرت اللہ‘ ڈاکٹر احد‘ بی اے ناصر‘ جاوید اقبال‘ رانا ادریس تے مینوں ہر بدھ دی شام تن وجے ڈاکٹر نصرت دے پی اے دا فون آئوندا کہ اج بدھ اے تے اسیں اٹھ وجے اکٹھے مل کے کھانا کھانے آں۔ کدی کدائیں فون آ جاندا اے کہ اج بدھ نہیں تے ہن کرونا دے دن ختم ہون گے تے سارے دوستاں نوں فون جایا کرے گا ماسوائے ساڈے عزیزترین دوست احد دے۔ ٭