اسلحے دے زور تے

لکھت:مظہر برلاس

بڑے چر توں ایہ واقعات سنن نوں مل رہے نیں کہ فلاں علاقے وچ اسلحے دے زور تے گڈی کھوہ لئی گئی۔ ویران سڑک تے اسلحہ وکھا کے مسافراں نوں لٹ گیا گیا۔ لٹ مار کرن والے انھیرے دا فائدہ چک کے نسن وچ کامیاب ہو گئے۔ ایہ عمل کئی ورھیاں توں جاری اے ویلے دے نال نال چوراں ‘ڈاکوئواں تے لٹیریاں دا حوصلہ ودھدا رہیا۔ ویلے نے انگڑائی لئی تے چوراں‘ ڈاکوئواں تے لٹیریاں نے سوچیا کہ سانوں وی راتاں نوں آرام کرنا چاہیدا اے اپنے بیوی بچیاں دے نال گھٹو گھٹ رات تے گھر وچ گزارنی چاہیدی اے ایہناں لوکاں نے تھانیاں دی حد تک پولیس اہلکاراں نوں نال ملایا تے نال ای ویرانیاں وچ دن دی روشنی وچ وارداتاں شروع کر دتیاں۔ زیادہ پچھ گچھ ہوئی تے دوجے ضلعے دا رخ کر لیا۔ وارداتاں ودھیاں تے پولیس دی انٹرنل رپورٹاں وچ ایہ کہیا جان لگ پیا کہ چوری دی ویہہ تریہہ وارداتاں تے نارمل نیں‘ ایہ تے روٹین دا حصہ اے۔ وقت مجھ چوراں دی تھاں گڈی چوری لے آیا‘ سنھ لان والیاں دے ہتھ وچ پستول پھڑا دتا گیا۔ اک ویلا سی سنھ لان والیاں نوں آپ لبھنا پیندا سی کہ کہڑی چیز کتھے ہووے گی پر ہن اوہ سنھ نہیں لاندے سگوں اسلحہ تان لیندے نیں‘ پستول تان لیندے نیں۔ پستول تان کے گھر والیاں توں پچھیا جاندا اے کہ زیور کتھے نیں‘ کیش کتھے اے‘ اٹھو تے اوہ کڈھ کے ساڈے حوالے کر دیو۔ نال ای جاندے جاندے اک نصیحت وی کر جاندے نیں کہ کسے نوں دسنا نہیں‘ سڑک کنڈھے گڈیاں نوں روک کے کنپٹی تے پستول رکھ کے کہیا جاندا اے جو کجھ ہے کڈھ دیو۔
ہن ویلے نے اک ہور پرت بدلی اے ہن ڈاکو نصیحت نہیں کردے اوہناں دا خیال اے کہ نصیحت دا لوکاں تے کوئی اثر نہیں لوک دسن توں باز نہیں آئوندے۔ ہن تن طرح دے چور ڈاکو نیں پہلے نمبر تے اوہ نیں جو گھر والیاں نوں نصیحت دی تھاں دھمکی دیندے نیں کہ جے کسے نوں دسیا تے اسیں فیر آ سکنے آں۔ دوجے نمبر تے اوہ نیں جو دھمکیاں دینا مناسب نہیں سمجھدے اوہ اپنا ویلا کسے ہور تھاں توں لٹ مار لئی بچا لیندے نیں۔ ڈاکوئواں دی تریجی قسم اوہ اے جو نہ دھمکی دیندے نیں تے نہ ای نصیحت کردے نیں لٹ مار دے بعد گھر والیاں تے کجھ گولیاں چلا کے اوہناں نوں ابدی نیندر سلا دیندے نیں۔
