تبدیلیاں تے الیکٹرانک مشین

لکھت:سعد اللہ شاہ

اپنا مزاج کار بدلنے نہیں دیا
دل نے کوئی نظام بھی چلنے نہیں دیا
گردش میں ہم رہے ہیں تو اپنا قصور کیا
تونے ہمیں کشش سے نکلنے نہیں دیا
دوجے پاسے وی تے صورتحال انج دی اے کہ پیوستہ رہ شجر سے امید بہار رکھ‘ کوئی پتہ نہیں کیہ ہون جا رہیا اے تے ایہدے تے وی یقین نہیں آئوندا کہ کیہ کجھ ہو چکیا اے۔ الجھان والیاں نے سانوں کیویں الجھائی رکھیا اے اصل مقصد ایہہ وے کہ لوکاں دا دھیان اصل ایشوز ول نہ جاوے تے ایس منصوبے وچ اوہ کامیاب وی نظر آئوندے نیں۔ کسے نوں اقتدار وچ لیاندا جا رہیا اے تے کسے نوں ایس دائرے چوں کڈھیا جا رہیا اے۔ ایہ تبدیلی کافی عرصے توں جاری اے۔ ایسے پاروں اوہناں نوں معروف معنیاں وچ تبدیلی سرکار کہہ دتا جاندا اے۔ یقینا کارکردگی تسلی بخش ہون تے ای تبدیل کیتا جاندا ہووے گا۔ مینوں تے قتیل شفائی یاد آ گئے جہناں نے عدم دے شعر دی پیروڈی اک لفظ بدل کے کر دتی سی۔
شاید مجھے نکال کے کچھ کھا رہے ہوں آپ
محفل میں اس خیال سے پھر آ گیا ہوں
چلو چھڈو عدم نے جواباً قتیل شفائی دے شعر نوں کس خوبی نال بدل کے رکھ دتا۔ سودائی نوں قتیل شفائی کیویں بنا دتا اڑتے اڑتے آس کا پنچھی دور افق میں ڈوب گیا روتے روتے بیٹھ گئی آواز قتیل شفائی کی‘ صورتحال دلچسپ اے کہ فردوس عاشق اعوان نے استعفیٰ دے دتا تے عون چوہدری وی چھڈ گئے چلو ایہدے تے بعد وچ گل کرنے آں‘ پہلے نوازشریف دے کیس تے اک نظر ماریئے کہ اوہناں دے ویزے وچ توسیع نہ ملن تے رائی نوں پہاڑ بنا دتا گیا حالاں کہ سارے جان دے نیں کہ ہزاروں لغزشیں حائل ہیں لب پہ جام آنے تک‘ انگریز بڑے چالاک لوک نیں اوہ اپنے احسان دا احساس دوانا نہیں بھلدے۔ کہن دا مطلب ایہہ وے کہ سب اپنے اپنے قنوناں نال کھیڈنا جان دے نیں۔ ایہ سارے دو چار دن دا تماشا اے اصل مسئلہ تے ایہہ وے کہ نوازشریف کیویں باہر گئے کیہ کوئی ہور غلام وی کدی انج نکل گیا جیویں مکھن چوں وال۔ کسے نے چنگی گل لکھی سی کہ جے گھیو ٹیڑھی انگلی نال نہ وی نکلے تے اوہنوں گرم کر لیا جاوے۔ کیہ ایہ سچ نہیں کہ ایس مقصد لئی باقاعدہ اک ماحول بنایا گیا تے نوازشریف دے نکل جان دے بعد ماحول خراب ہوندا گیا۔ عمران خان دی گل اپنی تھاں ٹھیک ہووے گی کہ نوازشریف دی حالت بیان کیتی گئی تے اوہناں دے دوستاں دا دل بھر آیا تے اک خوف لگ گیا کہ کدھرے ایہ مر ای نہ جاوے وغیرہ وغیرہ‘ پر ایہ سوال اپنی تھاں موجود اے کہ میڈیکل رپورٹاں کنہے بنائیاں کنہے پیش کیتیاں‘ کنہے تصدیق کیتی تے کنہے اوہناں نوں جان دی اجازت دتی۔ ایہ سلسلہ ڈاکٹر فیصل توں لے کے وزیر صحت تک جاندا اے۔ ن لیگ وی ایہو تاثر دے رہی اے کہ حکومت نے آپ اوہناں نوں باہر گھلیا تے ہن اوہ علاج کروا کے ای آن گے۔ اصل وچ چنتا ہن پیدا ہوئی اے کہ اوہ فعال نظر آئوندے نیں۔ انج حیرت ہوندی اے کہ اسیں معمولی جہی گل نوں وی لے نسنے آںاجے تے اپیل دا مرحلہ اے تے ہزاراں لغزشیں ہیں لب پہ جام آنے تلک‘ ایہ تاثر ختم ہونا چاہیدا اے کہ حکومت دا مسئلہ صرف نوازشریف نیں۔ اوہ باہر ہون یاں ادھر‘ اوہو نظر وچ نیں‘ اوہ آئس کریم کھا رہے نیں اوہ پولو میچ ویکھ رہے نیں تے اوہ خطاب کر رہے نیں۔
