جنگل دا بندا

لکھت:صوفیہ بیدار

انج لگدا اے جنگل دے مرد تے عورت فیر ملاقات کر رہے نیں۔ صدیاں‘ زمانے‘ مذہب‘ معاشرت‘ تربیت دے سارے ادارے درمیان چوں نکل گئے۔ تہذیب نے جنے دل توڑنے سن توڑ لئے‘ جنیاں ڈولیاں اٹھنیاں سن اٹھ گئیاں۔ ہن مادر پدر آزاد معاشرہ پوری طرح ننگا سامنے اے۔ شیشے وچ اپنی شکل ویکھو تے اقوال زریں بولنے بند کر دیو… حقیقت وچ تسیں اسیں انج دے ای آں ساڈے تے جنیاں کاٹھیاں معاشرت نے پانیاں سن پا چکی‘ ماں دا ادارہ وی ’’رُل‘‘ چکیا اے بچے ماں توں جھڑکاں نہیں کھا سکدے بے عزتی ہو جاندی اے حقیقی بے عزتی دا اوہناں نوں پتہ ای نہیں…
انسان اپنی اصلی حالت وچ واپس آ چکیا اے فطری جبلتاں دا منہ کھل چکیا اے تہذیب‘ ثقافت‘ ادب آداب دا ڈھکن خواہشات دے گندے گٹر توں اٹھ چکیا اے۔ ایہ ناصح ایہ پیسے لے کے واعظ کرن والے سکالر ہر پبلک سپیکر تے پروموشن سپیکر تے قاسم علی شاہ ورگے ناصحین دی تیار کردہ فورس قمیض لاہ کے بے بس ہو چکی اے ناصحین دی ڈگری شدہ اعزازیہ لے کے دنیا نوں انسانیت سکھان والیاں ٹیماں وی بیکار ہو چکیاں نیں۔ بین المذاہب تے بین المسالک تے جو ’’رولیے‘‘ نیں اوہناں دے کیا کہنے‘ وقت دا پہیہ فیر جنگل وچ لے آیا کہ عاشق وی جھوٹے‘ محبوب وی جھوٹے‘ ناصح وی جھوٹے رقیب وی نقلی چھینا جھپٹی ای سچ ’’کھویا موئی‘‘ ای صحیح کرنی معتبرکہ‘ دوجیاں نوں نیواں وکھایا جا سکے۔
انسان لباس وچ ضرورت‘ تربیت تے تہذیب پاروں آیا مذہب نے حقوق و فرائض جین دا طریقہ سکھایا‘ فطرت نے اوہنوں آزاد پیدا کیتا۔ جیویں ای مینار پاکستان تے اک جوڑے نے کنک دا اشارا دتا ہجوم دا ہجوم ٹٹ پیا لوک تبصریاں تے تبصرے کردے رہے اپنی اپنی آواز لے کے نسدے بھجدے رہے کسے نے تربیت نوں دوش دتا کسے نے قنون دی بالادستی تے کسے نے سخت سزاواں تے کسے نے تعلیم دی کمی تے… واقعات دے تسلسل نے دسیا کہ فطرت ساری کاٹھیاں تروڑ کے منہ زور گھوڑے وانگوں کھلی پھر رہی اے۔ تہذیب دے مدفون توں کھل کے ننگے وجود نچ رہے نیں چار سو لوکا ںدا وجود مٹھائی دے ’’دونے‘‘ تے ٹُٹ پیا…
سربراہ مملکت نے لباس نوں وجہ تسلسل عصمت دری سمجھیا تے اوہدے وی کئی معنی سامنے آئے۔ جے ایہ واقعی صرف لباس دا معاملہ اے تے سویرے اک کڑی نوں میں موٹرسائیکل تے ویکھیا ٹائٹ جینز فراک سر تے کس کے بنھیا ہویا سکارف تے موڈھیاں تے کالی باریک چادر… میں سوچدی رہ گئی مندرجہ بالا معاشرہ ایہنوں کس انداز وچ ہضم کرے گا اٹھ طرح دیاں تہذیباں دا ایہ مکسچر کس سوچ نوں اکسائے گا یعنی پہلے ’’بے ہدایت لڑکے‘‘ ٹائٹ جینز ویکھ کے چھیڑن گے فیر سر تے بنھیا منڈھا سر ویکھ کے کہن گے سوری باجی تے موڈھیاں تے پئے باریک مہین آنچل توں جھاتیاں مارن گے بعد وچ چادر نال مماثلت تے معذرت کرن گے… اندازہ کرو کیہ تماشا اے یعنی جنگل صرف لباس دے وکھووکھ تہذیباں نال بھڑک پیندا اے تے شناسا تہذیباں نال ٹھنڈا پے جاندا اے۔ دنیا بھر وچ ایہ سب ہوندا اے مغرب وچ مرداں نے اپنے کول عورتاں دا تماشا لا رکھیا اے آپ تے پورا سوٹ ویسٹ کوٹ شرٹ بنیان ٹائی بوٹرائز ر جراباں بند بوٹ پا کے شرم و حیا تے عصمت و عزت دے سارے تقاضے نبھاندے نیں جد کہ سخت سردی وچ عورتاں ننگیاں پنڈلیاں اک آسمین ننگے موڈھیاں ننگیاں بانہواں تے بڑی تکلیف دہ اڈی والیاں جتیاں نال کیٹ واک کردیاں تماشا بنیاں ہوئیاں نیں فیر وی ایس صنف نازک نوں برابر دا دعویٰ اے اپنے ایتھے وی نک کن چھدوا کے ونگاں پا کے میدان وچ آنا چاہندی اے جد کہ مرد گل گل تے کہندے نیں اسیں ونگاں نہیں پائیاں…
خاتون (مینار پاکستان والی) دے حق وچ گھٹ تے مخالفت وچ زیادہ بیان زمینی حقائق نوں بیان کر رہے نیں۔ انسان ہون دا حق عورت ہون دے مشروط حق دا منہ چڑا رہیا اے ایس حقیقت نوں مقامی عورتاں جنیاں چھیتی سمجھ لین اوناں ای بہتر اے… کہ جس خطہ ارضی تے اسیں پیدا ہو جانے آں ساڈی ستر فیصد قسمت دا فیصلہ اوتھے ہو جاندا اے۔ جس سرزمین تے ساڈا جنم ہویا اے اوتھے عورتاں نوں بڑی عزت ملدی اے پر رشتیاں دے ٹائٹل دے نال صرف جے کوئی اکلی خاتون معاشرے وچ کھڑی ہو جاوے تے اپنا حق انسانی سمجھ کے کرائے دا گھر ای لینا چاہیدا اے کوئی اوہنوں نہیں دیوے گا۔ مذہب معاشرت اوہنوں رشتیاں دے تقدس وچ تے بڑی عزت دیندا اے پر اکلے کوئی مقام حاصل کرنا تے معاشرے وچ کھڑے ہونا ہر عورت دے وَس دی گل نہیں ایسے لئی تے طاقتور عورتاں نوں مرد بطور بیوی پسند نہیں کردا۔ کمزور عورت اوہناں دی ترجیح ہوندی اے کہ خوف دے سائے تھلے حیاتی گزارے بھاویں کمزور نسلاں نوں جنم دیوے پر مرد نوں ہر لمحہ اوہدی مردانگی دی گواہی ملدی رہوے… تاں ای تے ایتھے مذہبی احکامات دے الٹ عورت دی غلطی تے پورا معاشرہ سزا دیندا اے تے مرد اپنے پرانے عشق گھراں وچ بہہ کے کھل ڈلھ کے مسکراندے ہوئے دہراندے نیں جد کہ چوکاں وچ تے آپ عورت دے نال اپنے آپ نوں جوڑ کے مشہور کرواندے نیں اوہناں عورتاں دے نال وی اپنے آپ نوں جوڑدے نیں جو اوہناں دی شکل وی نہیں ویکھنا چاہندیاں۔
اجہے معاشرے وچ کیہ توقع کیتی جا سکدی اے کہ عورت مینار پاکستان تے چڑھ کے ویڈیو بناوے گی تے پورے دا پورا انسانی نفسیاتی خواہشات دا جنگل اوہدے تے ٹُٹ نہیں پوے گا۔ دینی احکامات بھُلے لوکاں نوں خبر ہووے کہ رب تے معاف کر دیندا اے پر اوہدے بندے نہیں سوسائٹی دے رولز نوں فالو کرنا پوے گا۔ جہناں نوں اردو نہیں آئوندی اوہناں لئی ایہ انگریزی جملہ لکھیا اے۔ معاشرے توں اک انچ ہٹن دا مطلب ایہہ وے کہ ایہ ساری سمندری مخلوق توں اچھال کے ساحل تے ٹپک دیوے گا سوسائٹی بڑی مضبوط اے تے بندہ بڑا کمزور‘ معاشرے نوں کروٹ لین تے وی صدیاں لگدیاں نیں… کدی غور کرو لو میرج کیوں کامیاب نہیں ہوندی کہ اوہدے وچوں معاشرے دا پیر کھسکا دتا جاندا اے فیر معاشرہ پوری طاقت نال ایس ارینج ہون والے لو Love نوں طلاق تک اپڑاندا اے کدی نند دی شکل وچ کدی دیور دی صورت وچ۔٭٭