پاکستان دا دورہ ویسٹ انڈیز کنج دا رہیا؟

ٹی ٹوئنٹی وچ بارش نے پاکستان نوں بچا لیا، شاہین شاہ آفریدی دی عمدہ بائولنگ دی
بدولت ٹیسٹ سیریز برابر ہوئی، ونڈیز دے نویں کھلاڑیاں نے متاثر کن کارکردگی وکھائی

تحریر : طیب رضا عابدی

پاکستان نے اپنے دورہ ویسٹ انڈیز دے دوران چارٹی ٹوئنٹی میچز تے دو ٹیسٹ میچز کھیڈے۔ ٹی ٹوئنٹی سیریز بارش دی نذر ہون پاروں پاکستان ایہہ سیریز اک صفر توں جت گیا۔ ٹیسٹ سیریز دی گل کریئے تے پاکستان تے ونڈیز دے وچکار پہلا ٹیسٹ میچ جمیکا (سبائناپارک)وچ کھیڈیا گیا۔ جد کہ دوجا ٹیسٹ میچ وی ایسے گرائونڈ (سبائنا پارک) اُتے ہویا۔ ورلڈ ٹیسٹ چیمپئن شپ دے حالیہ سائیکل وچ ایہہ دونواں ٹیماں دی پہلی سیریز سی۔ پاکستان نے دوجے ٹیسٹ میچ وچ کامیابی دے بعد ٹیسٹ سیریز برابر کر دتی۔ پہلے ٹیسٹ میچ وچ سنسنی خیز مقابلے دے بعد ونڈیز دی ٹیم نے اک وکٹ نال کامیابی حاصل کیتی۔ ٹی ٹوئنٹی وچ بارش نے پاکستان نوں بچا لیا تاں ٹیسٹ وچ کالی اآندھی پاکستانی بیٹنگ نوں خشک پتیاں وانگوں اڑا کے لے گئی، ونڈیز دے نویں کھلاڑیاں نے متاثر کن کارکردگی وکھائی۔ پاکستان دی ٹیم جس نے پہلا ٹیسٹ میچ کھیڈیا اوہ ایہناں کھلاڑیاں اُتے مشتمل سی۔ بابر اعظم (کپتان) محمد رضوان (نائب کپتان، وکٹ کیپر) , عابد علی، اظہر علی، فہیم اشرف، فواد عالم، حسن علی، عمران بٹ، محمد عباس، شاہین شاہ آفریدی تے یاسر شاہ۔ دوجے ٹیسٹ لئی پلیئنگ الیون وچ اک تبدیلی کیتی گئی جس وچ یاسر شاہ دی تھاں نعمان علی نوں شامل کیتا گیا۔
جے پہلے ٹیسٹ دی گل کیتی جائے تے پاکستان کرکٹ ٹیم دی شکست دی وڈی وجہ بیٹنگ وچ خامیاں تے ڈراپ کیچز سن۔ نہیں تے پاکستانی بائولرز نے ونڈیز دی بیٹنگ نوں دوجی اننگز وچ اکھاڑ کے رکھ دتا سی۔ میچ دے فائنل سیشن وچ پاکستانی فیلڈرز نے تن کیچ چھڈے۔ شاہین شاہ آفریدی دی گیند اُتے سکوائر لیگ اُتے حسن علی نے کیمر روچ دا کیچ ڈراب کیتا۔ جے اوہ تھوڑی کوشش کردے تے کیچ پھڑ سکدے سن پر پاکستانی کھلاڑی فیلڈنگ وچ سست نظر آئے۔جے پاکستانی بیٹسمین جاوید میانداد وانگوں وکٹ اُتے ٹھہر کے خراب گیند دا انتظار کرن تے بوہت بہتری آ سکدی اے۔ بے شک تن چار اوورز میڈن لنگھا دین پر خراب گیند دا انتظار کرن تے ایس اُتے شاٹ لان تے اوہ وکٹ اُتے جم کے چنگا سکور کر سکدے نیں۔
جمیکا دے پہلے ٹیسٹ میچ وچ پاکستان دی ٹیم پہلی اننگز وچ 217 بنا کے آئوٹ ہو گئی سی جد کہ میزبان ویسٹ انڈیز نے 253 سکور بنائے۔ پاکستان نے دوجی اننگز وچ 203 سکور بنا کے ویسٹ انڈیز نوں میچ جتن لئی 168 سکور دا ہدف دتا۔ ہدف دے تعاقب وچ ویسٹ انڈیز نوں وی مشکلات دا ساہمنا کرنا پیا تے ایس دے ست کھلاڑی 114 سکور دے مجموعی اسکور اُتے پولین لوٹ گئے جس دے بعد پاکستان دے میچ جتن دی امیداں روشن ہو گئیاں۔
