جم جم جیوے دیس پنجاب دا مہان پُتر۔۔۔

چیئرمین پنجابی میڈیا گروپ مدثر اقبال بٹ ہوراں دی ورھے گنڈھ دے موقعے اُتے مِتراں دااُچیچا اِکٹھ

رپورٹ:علی قیصر شاہ

پنجاب تے پنجابی نوں اپنی حیاتی دا مقصد بنان والے چیئرمین پنجابی میڈیا گروپ مدثر اقبال بٹ ہوراں دی ورھے گنڈھ پنجاب ہائوس لہور اندر منائی گئی جیہدے وچ نامور صحافیاں، ادیبا ں تے قلمکاراں رَلت کیتی۔ایہہ محفل سجاون والے سجناں تے متراں پنجاب دے ایس مہان سیوک لئی محبت بھریاں گلاں سانجھیاں کیتیاں۔رلت کرن والیسجناں مدثر اقبال بٹ ہوراں دی ماں بولی لئی سیوا نوں سراہندیاں ہوئیاں اونھاں دی شخصیت دے وکھو وکھ پَکھاں اُتے اپنے اپنے اندا ز نال جھات پائی۔
ایڈیٹر روزنامہ میڈیا نیوز نفیس بزمی ہوراں دا کہنا سی کہ بٹ صاحب نوں اسیں ہمیشہ خوشیاں وَنڈدیاں ای ویکھیا اے تے اینھاں دیاں پنجابی زبان و ادب لئی خدمات تریخ دے ورقیاں اُتے سنہری حرفاں نال لکھیاں جان گیاں۔اوہنھاں دا کہنا سی کہ میری دعا اے کہ رب سوہنابٹ صاحب نوں اوہنیاں ای خوشیاں دیوے جنھیاں اوہ وَنڈدے۔

سینئر صحافی اور ایڈیٹر روزنامہ آن ریکارڈ قاضی طارق عزیز ہوراں دا کہنا سی کہ مدثر اقبال بٹ ہوریں میرے وڈے وِیر، باپ تے راہنما وانگوں نیں جنھاں دے احساناں دا بھار ہمیشہ میرے موہڈیاں اُتے رہندا اے۔او ہناں آکھیا کہ پنجابی تحریک دی جد وی گل ہوئے گی،مدثر اقبال بٹ ہوراں دا نام سب توں اُتے لکھیا جائے گا ۔
تقریب دے اُچیچے پروہنے بیوروچیف پنجاب، بول نیوز بابر ڈوگر ہوراں گل بات کردیاں آکھیا کہ پنجابی بولی لئی بٹ صاحب دیاں خدمات اپنی تھاں پر اینھاں دی شخصیت وچ عاجزی تے انکساری سب توں وڈی خوبی اے ۔ اینھاں نوں اسیں ہمیشہ ماڑے بندے دے نال کھلوتے ویکھیا تے ظالماں دے خلاف مظلوماں دا سہارا بنے۔ دوستاں نال مضبوط کَند بن کے کھلوندے نیں تے یاریاں وچ کدی نفع نقصان بارے نہیں سوچدے بس دوستیاں نبھاندے نیں۔ ایہدا عملی مظاہرہ میں ویکھیا جدوں بول گروپ ماڑے حالات وچوں لنگھ رہیا سی،مالک جیل چلا گیا۔حالات برے ہوگئے تے کوئی ساتھ دین والا نہیں سی۔اجیہے اوکھے ویلے وچ بٹ صاحب اوہ واحد صحافی آگو سَن جنھاں ساڈا ہر تھاں تے بغیر کسے مفاد یا تعلق دے ساتھ دِتا۔میں حیران ہوجانا واں کہ کوئی شخص اتنا بے لوث کیویں ہو سکدا اے۔
صدر پنجابی میڈیا گروپ ندیم رضا ہوراں تقریب دی میزبانی دے فرائض انجام دین دے نال نال بٹ صاحب دی شخصیت بارے بھرویں گل بات کیتی تے اوہناں نال لنگھائے ویلے نوں یاد کر کے سُنن والیاں دے چہریاں اُتے مسکراہٹاں کھلاریاں۔ اوہناں تریخی حوالیاں نال تجزیہ کردیاں آکھیا کہ پنجاب دی رہتل نوں محفوظ رکھن وچ بٹ صاحب ہوراں دا بھرواں کردار نہ ہندا تے شاید آون والے وقت اندر پنجابی رہتل صرف کتاباں تے کہاوتاں وچ نظر آوندی۔اونھاں پنجاب ہائوس دے باقی پروگراماں دے نال نال اِک اہم پراجیکٹ بارے دسدیاں آکھیا کہ اسیں چھیتیگرومکھی رسم الخط سکھان لئی کلاساں دا آغاز کر رہے آں جیہدے استاد پاکستان دے پہلے سکھ پروفیسر ڈاکٹرکلیان سنگھ کلیان ہوری ہون گے۔
وائس چیئرمین پنجابی میڈیا گروپ بلال مدثر بٹ ہوراں دا کہنا سی کہ مدثر اقبال بٹ ہوراں دی چھتر چھاویں اسیں جیہڑے منصوبے شروع کیتے نیں اوہناں دا تعلق ماں بولی نال محبت تے کمٹمنت نال اے۔ اسیں پنجاب ہائوس نوں مدثر اقبال بٹ صاحب دے اونھاں خواباں دی عملی تفسیر بنائون دی کوشش کر رہے آں جیہڑے اوہناں پنجابی دا جھنڈا چُکدیاں ویکھے سَن۔ رب سوہنا ساڈے ایس میرِ کارواں نوں سلامت رکھے تے اسیں ہر سال اِنج ای اینھاں دا جنم دیہاڑ منائوندے رہیئے۔میں سمجھنا کہ ایہہ اِک شخصیت دا جنم دیہار نہیں بلکہ ایہ پنجاب سیوا دے عزم اُتے کاربند رہن دے وعدے دا ناں اے جیہڑا اسیں ہمیشہ اپنے ٹیم لیڈر مدثر اقبال بٹ ہوراں نال کرنے آں۔

منے پرمنے آئی ٹی ایکسپرٹ تے سوشل میڈیا انفلوئینسر اشتیاق کرامت ہوراں دا کہنا سی کہ پنجابی میڈیا گروپ نے سوشل میڈیا راہیں جیہڑیاں انقلابی روایتاں دی نینہہ رکھی اے او پنجابی رہتل تے بولی نوں محفوظ رکھن لئی بڑی اہم ثابت ہوئے گی۔

چیئرمین پنجابی میڈیا گروپ مدثر اقبال بٹ ہوراں خطاب کردیاں سب رلت کرن والے دوستاں دا شکریہ ادا کیتا تے ایس تقریب دا پربندھ کرن تے اپنے نائب بلال مدثر بٹ ہوراں واسطے خصوصی محبت تے شفقت دا اظہار کیتا۔اوہناں آکھیا کہ ایہہ ادارہ جو میں 2 ورکراں توں شروع کر کے اج اگر 100 لوکاں تیکر اپڑایا اے تے ایہدے وچ تہاڈے جہے سجناں دیاں کوششاں اور محبتاں شامل نیں تاں ای رب سوہنے نے میرے اُتے اپنا کرم رکھیا۔
تقریب دے اہتمام اتے سالگرہ دا کیک کٹیا گیا۔