جب توڑ دیا رشتہ ہی اس زلف رسا سے
اب لاکھ وہ بل کھایا کرے اپنی بلا سے
مینوں آفریدی بڑے ای معصوم تے پیارے لگے جدوں اوہناں نے اپنے وڈے بھائی عمران خان نوں صلاح دتی کہ لالہ جی ہن نوازشریف لوکاں نوں چھڈ دیو۔ اوہ چور سن ڈاکو سن یاں جو کجھ وی سن لوک تے بھائی جان تہاڈے ول ویکھ رہے نیں۔ تسیں اپنی پرفارمنس وکھائو۔ پورٹل تے شکایتاں سننا وی چنگی گل اے اوہناں دے مسئلیاں دا خاتمہ وی چنگا اے۔ پر ایہ جو سانجھا مسئلہ اے کہ مہنگائی دا جن اوہناں نوں ڈرا رہیا اے تے باقاعدہ محاورے دے عین مطابق کہ مہنگائی دن بدن ودھ رہی اے۔ دو ورھے پہلاں جو لوہا 101 روپیے سی کجھ دیہاڑ پہلاں 150 دا سی ہن 170 روپیے فی کلو ہو گیا اے۔ ایہ تے نمونہ مشت از خروارے دے طور تے میں مثال دتی اے۔ چلو تیل چھوٹی دکاناں نے اٹھا دتا اے کہ غریب شہری خریدن دی طاقت نہیں رکھدا۔ ایہدی تھاں ناقص تے مضر صحت گھیو تے آئل جگہ پا رہے نیں۔ مصیبت ایہہ وے کہ زیتون استعمال کرن والے کدھر جان۔ کیسی مزے دی گل اے کہ حکومت مڑ مڑ ایہو کہہ رہی اے کہ صرف مہنگائی دا مسئلہ رہ گیا اے۔ کیا کہنے تہاڈے جناب‘ تسیں ایہ اک ای مسئلہ حل کر دیو ایہو مسئلہ تے خودکشیاں دا کارن بن دا اے فیر بابا فرید دی گل:
پنج رکن اسلام دے تے چھیواں فریدا،ٹک
جے لبھے نہ چھیواں تے پنجے جاندے مُک
جناب باقی سارے مسئلے ایس مہنگائی دے شاخسانے نیں۔ آخر وچ الیکٹرانک مشین دے حوالے نال خبر تے فوٹو کہ وزیراعظم صاحب ایس الیکٹرانک ووٹنگ مشین تے ووٹ کاسٹ کرن دا تجربہ کر رہے نیں۔ انج تے ایس مشین دا اصل تجربہ تے الیکشن وچ کیتا جاوے گا۔ بادی النظر وچ تے انتخابات لئی پیمانے طے کرنا الیکشن کمیشن دا کم اے پر سارے کم حکومت ای کرنا چاہندی اے ہن ہووے گا ایہ کہ اک ہور ایشو تے جھگڑا ہووے گا مشین وچاری تے شیشے وانگوں اے۔ شفافیت وکھاوے گی پر شیشہ گھٹے مٹی والا وی تے ہو سکدا اے۔
محبتوں میں تعصب تو در ہی آتا ہے
ہم آئینہ نہ رہے تم کو روبرو کر تے
سنیا اے الیکٹرانک ووٹنگ دا سافٹ ویئر بڑا ای اعلیٰ قسم دا تیار کیتا اے بس اشارا کرن دی دیر اے۔ مطلوبہ مقصد دی بجاآوری وچ دیر نہیں کرے گا۔ مشین آخر مشین اے خراب وی ہو سکدی اے۔ انسان تے جان بجھ کے خراب ہو جاندا اے پر مشین وچ کوئی وی ٹیکنیکل فالٹ آ سکدا اے جیویں اگلی حکومت دا فیصلہ مشین کرے گی کیہ ایس فیصلے نوں اپوزیشن منے گی؟ کدھرے ایہ نہ ہووے اوہناں نوں اقبال یاد آ جاوے:
ہے دل کے لئے موت مشینوں کی حکومت
احساس مروت کو کچل دیتے ہیں آلات
بہرحال حکومت ایس گل تے اڑی اے کہ اگلے انتخابات وچ مشیناں توں کم لیا جاوے تاں جے کوئی وی دھاندلی دا رولا نہ پاوے تے جے برا بھلا کہوے وی تے مشیناں نوں کہوے۔