ایہ دھرتی میری سونا یارو میں ایہدا سنیارا

ڈاکٹر رزاق شاہد

کہندے نیں کہ گدڑ دی جدوں موت آئوندی اے تے اوہ شہر دا رخ کردا اے۔ بھارت دی موت اوہنوں شہر ول لیائی۔ اوہ وی شہر لہور ول‘ جو ساڈا دل اے کہ ایتھے داتا سرکار دا بسیرا تے میاں میرا دا ڈیرا اے۔ رات دے انھیرے وچ لہور تے حملہ کرن والے بھارت دا منصوبہ سی کہ اچانک شب خون مار کے لہور تے قبضہ کرکے تے صبح دا ناشتہ جمخانہ کلب لہور وچ کراں گے پر اوہ ایہ بھُل گیا کہ اوہنے کہڑی قوم نوں للکاریا اے؟۔
ستمبر 65ء دی جنگ دو ملکاں دے وکار اوہ پہلی بین الاقوامی جنگ سی جہدے وچ اک فریق نے‘ بین لااقوامی سرحد پار کرکے دوجے فریق تے جنگ مسلط کیتی۔ حقیقت وچ ایہ جنگ اوس تنازعے دا شاخسانہ سی جو کشمیر تے بھارت دے زبردستی قبضے دے نتیجے وچ پیدا ہویا۔ مسلم اکثریتی علاقہ ہون دی وجہ نال کشمیر دا اصولاً پاکستان دے نال الحاق ہونا چاہیدا سی پر کشمیر نوں زبردستی ہندوستان دے تسلط وچ دتا گیا جہدے تے کشمیریاں نے احتجاج کیتا تے اوہناں دی آواز دبان لئی اوہناں تے فوج کشی کیتی گئی۔ ایس طرح کشمیریاں دا جینا حرام کر دتا گیا۔ اک پاسے اپریل 65ء وچ رن آف کچھ دے سرحدی علاقیاں وچ پاک بھارت کھچاء ودھ گیا ایتھوں تک کہ دوہاں پاسے دی فوج نے اک دوجے دیاں فوجی چوکیاں تے حملے شروع کر دتے۔ دوجے پاسے ایس توں وی ودھ کھچاء اپریشن جبرالٹر دی وجہ نال ودھیا۔ اگست 65ء وچ بھارتی فوج نے درگاہ حضرت بل دی بے حرمتی کیتی جہدے نال کشمیری آپے توں باہر ہو گئے تے اوہناں نے بھارتی فوج دے خلاف مسلح جدوجہد شروع کر دتی پاکستان نے اوہناں دی اخلاقی تے عسکری حمایت دا اعلان کر دتا۔ پاکستانی کشمیر توں سینکڑوں کشمیری رضاکار ایس مسلح جدوجہد دا حصہ بنے۔ ایہدے جواب وچ بھارتی وزیراعظم لال بہادر شاستری نے دوٹوک الفاظ وچ پاکستان نوں دھمکی دتی کہ ہن اسیں مرضی دے وقت‘ اپنی مرضی دے محاذ کھولاں گے۔ بھادوں دا مہینہ‘ ہلکی ہلکی بوندا باندی نال ہون والے کچڑ تے تلکن پاروں جنگی حکمت عملی لئی نامناسب خیال کیتا جاندا اے کہ ایہدے وچ ٹینکاں دی نقل و حرکت تے فوج دی پیش قدمی سست روی دا شکار ہو جاندی اے پر بھارت نے موقع غنیمت جان کے لہور‘ قصور تے سیالکوٹ دے محاذاں تے تن پاسیوں اچانک حملہ کرکے پاکستان نوں سرپرائز دینا چاہیا پر بھارتیاں دی خام خیالی سی کہ شاید پاکستانی فوج سو رہی ہووے گی جو ایس اچانک حملے توں سنبھل نہیں سکے گی پر بھارتیاں دی بدبختی کہ ایس اچانک حملے دے باوجود پاکستانی فوجاں نہ صرف چوکس سن سگوں ہر قسم دے سرپرائز دا منہ بھن جواب دین لئی تیار سن۔
