جمشید کمبوہ دی اُگھی شاعری۔۔۔۔’’ سوچ سویر‘‘

زاہد حسن

جمشید کمبوہ پاک پتن جہی بھاگاں بھری دھرتی نال تعلق رکھدے نیں، جتھے شکر گنج نے مکان کر کے پنجاب دا دکھ درد دور کیتا

جمشید اقبال مسعود، جیہڑا کہ جمشید کمبوہ دا قلمی نائوں نال لکھدے نیں، پنجابی شاعری دی لیہہ اُپر اجہیے پکے پیریں ٹر رہے نیں جو لگدا اے جھب ای اک اگھے شاعر وجہوں نائوں کما لین گے۔ اوہناں دا علمی کیریئر بہوں ودھیا ہے تے اوہ اعلیٰ تعلیم یافتہ انسان نیں تے سینئر ہیڈ ماسٹر و جہوں کم پئے کردے نیں ۔آپ پنجابی، اردو، فارسی تے انگریزی وچ شاعری کردے نیں۔ اک خاص گل جو اسیں اوہناں بارے بڑے وثوق تے یقین نال آکھ سکدے آں جو جس طرحاں پنجابی غزل نوں مُکھ رکھ کے اگے چل رہے نیں جھیدے ای غزل دی کلاسیکی تے روایتی تہذیب نوں وی اپناون تے اگے ٹورن وچ کامیاب رہن گے۔

اوہ بابا فرید گنج شکرؒ ہوراں دی پاک تے پوتر دھرتی نال تعلق رکھدے نیں، میں سمجھداں جو جھیدے یاں کویلے اوہناں اُپر وی نظرِ کرم ہووے گی تے اوہ ادب خاص طور تے شاعری وچ وڈا نائوں کماون گے۔ اپنے تعارف وچ اوہناں نے دسیا اے جو اردو تے پنجابی وچ اوہناں دیاں بہت ساریاں کتاباں چھپن آلیاں نیں تے اوہناں نوں کنے ای ایوارڈز وی مل چکے نیں اوہناں دے ایس مجموعے وچ حمد، نعت، نعتیہ رباعیاں تے غزلاں وی موجود نیں تے مجموعے بارے ارشد محمود ناشاد، اختر شمار، محمد مسعود خالد تے ہور لوکاں دیاں آرا وی شامل نیں۔ ارشد محمود ناشاد ہوریں اوہناں بارے لکھدے نیں ۔’’جمشید کمبوہ پاک پتن جہی بھاگاں بھری دھرتی نال تعلق رکھدے نیں، جتھے شکر گنج نے مکان کر کے پنجاب دا دکھ درد دور کیتا تے پنجابی بولی وچ مٹھے تے امرت بھرے بول ونڈکے ایہدی ادبی ریت دی نیہنہ دھری سی جمشید کمبوہ، باوا صاحب دی لیہہ تے ٹردا تے اوہناں دے پائے پورنیاں دی خوشبو ونڈ دا اجوکے سمے دا مہان کوی اے۔ ایہدی کو یتا آسے پاسے کھلری حیاتی دے ون سونے رنگاں نال ہوند وچ آئی ہے۔