اک موقعے اُتے 151 سکور دے مجموعی اسکور اُتے ویسٹ انڈیز دے نو کھلاڑی آئوٹ ہو گئے سن جس دے بعد میزبان ٹیم نوں 17 جد کہ پاکستان نوں میچ جتن لئی اک وکٹ درکار سی۔ کیمروچ تے جیڈن سیلز کریز اُتے موجود سن جنہاں نے ویسٹ انڈیز نوں فتح دلا دتی۔ پاکستانی فیلڈرز نے روچ دے دو کیچز چھڈے تے ایس طرح اوہ 30 سکور دی فیصلہ کن انگیز کھیڈن وچ کامیاب رہے۔
پہلا جمیکا ٹیسٹ کئی لحاظ نال یادگار رہیا کہ ایس وچ کئی ریکارڈ بنے تے کئی ریکارڈ بنن توں رہ گئے۔ جمیکا ٹیسٹ میچ وچ ونڈیز دی فتح دے پاکستان پاکستان دی ٹیم نے 44 سال بعد ایس گرائونڈ اُتے شکست کھادی ایس طرح پاکستان نوں ویسٹ انڈیز دے ہتھوں شکست دے بعد 44 سالہ ریکارڈوی گیا، ایتھے پاکستان 1977وچ آخری ٹیسٹ ہاریا سی۔
ایس میچ وچ 19 سالہ جیڈن سیلز ٹیسٹ میچ وچ پنج وکٹاں لین والے ویسٹ انڈیز دے کم عمر ترین بائولر بن گئے۔ ویسٹ انڈیز دے خلاف پہلے ٹیسٹ میچ دی پہلی اننگز وچ فواد عالم 56 سکور بنا کے آئوٹ ہوئے تے اوہ اک تاریخی ریکارڈ توں محروم ہو گئے جے اوہ اپنی نصف سنچری نوں سنچری وچ بدل دیندے تے اوہ سابق ویسٹ انڈیز بلے باز ایورٹن ویکس دا مسلسل 5 نصف سنچریاں نوں سنچریاں وچ تبدیل کرن دا 73 سالہ ریکارڈ اپنے ناں کر سکدے سن۔ 35 سالہ فواد عالم ایس میچ توں پہلاں اپنے ٹیسٹ کیریئر وچ ساری نصف سنچریاں نوں سنچریاں وچ تبدیل کر چکے نیں۔ ویسٹ انڈیز دے سابق بلے باز ایورٹن ویکس نے 1948 وچ 5 نصف سنچریاں نوں سنچریاں وچ تبدیل کرن دا ایہہ ریکارڈ بنایا سی سب توں زیادہ نصف سنچریاں نوں سنچریاں وچ تبدیل کرن دا عالمی ریکارڈ وی سابق ویسٹ انڈیز بلے باز جارج ہیڈلی دے کول اے۔
دوجے پاسے قومی ٹیم دے اوپنر عمران بٹ نے فیلڈنگ وچ 100 سالہ ریکارڈ توڑ دتا۔ عمران بٹ نے ویسٹ انڈیز دے خلاف پہلے ٹیسٹ دے دوجی اننگز وچ میزبان ٹیم دے بلے باز بلیک ووڈ دا شاندار کیچ پھڑیا جس دے بعد اوہ پچھلے 101 سال دے دوران ٹیسٹ کرکٹ وچ اپنے پہلے 5 میچاں وچ 15 کیچ پھڑن والے فیڈر بن گئے۔ عمران بٹ توں پہلاں آسٹریلیاں دے جیک گریگوری نے 1920 وچ اپنے ٹیسٹ ڈیبیو دے بعد پہلے 5 ٹیسٹ میچز وچ 15 کیچز پھڑے سن عمران بٹ اگرچے بیٹنگ وچ تے کوئی کمال نہیں وکھا پائے البتہ فیلڈنگ شاندار کردے ہوئے اوہناں نے کئی کیچز پھڑے۔ ایہناں دا جمناسٹک دے ایتھلیٹس وانگوں چھلانگ لا کے کیچ پھڑن دا سٹائل کئی چینلز اُتے موضوع گفتگو بنیا رہیا۔
