افغانستان نوں کلا چھڈا ںگے نہ بھارت نوں دہشت گردی کرن دیاں گے

پورے ملک وچ علما اجتماعات دے بعد دسمبر وچ پنجویں عالمی پیغام اسلام کانفرنس بلائی جائے گی

سید عدنان فاروق

پورے ملک دے علماء و مشائخ نے افغانستان دے مسئلہ اُتے حکومت دی پالیسی نوں قومی امنگاں دے مطابق قرار دیندے ہوئے عالمی دنیا نال مطالبہ کیتا اے کہ موجودہ حالات وچ افغانستان نوں کلا نہ چھڈیا جائے۔ افغان طالبان نے جیہڑے اعلان کیتے نیں تے جس تحمل و بردباری دے نال دوان معاملات نوں طے کر رہے نیں ایس وچ ایہناں دی معاونت کیتی جائے تاکہ افغانستان وچ امن ہوئے کیوں جے افگانستان دے امن نال پورے خطے دا امن وابستہ اے ایس مقصد لئی ہندوستان نوں خطہ وچ عالمی دہشت گرد تنظیماں دے ذریعے بدامنی پھیلان توں روکیا جانا ضروری اے۔ پاکستان علماء کونسل ایس پیغام نوں اقوام عالم تیکر اپڑان لئی آئندہ دناں وچ پورے ملک وچ استحکام پاکستان علماء و مشائخ کنونشناں دے انعاد دا آغاز کر رہی اے۔ جد کہ دسمبر دے مہینے وچ پنجویں عالمی پیغام اسلام کانفرنس منعقد کیتی جائے گی جس وچ عالم اسلام دے اہم قائدین شریک ہونگے۔ایس سلسلے وچ خطے دی موجودہ صوتحال اُتے علما و مشائخ نال مشوریاں دا سلسلہ شروع کر دتا گیا اے تے ایس حوالے نال اکتوبر دے پہلے ہفتے وچ دنیا اسلام دے اہم اکابرین علما و مشائخ دا ورچول مشاورتی اجلاس کیتا جائے گا۔ ایہناں فیصلیاں دا اعلان پاکستان علماء کونسل دے زیر اہتمام ہون والے علماء و مشائخ کنونشن وچ کہی گئی جیہڑی پچھلے دناں پاکستان علما کونسل دے چیئر مین و نمائندہ خصوصی وزیر اعظم پاکستان برائے بن المذاہب ہم آہنگی و مشرق وسطیٰ حافظ محمد طاہر محمود اشرفی دی زیر صدارت کنونشن وچ کیتا گیا۔ کنونشن نال مولانا حامد الحق حقانی ، مولانا یوسف شاہ، مولانا سید چراغ الدین شاہ، علامہ عارف واحد ی، مولانا عبدالخالق ، مولانا محمد خان لغاری، مولانا اسد زکریا قاسمی، مولانا سید ضیاء اللہ شاہ بخاری، علامہ عبدالحق مجاہد، مفتی محمد ضیاء مدنی، علامہ طاہر الحسن ، مولانا نعمان حاشر، مولانا محمد شفیع قاسمی، مولانا پیر اسعد حبیب شاہ جمالی، مولانا ابوبکر حمید صابری، مولانا پیر اسد اللہ فاروق، مولانا طاہر عقیل اعوان، مولانا محمد اشفاق پتافی، مولانا عبدالکریم ندیم، قاضی مطیع اللہ سعیدی، مولانا حق نواز خالد، مولانا عبید اللہ گورمانی، مولانا انوارالحق مجاہد، مولانا اسلم صدیقی، مولانا عبدالحکیم اطہر، میاں راشد منیر، مولانا حبیب الرحمن عابد، مولانا طیب گورمانی، مولانا اظہار الحق خالد، صاحبزادہ حمزہ طاہر الحسن، مولانا سعد اللہ لدھیانوی، مفتی محمد عمر فاروق، مولانا محمد احمد مکی، مولانا عزیز الرحمن، مولانا عزیز اکبر قاسمی ، مولانا سعد اللہ شفیق، مولانا حسین احمد درخواستی، مولانا یاسر علوی، قاری عبدالرئوف، مولانا مطلوب مہار، حافظ محمد طلحہ فاروقی، مولانا زبیر کھٹانہ، مولانا عقیل زبیری، میاں ارشاد مجاہد، مولانا محمد اسلم قادری، قاری شمس الحق، مولانا مبشررحمی، مفتی عبدالستار حقانی، مولانا آصف فاروقی، مولانا خورشید اکبر، مولانا مفتی شفیق الرحمن، مولانا قاضی عبدالحفیظ تے دیگر نے وی خطاب کیتا۔ کنونشن دے مشترکہ اعلامیہ تے قرار داداں انج نیں۔
