پکا سیاسی رنگ…

شکیل امجد صادق

اک دفعہ دا ذکر اے اک کھوتے نے اک شیر نوں کہیا: گھاہ نیلا ہوندا اے۔شیر نے جواب دتا: نہیں گھاہ ساوے رنگ دا ہوندا اے۔
ایہدے بعد اوہناں وچکار بحث و تکرار شروع ہو گئی پر کوئی نتیجہ نہ نکلیا۔ آخر اوہناں نے فیصلہ کیتا کہ اپنا معاملہ ببرشیر یعنی جنگل دے بادشاہ سامنے پیش کرنے آں۔ ایس لئی دوویں ببرشیر نوں ملن لئی ٹر پئے۔ کھوتا تے شیر اجے ببر شیر دی کچھار توں دور ای سن کہ کھوتے نے اچی آواز نال پکارنا شروع کر دتا عالی پناہ! کیہ ایہ سچ نہیں کہ گھاہ نیلا ہوندا اے؟ ببر شیر نے کھوتے دے نال کھڑے شیر نوں ویکھیا تے جواب دتا: بالکل‘ گھاہ دا رنگ نیلا وی ہوندا اے۔ کھوتے نے جدوں اپنی فتح ہوندی ویکھی تے بڑا خوشی نال نس کے ببرشیر دے کول اپڑیا تے بولیا: عالی پناہ! ایہ شیر ایہ گل نہیں من دا‘ ایہ میرے نال مسلسل اختلاف کیتی جا رہی اے تے مینوں غصہ دوا رہیا اے ایہنوں سزا دیو‘ حضور!
ببرشیر نے اوسے ویلا فیصلہ سنایا کہ شیر نوں پنج ورھے دی زبان بندی یعنی چپ رہن دی سزا سنائی جاندی اے۔ شیر نے سزا قبول کر لئی پر اوہنے ببرشیر توں پچھیا: عالی جا! تسیں مینوں ایہ سزا کیوں سنائی جد کہ تسیںوی چنگی طرح جان دے او کہ گھاہ دا رنگ ساوا ہوندا اے۔ ببرشیر نے کہیا بالکل‘ گھاہ دا رنگ ساوا ای ہوندا اے فیر تساں مینوں ایہ سزا کیوں سنائی؟ شیر نے سوال کیتا:
ببرشیر نے جواب دتا: ایس سزا دا تعلق ایس گل نال بالکل وی نہیں کہ گھاہ دا رنگ ساوا ہوندا اے یاں نیلا‘ سگوں تینوں ایہ سزا ایس لئی دتی گئی اے کہ توں اک بہادر تے عقل مند مخلوق انیں پر توں کھوتے نال بحث کیتی تے فیر اپنا احمقانہ سوال لے کے مینوں تنگ کرن لئی آ گیا اے۔
اسیں کہیا ساڈے لیڈر بڑے کرپٹ نیں۔ ایہ ملک نوں کھا گئے نیں‘ ساڈے حصے چٹ گئے نیں۔ ساڈے ہتھاں چوں برکیاں کھوہ کے لے گئے نیں۔ ساڈیاں روشن راہواں نوں انھیرا دے گئے نیں۔ دانہ گندم ساڈی پہنچ توں باہر جا رہیا اے۔ کوئی فیر توں سانوں ایہدی افادیت نہیں دس رہیا۔ حیات وچ جمود طاری ہو گیا اے چلو کوئی سیاسی راہ بدلنے آں۔ کسے نویں فضا وچ ساہ لینے آں۔ بدبودار تے تعفن زدہ سیاسی ماحول توں کنارہ کشی اختیار کیتی جاوے تے کسے نویں نظام دی نینہہ رکھی جاوے جہدیاں کرناں امیر دے محل تے غریب دی کٹیا تے نظام مساوات تے عدل نوں برقرار رکھدے ہوئے پین۔ بنجر تے بانجھ زمیناں دی کوکھ چوں ہریالی پھٹے۔ آسیب زدہ جنگل پرستان وچ بدل جان۔ صدیاں توں سُُکیاں نہراں ندیاں تے آبشاراں ورگیاں رومانوی صورت اختیار کر لین۔ فیر کیہ ہویا؟ ساریاں نے رَل کے ضبط دی زنجیر نوں پاش پاش کیتا تے اک نویں تے آہنی نظام دی بنیاد وچ جُٹ گئے۔ فطرت نے شروع توں ای ایس نظام کار نوں پکا تے ناقابل تبدیل رکھیا اے کہ نیت دی مضبوطی تے گنتی دی زیادتی جس پاسے ہو جاوے اوہ مقام فتح ہو جاندا اے تے شکست ہمیشہ مخالفین دے حصے وچ آئوندی اے۔ ہونہار بروا دے چکنے چکنے پات۔ کیہ بزرگ‘ کیہ وڈی عمر‘ کیہ عورتاں‘ کیہ جوان‘ کیہ حسین و جمیل‘ پری چہرہ لوگ‘ کیہ امیر و غریب‘ کیہ بندہ کیہ بندہ نواز‘ کیہ محمود‘ کیہ ایاز سارے لوکاں نے اپنی خودی نوں بلند کیتا تے ایس سیاسی نظام دے خلاف آہنی تلواراں لے کے ڈٹ گئے تے لوہے دے چنے تک چبوا دتے۔
دوستو! فیر ایس عوام دی پرانی خواہش پوری ہو گئی تے نواں نظام آ گیا۔ ایس نویں نظام نوں تن ورھے ہو گئے نیں تے ملکی بہتری نوں ایس لطیفے نال سمجھان دی کوشش کر رہیا واں۔
اک میراثی فوج وچ بطور رنگ ساز بھرتی ہویا جدوں ریٹائر ہویا تے جو پیسے ملے اوہدے نال کپڑے رنگن دی دکان پا لئی کہ ساری حیاتی ایہو کم کیتا سی ہن پہلے ای دن محلے چوں اک کڑی دوپٹہ رنگوان آ گئی تے فرمائش کیتی چاچا دوپٹے تے آتشی پنک رنگ کر دیو۔ ہن میراثی نے ساری زندگی خاکی وردیاں رنگیاں سن اوہدے وڈے وی نہ جانن کہ آتشی پنک کس بلا دا ناں اے۔ کہن لگا پُتر دفعہ کرو آتشی پنک تسیں خاکی رنگ کرا لوو‘ دوپٹے تے چنگا لگے گا کڑی بولی ا وہ چچا آتشی پنک نا میرے سوٹ دے نال میچ کردا اے۔ میراثی تھوڑا چپ رہ کے بولیا پُتر خاکی کرا لوو خاکی رنگ ٹھنڈاہوندا اے۔ کڑی تھوڑی تیز آواز وچ چاچا تسیں آتشی پنک ای کرو میری چوڑیاں وی ایسے کلر وچ نیں۔ میراثی بولیا دیکھو بیٹا جی ایہ جہڑا خاکی رنگ ہوندا اے نا ایہ بڑا پکا ہوندا اے باقی سارے رنگ کچے ہوندے نیں۔ ہن کڑی نے دوپٹہ غصے نال کھوہ لیا تے بولی چاچا لگدا اے تہانوں گلاں توں علاوہ ہور کجھ نہیں آئوندا میں کدھروں ہور رنگ کرا لواں گی۔ میراثی نے غصے نال دوپٹہ واپس کھوہیا تے غصے نال بولیا ایدھر لیامیں رنگ آتشی پنک ای کراں گا پر یاد رکھنا سُک کے ایہنے فیر خاکی ہو جانا اے۔ بس کجھ وی نہ ہویا سارے رنگ سُک کے خاکی ہو گئے۔ ہر تقریر این آر او نہیں دیواں گا تے ختم ہوندی اے۔ بندہ پچھے این آر او منگیا کنہے اے؟ بناں این آر او دے ای برادران یوسف باہر نکل گئے نیں۔ اللہ اللہ خیرسلا؟ دوجی گل رہی کہ مافیا دی کہ اوہ نظام نوں چلن نہیں دے رہے تے مافیا وی اوہناں دا ای اے۔ تریجی گل کہ بیوروکریسی اوہناں دیاں راہواں وچ روڑے اٹکا رہی اے؟ واضح رہوے کہ بیوروکریسی نوں ٹھیک کرنا وی اوہناں دا کم اے جو سربراہ ایہ خرابیاں دور نہیں کر سکدا اوہ مہنگائی توں علاوہ کجھ نہیں کر سکدا۔ یاد رہوے کہ ہن صدیاں تک سیاسی گھاہ دا رنگ وی نیلا ای رہوے گا تے آن والے وزیراں دے کپڑیاں نوں جو وی رنگ دے لوو اوہ خاکی رنگ ای چڑھے گا۔٭٭