جتھے اک پاسے پاکستان تے ویسٹ انڈیز دا میچ جمیکا سبائنا پارک وچ جاری سی اوتھے دوجے پاسے لارڈز کرکٹ گرائونڈ اُتے انگلینڈ تے انڈیا دا میچ ہو رہیا سی جنہاں شائقین نے ایہناں دناں وچ ایہہ دونویں میچز ویکھے نیں اوہ آسانی نال انڈیا تے پاکستان دیاں ٹیماں دا فرق کڈ سکدے نیں جتھے اک پاسے پاکستان دی اووپنگ سرے توں ناکام رہی اوتھے انڈیا دے روہت شرما تے کے ایل راہول نے زبردست اوپننگ دا مظاہرہ کیتا۔ دوجے پاسے پاکستان دی فیلڈنگ ناکام ہوئی جد کہ بھارتی فیلڈرز نے سلپ وچ شاندار کیچز پھڑے ۔ انڈیا دے ٹیل اینڈرز وی کمال دی بیٹنگ کردے نظر آئے ایہناں وچ محمد شامی تے جدیجہ شامل سن جد کہ پاکستان دے جتھے ٹیل اینڈ دی بیٹنگ وی نظر نہیں آئی اوتھے سوائے بابر اعظم تے محمد رضوان دے کوئی قابل ذکر بلے باز نظر نہیں آیا۔ لارڈز وچ انڈیا نے جس طرح جان لڑا کے فتح سمیٹی ایس توں پاکستان نوں سبق سکھنا ہوئے گا۔
فیلڈنگ دی ناکامیاں شروع توں رہیاں نیں تے ایس دے نال نال ناکام بیٹنگ وی پاکستان دا عرصے توں مسئلہ رہیا اے جتھے صرف بابر اعظم تے محمد رضوان ای بیٹنگ کردے نظر آندے نیں جد کہ انڈیا دا ہر دوجا بلے بازسکور کردا وکھائی دیندا اے۔ لارڈز تے جمیکا ٹیسٹ نال نال ہو رہے سن، کوویڈ دی وجہ نال سبائنا پارک تے تماشائیاں توں خالی سی تے پھکا پھکا لگیا اوتھے لارڈز کرکٹ گرائونڈ تماشائیاں نال بھریا ہویا سی تے ٹیسٹ دی ہر گیند توں لطف اندوز ہو رہیا سی۔ جے پاکستان میچ دے چوتھے دن ونڈیز دی آخری وکٹ حاصل کر لیندا تے ایہہ اک یادگار میچ ہوندا پر ونڈیز دے ٹیل اینڈرز نے بوہت سمجھدار بیٹنگ دا مظاہرہ کیتا۔ کیمروش دی بیٹنگ دی جس قدر تعریف کیتی جائے اوہ گھٹ اے اوہناں نے شدید پریشر وچ جم کے بیٹنگ کیتی تے پاکستانی پیسرز دا مقابلہ کیتا۔
دوجے ٹیسٹ وچ پاکستان نے بیٹنگ دا آغاز کیتا تے اوپننگ جوڑی اک وار فیر ناکام نظر آئی تاں فواد عالم تے بابر اعظم دی شاندار پارٹنر شپ نے پاکستان نوں ڈھیر ہون توں بچا لیا۔ فواد عالم نے سنچری سکور کیتی تے ایس طرح اوہناں نے اپنے انتخاب نوں درست ثابت کیتا۔ بارش نے دوجے ٹیسٹ نوں متاثر کیتا تے چار اہم سیشنز نہ ہو سکے۔ پاکستان نے دوجی اننگز وچ دلیرانہ فیصلے کیتے تے بیٹسمیناں نے ون ڈے وانگوں بیٹنگ کیتی۔ میچ نوں نتیجہ خیز بنان ل ئی کپتان بابر اعظم نے 176 سکور 6 کھلاڑی آئوٹ اُتے اننگز ڈکلیئر کر دتی تے ونڈیز نوں 329 سکور دا ہدف دتا۔ پاکستانی پیسرز نے کامیابی تے حاصل کیتی پر اک موقع انج دا آیا کہ فاسٹ بائولرز توں وکٹ نہیں نکل رہی سی انج نعمان علی نے ونڈیز دے کریز اُتے جمے ہوئے کھلاڑیاں نوں آئوٹ کر کے پاکستان دی جت دی راہ ہموار کر د تی۔ نعمان علی نے تن اہم کھلاڑیاں کریگ بریتھویٹ، جرمین بلیک ووڈ تے جیسن ہولڈر نوں آئوٹ کیتا۔ شاہین شاہ آفریدی نوں مین آف دی میچ تے مین آف دی سیریز قرار دتا گیا اوہناں نے دوجے ٹیسٹ وچ 10 کھلاڑیاں نوں آئوٹ کیتا۔ بابر اعظم نے جت نوں دلیرانہ فیصلے تے بائولرزاں دی عمدہ بائولنگ قرار دتا۔