پر ہن ویلا بدل گیا اے ہن اوہ سدھا اغوا کردے نیں فیر تاوان منگدے نیں مرضی نال بھائو تائو کردے نیں ایہ رواج وڈے شہراں توں چھوٹے علاقیاں تک اپڑ گیا اے۔ مثلاً ضلع قصور دی چاروں تحصیلاں وچ ایہ دھندا عروج اُتے اے۔ اوتھے دن دیہاڑے لوکاں نوں اغوا کیتا جاندا اے فیر تاوان منگیا جاندا اے لوک مجبوراً ادھار شدھار لے کے جان بخشی کرواندے نیں جے پولیس نوں دسیا جاوے تے اوہناں دے اوہو پرانے گھسے پٹے بیان سامنے آئوندے نیں کہ تفتیش جاری اے اسیں حالات دا جائزہ لے رہے آں۔ پولیس چھیتی ملزماں تک اپڑ جاوے گی۔ ایس صورتحال وچ پولیس لٹن والیاں توں ہور خرچہ پانی منگدی اے اوہناں دی کوشش ہوندی اے کہ پولیس بے شک خرچہ پانی لے لوے پر ساڈا بندہ زندہ سلامت مل جاوے۔ سجریاں وارداتاں وچ عورتاں وی شامل ہو گئیاں نیں اوہ سوشل میڈیا پاروں دولت دے حصول وچ جٹ گئیاں نیں کس طرح امیر بندیاں تے وار کیتا جاندا اے ایہ پھسن والیاں نوں بعد وچ پتہ لگدا ے سمارٹ فون نے چوری تے ڈکیتی دے کجھ ہور بوہے کھول دتے نیں۔ اسلام آباد‘ لہور تے کراچی سنے کجھ وڈے شہراں دے امیر محلیاں وچ گھر دے بوہے تے بیل دتی جاندی اے بوہا کھولن والے دے سر تے پستول تان لئی جاندی اے اوہنوں گھر دے اندر چلن نوں کہیا جاندا اے فیر گھر والیاں نوں بے بسی دی فوٹو بنا کے لٹ لیا جاندا اے ایس قسم دیاں وارداتاں نال کافی گھراں دی صفائی ہو چکی اے۔
انج کیوں ہو رہیا اے کیہ پردے دے پچھے وڈے پولیس افسر نیں‘ اوہناں نے لٹ مار لئی دھڑے بنا رکھے نیں؟ کجھ افسر تے شہدا فنڈ نوں وی معاف نہیں کردے ضلع گجرات دے گرفتار پولیس اکائونٹ کیہ کہہ رہے نیں اوہناں دے بیان سن کے حیرت ہوندی اے کہ ساڈے کجھ وڈے پولیس افسراں نوں نہ اللہ دا ڈر اے تے نہ ای قیامت دا‘ اوہناں دے نزدیک سب کجھ مال اے۔ مال دی محبت وچ اعمال دی فکر نہیں۔ حالت ایہہ ہو گئی اے کہ ہن لوک اسلحہ لے کے اجہیاں تقریباں وچ اپڑ جاندے نیں جتھے وزیراعلیٰ یاں گورنر ہون‘ وزیراعظم دے گھر دوالے فائرنگ ہوندی اے عام شادیاں وچ وی جائو تے کوئی نہ کوئی رکن چار بندوق والیاں دے نال پنڈال وچ وڑدا اے جہدے توں ڈر تے رعب دی لہر پیدا ہوندی اے۔ ایہدا علاج اک ای اے کہ ملک نوں اسلحے توں پاک بنایا جاوے۔ ویپن فری کنٹری بنان لئی سارے اسلحہ لائسنس منسوخ کر دتے جان نہیں تے پولیس دے وس دا ایہ کم نہیں اک حکومتی فیصلہ لوکاں دیاں زندگیاں بدل سکدا اے۔ ایہدے نال ملک وچ قتل و غارت تے چوری چکاری رک سکدی اے پر ایہدے لئی وڈے فیصلے دی لوڑ اے اپنے شہریاں نوں بچان لئی وڈا فیصلہ کرو تے اپنے ملک نوں ویپن فری کنٹری بنائو۔ بقول شاعر:
شہر والوں کا ہے خدا حافظ
چور جب کوتوال ہو جائیں