کیہ اسیں افغانستان وچ ڈبل گیم کھیڈی ؟

امریکہ نے پاکستان نال ہمیشہ ڈومور دا تقاضا کیتاتے امریکہ نے افغانستان
نال جنگ لڑن دی ساری ذمہ داری گویا پاکستان دے موہڈیاں اُتے پا دتی

اسد اللہ غالب

ایہہ بوہت وڈا شک اے جس دا اظہار امریکہ تے بھارت سنے ساڈے اینکراں دی فوج بار بار پاک فوج نال کر رہی اے ؟
ایس سوال دا جواب بڑا سادہ اے ، ڈبل گیم پاکستان نے نہیں امریکہ نے کھیڈی، اسیں تے ایس دے سچے دل نال حلیف سی، اسیں تے اک نکا جہیا اہلکار دی ادھی رات دی ٹیلی فون کال پریس سر کہہ دتا سی۔ اسیں ایہنوں اپنے اڈے دے دتے اسیں پہلے دن ای افغان طالبان دے سفیر ملاعبدالسلام ضعیف نوں امریکہ دے حوالے کر کے قید خانے وچ اپڑا دتا۔ اسیں ڈاکٹر عافیہ صدیقی نوں امریکی سی آئی اے دی تحویل وچ دے دتا، اسیں درندہ صفت ریمنڈ ڈیوس نوں جیل دی کوٹھری توں کڈ کے امریکی جہاز اُتے بٹھا دتا، اسیں امریکہ دے اک اشارے اُتے اپنے قبائلی علاقیاں وچ موجود طالبان دا بھرکس کڈ دتا۔ ایس توں زیادہ پاکستان کیہ کر سکدا سی، پاکستان دے جرنیل توں لے کے سپاہی تیکر دہشت گردی دی جنگ وچ شہید ہوئے، پاکستان دے ستر ہزار شہری دہشت گردی دے واقعیاں وچ شہادت نال ہمکنار ہوئے۔ پاکستان دی معیشت نوں ڈیڑھ سو ارب ڈالر دا ٹیکا لگیا۔ پاکستان نے اپنا پورا ریزرو چک کے مغربی سرحد اُتے لا دتا جس نال بھارت نوں ہلا شیری ملی تے ایس نے کنٹرول لائن اُتے فائرنگ شروع کر کے شہریاں دی جان و مال ضائع کرن دا سلسلہ شروع کر دتا۔ کیہ پاکستان نے ڈبل گیم ایس لئی کھیڈنی سی کہ ایس دے جی ایچ کیو اُتے حملہ ہوئے، ایس دے آئی ایس آئی دے دفتراں اُتے حملہ ہوئے، واہ کینٹ تے کامرہ کمپلیکس اُتے دہشت گرداں دے بار بار حملے ہون، کراچی وچ پاکستان نیوی دے اڈے اُتے تباہی مچے۔ حقیقت وچ ایہہ ساری کارستانیاں اوہ نیں جیہڑی امریکہ نے ساڈے نال ڈبل گیم وچ کھیڈیاں۔اسیں امریکہ دے حلیف سی ایس نوں فوجی اڈے دتے ہوئے سی پر ایہناں فوجی اڈیاں توں ڈرون اڑا ڑا کے پاکستان اُتے میزائل داغدے رہے۔ امریکی فوج نے اپنی حلیف پاکستانی فوج دی سلالہ چوکی اُتے حملہ کیتا تے ایہنوں زیر و زبر کے دتا تے ایبٹ آباد اُتے امریکی حملہ اک انج دی گھنائونی واردات سی جس نال پاکستانیاں دے دل و دماغ کھول اٹھے کہ کیہ ایہہ سلوک اک حلیف ملک دے نال کیتا جاندا اے۔ وزیراعظم عمران خان کہندے نیں کہ ایبٹ آباد وچ اپریشن دا دن ایہناں دی زندگی دا شرمناک ترین دن سی۔ ہر پاکستانی سوچ رہیا سی کہ ایہہ تے شکر اے کہ اسیں امریکہ دے حلیف سی ایس نے سانوں محدود پیمانے اُتے نشانہ بنایا اے، جے اسیں ایس دے حریف ہوندے تے اوہ ساڈے نال کیہ سلوک کردا۔ امریکی ڈبل گیم ایتھوں تیکر محدود نہیں ایس نے پاکستان دے خلاف اک تیجا فریق وی جھونک دتا۔ بھارتی خفیہ ایجنسی را دے دہشت گرداں نوں افغانستان وچ پناہ دتی گئی جتھے را نے گوادر توں لے کے گلگت تیکر طوفان بدتمیزی مچایا۔امریکہ نے پاکستان نال ہمیشہ ڈومور دا تقاضا کیتا۔ امریکہ نے افغانستان نال جنگ لڑن دی ساری ذمہ داری گویا پاکستان دے موہڈیاں اُتے پا دتی حالانکہ ایہہ جنگ لڑن لئی آپ امریکی فوج وی افغانستان وچ موجود سی تے نیٹو دی دو درجن فوج وی اوتھے تیر کنڈے نال لیس کھڑی سی۔ ایس فوج دا فرض سی کہ اوہ طالبان نال لڑدے تے ایہناں نوں شکست نال دوچار کردے۔ پر ہر قسم دے اسلحے نال لیس ہون دے باوجود ایہہ فوج اپنے محفوظ مورچیاں توں باہر نکل کے لڑن لئی تیار نہ ہو سکی۔ دانا کہندے نیں کہ جنگ ہتھیاراں نال نہیں بلکہ ہتھیاراں نال لڑن والے فوجی دے بل بوتے اُتے لڑی جاندی اے۔ بی باون 30 ہزار فٹ دی بلندی توں بمب ڈیگ سکدے سن پر ایہناں وچوں کوئی بمب نشانے اُتے نہیں ڈیگیا، امریکہ نے کروز میزائل وی داغے جنہاں نال افغان بچیاں دے جسم ٹوٹے ٹوٹے ہو گئے۔امریکی تے نیٹو فوج دے کول رات دے ہنیرے وچ لڑائی دی اہلیت تے صلاحیت موجود سی پر جیہڑی فوج دن دے اجالے وچ ٹریگر دبان توں محروم ہوئے ایہناں دے نائٹ ویژن آلات محض کھڈونے ثابت ہوئے۔ نیٹو فوج وچ ترکی دی اک انج دی فوج وی شامل سی جس نے افغان جنگ دے دوران اپنے ملک وچ فوجی انقلاب برپا کرن دی کوشش کیتی تے ترک شہریاں نے باغی فوج دے ٹینکاں نوں شہراں دی سڑکاں اُتے قبضے وچ لے لیا تے ترک فوج دے کپڑے اتار کے ایہناں دی پیٹی نال ای ایہناں اُتے کوڑے برسائے گئے۔ ایس توں ظاہر ہوندا اے کہ امریکی تے نیٹو فوج صرف چوکلیٹ تے آئس کریم ہیرو سی، کیہ پاکستان دے یس سر کہن دا مطلب ایہہ وی سی کہ امریکی فوج نوں افغانستان وچ لڑن دی تربیت وی پاکستانی فوج تے آئی ایس آئی دیوے گی۔
مینوں دو ہزار چھ دی اوہ دوپہر نہیں بھلدی جدوں راولپنڈی دے آرمی ہائوس وچ کوئی اک ہزار میڈیا نمائندیاں نوں مدعو کیتا گیا جنہاں نال صدر پرویز مشرف نے خطاب کرنا سی۔ خیال ایہہ سی کہ اوہ چار عرب ملکاں دے اک ہنگامی دورے توں واپس آئے نیں جس وچ ایہناں دا مقصد مڈل ایسٹ وچ امن قائم کرنا سی تے ظاہر اے ایس میٹنگ دے ختم ہون اُتے ایہناں نوں ایسے موضوع اُتے گل کرنی چاہیدی سی پر جنرل پرویز مشرف دا لہجہ غصے نال تلملا رہیا سی ایہناں دا کہنا ایہہ سی کہ پاکستان نے وار آن ٹیرر وچ دہشت گرداں نوں ٹھکانے لان وچ کوئی کسر نہیں چھڈی پر فیر وی امریکہ بہادر منہ پھاڑ کے ڈومور دا تقاضا کر رہیا اے۔ ایسے صدر پرویز مشرف نوں دو وار پلاں دے تھلے بارود لا کے اڑان دی کوشش وی کیتی گئی سی۔ ایہناں وارداتاں وچ اوہ ای لوک ملوث سن جنہاں نے امریکی تے را کے ٹھکانیاں وچ دہشت گردی دے تربیت دتی گئی سی۔ کیہ اسیں امریکہ توں پچھ سکنے آں کہ جنرل ضیاء الھق دے بعد اک ہور پاکستانی صدر نوں ٹھکانے لا کے اوہ پاکستان نال کس دوستی دا مظاہرہ کر رہیا اے۔
کون نہیں جان دا کہ پاکستان نے پہلی افغان جنگ لاٹھیاں تے توڑے دار بندوقاں دی مدد نال شروع کیتی۔ امریکی صدر جمی کارٹر نے پاکستان نوں جس امداد دی پیش کش کیتی سی ایہنوں صدر ضیاء الحق نے مونگ پھلی دے برابر کہہ کے مسترد کر دتا سی۔ ایہہ ٹھیک اے کہ ایس دے بعد امریکہ تے ایس دے اتحادیاں نے افغان جہاد لئی ارباں ڈالر دتے پر جدوں جنگ دا پانسہ پلٹ گیا تے سوویت فوج دریائے آمو دے پار چلی گئی تے ایس دے بعد دنیا دی دوجی وڈی سپر پاور سوویت روس پارہ پارہ ہو گئی تے امریکہ نے پاکستان دا بازو مروڑ کے ایس توں جنیوا عمل معاہدے اُتے دستخط کروائے۔ تے آپ پاکستان تے افغان مجاہدین نوں کلا چھڈ کے وائٹ ہائوس تے پینٹا گون واپس چلا گیا۔ امریکہ جے افغان جہاد دے نال مخلص ہوندا اوہ افغانستان وچ نویں حکومت دی تشکیل وچ دلچسپی لیندا پر ایس نے بہتر سمجھیا کہ افغان لشکر اک دوجے دا سر پاڑدے رہن تے افغان سرزمین افغانیاں دے لہو نال لال ہوندی رہوے، ایس توں ودھ ڈبل گیم امریکہ ہور کیہ کھیڈ سکدا اے ایہو کھیڈ ایس نے اج کھیڈیا اے۔ 31 اگست تیکر اوہ اپنی فوج تے کڈ کے لے جائے گا پر دنیا دے ایس سوال دا جواب امریکہ دے کول نہیں کہ افغانستان دا مستقبل کیہ ہوئے گا۔ ڈبل گیم ہور کیہ ہوندی اے۔ کیہ امریکہ دے کیتے دی ذمہ داری تے جواب دہی پاکستان اُتے عائد ہوندی اے۔