عورت راج

لکھت:ابرار ندیم

بوہت پرانی گل نہیں اے جدوںساڈے ادیباں وچ لکھتاں نال اپنی تصویر چھپوان دا رواج نہیں سی۔ایہناں چے دو طراں دے لوک سن اِک اوہ جنھاں نوں اپنی تصویر دی بجائے لکھت نال پچھانے جان دا شوق سی تے دوجے اوہ جیہڑے زنانیاں نال ملدے جُلدے قلمی ناواں نال لکھدے سن۔جیویں اَج کل کجھ لوک کسے اخبار یاں رسالے وچ اپنی تصویر چھپوان لئی سر دھڑ دی بازی لا دیندے نِیں امکان اے بئی اوہناں دناں وچ زنانیاں دے ناں نال لکھن والے اوہ مرد حضرات اپنی تصویر نہ چھپوان لئی اینا زور لاندے ہون گے سدھی گل اے اپنی دوکانداری تے عزت کنوں پیاری نہیں ہُندی خاص طور تے ایس لئی وی کیوں جے سُنیااے بئی اوس دور وچ زنانہ ناواں نال لکھن والے ادیباں دی بڑی بلے بلے سی۔اوہناں دی لکھت تے جیویں دی وی ہُندی سی پر اوہناں دے ناں دی اینی برکت سی بئی اوہناں دے چاہن والے اوہناں دیاں کتاباں دھڑا دھڑ مُل لیندے سن۔ہُن ویلا بدل گیا اے خیر نال زنانہ ناواں نال لکھن والے تے نہیں رئے پر زنانہ صفت والے ادیب تے صحافی اَج وی ساڈے وچکار پوری طراں موجود نِیں۔ایہہ اوہ دیہاڑی دار لوک نِیں جنھاں دا اپنا کوئی نظریہ یاں سوچ نہیں تے قلم دے ایہناں مزدوراں نوں دو ویلے دی روٹی تے جتھے مزدوری مل جاوے ایہہ شکریہ نال اوتھے ای اپنے ڈیرے لادیندے نِیں۔
خیر ایہہ اِک ہور موضوع اے اجے میں تہانوں ایہہ دسنا چاہ رہیاں واں بئی ایہہ وسیب جتھے اسی رہ رہے آں ایہہ مرداں دا نہیں سراسر زنانیاں دا وسیب اے جتھے زندگی دے ہر شعبے چے پیر پیر تے زنانیاں نوں مرداں تے فوقیت دتی جاندی اے۔نِرے ادبی حوالے نال ای گل کیتی جاوے تے ایس سلسلے چے شبنم رومانی،زیبا ناروی تے روحی کنجاہی ورگے زنانہ ناواں نال ملدے جلدے ناواں والے شاعراں دی مثال پیش کیتی جاسکدی اے۔بھاویں ایہہ سارے کسے شک شبے توں بغیر اپنی اپنی تھاں بڑے وڈے شاعر نِیں پر بوہتے لوکی فیر وی ایہناں نوں ایہناں دے کلام توں ودھ ایہناں دے ناں دی وجہ نال جان دے تے پسند کردے نِیں۔اینی زنانہ پروری تُوں بعد وی جدوں زنانیاں دے حق لئی کھلوتیاں تنظیماں ایس معاشرے نوں مرداں دا معاشرہ کہہ کے عورت تے مرد دی برابری دی گل کردیاں نِیں تے ساڈے جیہے نمانیاں مرداں نوں حیرانی دے نال افسوس تے ہووے گا۔تُسی کسے ٹی وی،اخبار یا مشہوری بورڈ تے سرخی تے شیونگ کریم توں لے کے ٹریکٹر ٹرالی تک دے اشتہار ویکھ لو تہانوں ہر تھاں تے عورتاں دا راج نظر آوے گا،کدی کسے لان دے اشتہار چے تُسی کسے مرد نوں لان دے لیڑے پائیاںنہیں ویکھیا ہووے گا۔ایہدے تُوں ہٹ کے وی تُسی تاریخ چوں وڈے وڈے جابر تے تگڑے راجے،مہاراجیاں دی زندگی دے حالات پڑھ لو ایتھے وی تہانوں ایہناں تے راج کردیاں ہوئیاں ایہو مہارانیاں تے شہزادیاں نظر آن گیاں۔