بھارت نوں اندازا نہیں سی کہ اوہدا اجہی قوم نال واہ پیا اے جو زندگی توں ودھ موت نال محبت کردی اے۔ راتوں رات لہور تے قبضے دا خواب ویکھن والیاں نوں بہادر سپوتاں نے جوابی کاروائی کرکے برکی دے محاذ تے 9 گھنٹے روکی رکھیا جہدے نال پاکستانی فوج نوں اپنی پوزیشن بہتر بنان دا موقع مل گیا۔ واہگہ بارڈر دے نیڑے بی آر بی نہر قدرتی طور تے بھارتی فوج دے سامنے اک مضبوط دفاعی دیوار ثابت ہوئی۔ جتھے میجر عزیز بھٹی ورگے مجاہداں نے بھارتی فوج نوں نتھ پائی۔ میجر عزیز بھٹی ورگے بہادراں نے بھارتی فوج دا لہور وچ ناشتے دا منصوبہ بی آر بی نہر وچ روڑھ دتا۔ اوہناں نے وطن عزیز تے جان قربان کرکے جام شہادت نوش کیتا جہدے تے اوہناں نوں سب توں وڈا فوجی اعزاز نشان حیدر نال نوازیا گیا۔ پاکستانی فوج دے اج سپوتاں نے بھارتی علاقے وچ وڑ کے کھیم کرن نامی قصبے تے سبز ہلالی پرچم لہرا دتا۔ سخت مزاحمت تے بھارت اپنی فسٹ انڈیا آرمر ڈویژن جہنوں ناقابل تسخیر سمجھدا سی تے 16 کیولری جہنوں فخرہند کہندا سی ٹینکاں سنے سیالکوٹ دے چونڈہ محاذ تے آ گیا۔ ایہو اوہ موقع سی جتھے مجاہد جذبہ شہادت نال سرشار ہو کے سینیاں نال بمب بنھ کے ٹینکاں دے اگے لیٹ گئے۔ اوہناں نے چونڈہ نوں بھارتی ٹینکاں دا قبرستان بنا دتا۔
اودھر پاک فضائیہ نے بھارتی ٹینکاں نوں نشانہ بنا کے بھارت دا لک بھن دتا۔ پاک فضائیہ دے قابل فخر ہوا بازاں سرفراز رفیقی تے یونس حسن نے جاناں دا نذرانہ پیش کرکے بھارتی فوجی اڈیاں آدم پور‘ ہلواڑا‘ پٹھانکوٹ تے جام نگر دی اٹ نال اٹ وجا دتی۔ اودھر ایم ایم عالم نے شاہیناں دے شہر سرگودھا دی فضاواں وچ اپنے سیبر طیارے توں اک منٹ وچ چھ جہاز ڈھا کے بھارتی فضائیہ دا کچومر کڈھ دتا۔ حق و باطل دے ایس معرکے وچ پاک بحریہ کسے توں پچھے نہیں سی۔ اوہنے اپنی قابلیت دے جوہر وکھائے تے بھارتی بحری اڈے دوارکا دیاں بنیاداں ہلا دتیاں تے دوجے پاسے ساڈی آبدوز غازی نے بھارتی بحری بیڑے لنگری نوں تباہ کر دتا۔
ستاراں دن دی ایہ جنگ تاشقند معاہدے دے نتیجے وچ ختم ہو گئی پر ایہناں ستاراں دیہاڑیاں وچ ای بھارت دا غرور تے تکبر مٹی وچ مل گیا۔ اوہنوں اندازہ ہو گیا کہ اوہنے کس جاں فروش قوم نوں للکاریا اے؟ اوہنے اوہناں غازیاں تے مجاہداں نوں چھیڑیا اے جہڑے سر تے کفن بنھ کے شہادت دا جام نوش کرن لئی ہر ویلے تیار رہندے نیں۔٭٭