1۔ ہندوستان دی پاکستان دے خلاف سازشاں تے عزائم واضح نیں۔ افغانستان وچ ہندوستان دے عزائم دی ناکامی دے بعد ہندوستان پاکستان وچ انتشار پیدا کرن لئی فرقہ وارانہ تفریق دے ذریعے تشدد و دیگر سازشاں کر رہیا اے جس نوں روکن لئی سارے مکاتب فکر دے علما و مشائخ تے مذہبی و سیاسی جماعتاں، حکومت، افواج پاکستان تے ملک دے سلامتی دے اداریاں نوں اپنے مکمل تعاون دا یقین دلاندی اے تے پیغام پاکستان ضابطہ اخلاق اُتے مکمل عمل کرن دا اعلان کردی اے تے علماء خطباء، ذاکرین نال وی اپیل کردی اے کہ پیغام پاکستان ضابطہ اخلاق اُتے مکمل عمل کرن۔
2۔ افغانستان توں پچھلے اک ہفتے دے دوران پاکستان دی سرحدی فوجی چوکیاں اُتے حملیاں دی کوشش تے افغانستان دے ایئر پورٹ اُتے خود کش حملہ قابل مذمت اے، افغان طالبان تے عالمی دنیا نوں ہندوستان تے عالمی دہشت گرد تنظیماں دے تعلقات نوں ساہمنے رکھنا چاہیدا اے۔ ہندوستان ماضی دی طرح اک وار فیر خطے وچ بدامنی تے انتشار پیدا کرن دی سازشاں وچ مصروف اے تاں عالمی دنیا تے خطے دے ملکاں نوں ایس پاسے توجہ دینی ہوئے گی۔
3۔ پاکستان دے علماء و مشائخ تے عوام افغان طالبان ولوں عام معافی، افغان سر زمین نوں پاکستان سنے دنیا دے کسے وی ملک دے خلاف استعمال نہ ہون دین تے اک مضبوط مستحکم اسلامی قومی حکومت دے قیام دے اعلان دا خیر مقدم کردے نیں تے ایہہ سمجھدے نیں کہ افغانستان دا امن پاکستان دا امن اے تے افغانستان دے امن نال خطے دے سارے ملکاں نوں تجارتی، معای، سیاسی طور اُتے مضبوطی ملے گی تاں سارے ملکاں نوں افغانستان وچ امن و امان دے قیام تے استحکام لئی امارات اسلامیہ افغانستان نال بھرپور تعاون کرنا چاہیدا اے تے افغانستان نوں موجودہ حالات وچ کلا نہیں چھڈنا چاہیدا۔ پاکستان دے علماء و مشائخ انتہا پسندی، دہشت گردی تے فرقہ وارانہ تشدد دے خلاف خطے دے سارے ملک خاص طور تے افغانستان توں ہر طرح نال تعاون دا اعلان کردے نیں۔
4۔ افغانستان دے مسئلے اُتے ریاست پاکستان دا موقف ٹھیک سمت اے تے قومی امنگاں دے مطابق ریاست پاکستان نے افغان طالبان تے امریکہ دے وچکار مذاکرات لئی جیہڑا کردار ادا کیتا تے افغانستان توں غیر ملکیاں دے انخلا لئی جیہڑی پالیسی مرتب کیتی اوہ قابل ستائش اے۔ اسیں امید کرنے آں کہ مستقبل وچ وی حکومت پاکستان خطے وچ امن تے خاص طور تے پاک افغان تعلقات وچ استحکام لئی ایس طرح کردار ادا کردی رہوے گی۔ کنونشن وچ حزب اختلاف تے حزب اقتدار دی جماعتاں نال اپیل کیتی گئی اے کہ قومی معاملات وچ الزام تراشی دی بجائے وسیع تر قومی مفاد وچ مذاکرات تے مفاہمت دا رستہ اپنایا جائے۔