اَج خط دی جگہ سمارٹ فون نے لے لئی اے جیہدے اندر نت نویں ایپ تے فوٹو فلٹر نِیں۔انج دی اِک دلچسپ ایپ اے جیہدے نال فوٹو دی جنس وی بدلی جاسکدی اے ایہدے راہیں تُسی کسے وی مرد دی فوٹو نوں زنانی تے زنانی دی نوں مرد دی شکل دے سکدے او۔ایس ایپ راہیں میں ہُن تک اپنے کئی بیلیاں نوں لمیاں پلکاں تے ناگن زلفاں والیاں’’ حسینائواں‘‘ بنا بیٹھاں۔تہانوں ایہہ جان کے بڑی حیرانی ہووے گی بئی ایہناں’’پری چہریاں‘‘ چے میرے بعض ایہو جیہے بیلی وی شامل نِیں جنھاں نوں میں لاڈ نال تے اُنج وی چبڑ یا بجو کہنا واں۔ایس توں اُلٹ جدوں میں ایس ایپ راہیں کجھ چنگیاں بھلیاں سوہنیاں نظر آن والیاں زنانیاں نوں مردانہ روپ دتا تے اوس روپ چے اوہناں نوں ویکھ کے مینوں بوہت مایوسی ہوئی بئی ہُن تک ایہناں زنانیاں دااینویں مفت وچ ٹہکا بنیا ہویا سی۔پتا نہیں ایہہ زنانیاں دا ہُنر اے یا مرداں دا احساس کہ اِک عام جیہی شکل صورت دی زنانیاں وی سانوں مرداں نوں’’ حور پری‘‘ نظر آندی اے۔ ایہدے مگروں وی رب جانے اوہ کون لوک نِیں جیہڑے ایہہ آکھدے نِیں بئی ایہہ مرداں دا معاشرہ اے۔ مثلاََ تُسی ایہو اِک واقعہ نوں ویکھ لو کجھ دن پہلے میرے بیلی جذباتی نے کسے موبائل ایپ دے راہیں اپنی فوٹو دی جنس بدل کے اِک جھوٹھی موٹھی حسینہ دے ناں تے اپنی زنانہ فوٹو نال فیس بک تے نواں اکائونٹ بنایا۔کجھ دن بعد میں جذباتی تُوں اوہدے نویں اکائونٹ تے لوکاں دے ردعمل بارے پُچھیا تے اوہ بڑے مزے نال آکھن لگا’’بوہت ودھیا! پہلے میں لوکاں نوں فرینڈ ریکوئسٹ بھیجنا ساں تے اوہ قبول نہیں سی کردے ہُن لوک مینوں فرینڈ ریکوئسٹ بھیجدے نِیں تے میں اوہناں نوں مونہہ نہیں لاندی‘‘۔ایہہ کہہ کے اوہنے کسے حسینہ وانگوں ای اِک ادا نال والاں دی لٹ نوں اپنے مونہہ توں پرے ہٹاندیاں ہوئیاں آکھیا’’ہُن تک نویں فیس بک اکائونٹ تے مینوں بے بہا فرینڈ ریکوئسٹاں آچکیاں نِیں۔کِتھے اوہ ویلا سی جدوں کوئی مینوں مونہہ لان لئی تیار نہیں سی تے ہُن ایہہ حال اے بئی ملک دے وڈے وڈے تے اہم لوک مینوں فرینڈ ریکوئسٹ بھیج کے انباکس وچ میرے نال میل جول ودھان لئی میسج تے میسج کر کے مرے جاندے پئے نِیں پر میں ایس معاملے چے بڑی محتاط آں پہلے چنگی طراں ریکوئسٹ گھلن والے دے پروفائل دی چھان پھٹک کرن توں بعد صرف کم دے لوکاں نوں ای اپنی فرینڈ لسٹ وچ شامل کرنی آں۔میری اِک فضول جیہی پوسٹ تے وی لوک جس انداز چے میری خوبصورتی اور ذہانت تے بلے بلے کردے نِیں مینوں تے جین دا سواد ای ہُن آرہیا اے۔میں تے سنجیدگی نال سوچ رہی آں کہ فیس بک تُوں اپنا پہلے والا اکائونٹ ہمیش ہمیش لئی ختم کرکے اپنی باقی دی زندگی ہُن ایسے زنانیاںوالے اکائونٹ دے سہارے گزار دواں۔نالے ہاں ایہہ وی سن لو انباکس وچ مینوں ماڈلنگ لئی وی کنیاں آفراں دے نال ایک مشہور ٹی وی ہوسٹ ولوں کوہوسٹ دی پیشکش وی ہو چکی اے پر میں کسے نوں وی ہاں نہیں کیتی تے نہ ای کدی کراں گی تینوں تے پتا ای اے میں اِک گھریلو جیہی قسم دی کُڑی آں‘‘۔٭