5۔پاکستان دے علماء و مشائخ سعودی عرب اُتے حوتی باغیاں دے مسلسل حملیاں دی بھرپور مذمت کردے نیں ابہا ایئر پورٹ اُتے حملہ قابل مذمت تے قابل افسوس اے۔ ریاست پاکستان دا موقف ہمیشہ واضح رہیا اے کہ پاکستان نوں ارض حرمین شریفین مملکت سعودی عرب دی سلامتی تے استحکام بوہت عزیز اے۔ ارض حرمین شریفین دا دفاع پاکستان دا دفاع اے۔ ساڈے لئی ارض حرمین شریفین خط احمر اے۔ ایس اُتے عالمی دنیا اسلامی تعاون تنظیم تے اقوام متحدہ نوں فوری نوٹس لینا چاہیدا اے۔
6۔ افغانستان دی صورت حال اُتے حکومت پاکستان، اسلامی تعاون تنظیم، رابطہ عالم اسلامی دے موقف دی تائید کردے نیں تے تجویز کردے نیں کہ اسلامی تعاون تنظیم دے سربراہ دے طور اُتے مملکت سعودی عرب ، اسلامی تعاون تنظیم دے سربراہ دے طور اُتے مملکت سعودی عرب، اسلامی تعاون تنظیم دے سربراہ دے طور اُتے مملکت سعودی عرب، اسلامی تعاون تنظیم دا فوری طور اُتے سربراہی اجلاس بلائے تاکہ امت مسلمہ افغانستان دے مسئلے اُتے متفقہ موقف اپنائے۔
7۔ پورے ملک دے علماء و مشائخ، آئمہ و خطبا نال اپیل کرنے آں کہ جمعۃ المبارک نوں یوم وحدت امت دے طور اُتے منان۔ خطبات جمعہ وچ انتہا پسندی، دہشت گردی تے فرقہ وارانہ تشدد دی مذمت تے ملی تے قومی یکجہتی دا اظہار کیتا جائے تے ایس موقعے اُتے شہداء پاکستان نوں خراج تحسین پیش کیتا جائے تے عقیدہ ختم نبوت و ناموس رسالت دے تحفظ دا عزم کیتا جائے۔
8۔ پورے ملک وچ خواتین دے نال ہون والے زیادتی دے واقعیاں دی بھرپور مذمت کردے ہوئے وزیراعظم پاکستان ولوں مستقل حل لئی کمیٹی بنان دی تجویز نال اتفاق کردے ہوئے کہیا کہ نور مقدم لہور مینار پاکستان سنے 10 کیساں دے ٹرائل فوری کرن تے سر عام سزاواں دین دا فیصلہ کیتا جائے۔ فحاشی و عریانی دی ساری ویب سائٹس تے سوشل میڈیا دے ذرائع نوں بند کیتا جائے۔ اسلام عورت نوں حجاب تے مرد نوں نظر دی حفاظت دا حکم دیندا اے تاں سارے پہلوئواں نوں مدنظر رکھیا جائے۔
9۔ فیک نیوز قومی سطح اُتے اک بوہت وڈا مسئلہ بن چکی اے۔ سوشل میڈیا، الیکٹرانک میڈیا، پرنٹ میڈیا وچ کوئی گل وی نشر ہوئے ایس دی تردید دے باوجود متاثرہ فریق لئی معاشرے وچ جیہڑی تشویش پیدا ہوندی اے ایس نوں ختم نہیں کیتا جا سکدا تاں ایس حوالے نال ہون والی قانون سازی وچ سارے فریقاں نوں بہہ کے مسائل دا حل کرنا چاہیدا اے۔
10 علماء و مشائخ نے یکم ستمبر تیکر عشرہ شہدا پاکستان، تحفظ عقیدہ ختم نبوت منان دا اعلان کیتا تے کہیا کہ سارے مکاتب فکر دے علاوہ مشائخ عشرہ شہدا پاکستان و تحفظ عقیدہ ختم نبوت دے موقعے اُتے ہون والے اجتماعات کانفرنساں، سیمینار وچ وطن عزیز لئی قربانیاں دین والے شہداء تے غازیاں نوں خراج عقیدت پیش کراں گے عقیدہ ختم نبوت و ناموس رسالت دے تحفط لئی ہر سطح اُتے جدوجہد دا عزم کراں گے۔
11۔ عافیہ صدیقی خاتون وچ ہن جدوں امریکہ دی جنگ ختم ہو گئی تے عافیہ صدیقی نوں امریکی حکومت انسانی ہمدردی تے جنگ ختم ہون دی بنیاد اُتے فوری طور اُتے رہا کرے۔