پاکستان تے ویسٹ انڈیز دے وچکار ہون والی کرکٹ دا اک شاندار ماضی اے جتھے ونڈیز دے وڈے وڈے سٹار کھلاڑی پاکستان دے خلاف کھیڈ کے لطف اندوز ہوندے سن اوتھے پاکستان دے وڈے وڈے ناواں نے ایس دور وچ اینڈی رابرٹس ، کولن کرافٹ، ویسلے ہال، جوئیل گارنر، مائیکل ہولڈنگ، میلکم مارشل، کرٹلی ایمبروز، کورٹنی والش تے آئن بشپ جہے تیز رفتار بائولراں دا مقابلہ کیتا۔ پاکستانی بائولرز عمران خان، سرفراز نواز، وسیم اکرم ، وقار یونس جہے ناواں نے ونڈیز دی بیٹنگ نوں ناکوں چنے چبوائے۔ ماضی وچ ویسٹ انڈیز دی بیٹنگ وچ وی وڈے وڈے ناں سن جنہاں وچ سرگیری، سوبرز، گس لوگی، رچی رچرڈسن، وویوین رچرڈز، کلائیو لائیڈ، ڈیسمنڈ ہینز، گورڈن گرینج ، برائن لارا تے چندر پال نے راج کیتا۔
ایہناں بلے بازاں نے پاکستان دے خلاف عمدہ بیٹنگ دا مظاہرہ کیتا۔ ویسٹ انڈیز دی ٹیم دے فاسٹ بائولرز وچ بائونسر مار کے مخالف بلے بازاں نوں زخمی کرن دی روایت وی چلی سی۔ 80 دی دہائی وچ اوہناں نے دورہ پاکستان دے دوران کئی پاکستانی بیٹسمیناں نوں شدید زخمی کیتا سی جس اُتے نہ صرف ایہناں اُتے نغمے بنائے گئے بلکہ کالی آندھی دا خطاب وی ملیا۔ ایس دور وچ سرکاری ٹی وی چینل اُتے بینجمن سسٹرز نے ایہہ گانا گایا سی’’کالو دیوانے بائولنگ نہ جانیں‘‘۔ پاکستانی بیٹسمیناں وچ جاوید میانداد تے انضمام الحق ڈٹ کے ونڈیز دے فاسٹ بائولراں دا مقابلہ کیتا کردے سن۔ایس دور وچ ہیلمٹ وی اینے محفوظ نہیں ہوندے سن تے انضمام الحق تے جاوید میانداد شروع وچ بغیر ہیلمٹ دے وی بیٹنگ کیتا کردے سن۔ ایس موازنے دا مقصد ایہہ دسنا اے کہ پاکستان تے ویسٹ انڈیز دے وچکار سیریز ہمیشہ توں یادگار تے سخت رہیاں نیں۔
خاص طور تے ویسٹ انڈیز نوں ایہناں دی سرزمین اُتے ہرانا بوہت مشکل ہوندا اے ہن جتھے اک پاسے ویسٹ انڈیز دی ٹیم کمزور ہوئی اے اوتھے پاکستان دی ٹیم وچ وی اوہ دم خم نظر نہیں آندا ایس لئی کہیا جا سکدا اے کہ اگرچے عالمی رینکنگ وچ دونواں ٹیماں وچ فرق اے پر ایہہ ٹیماؐ برابر جوڑ دیاں نیں۔ خاص طور تے ونڈیز دی ٹی ٹوئنٹی دی ٹیم بوہت خطرناک اے تے ایس دے ہارڈ ہٹرز پوری دنیا دے کرکٹرز وچ مشہور نیں ،ایہہ انٹرنیشنل لیگز وچ وی تواتر نال شرکت کردے نیں تے شاندار بیٹنگ دا مظاہرہ کردے وکھائی دیندے نیں۔ ایس لحاظ نال ہن ویسٹ انڈیز نوں ویسٹ انڈیز دی سرزمین اُتے ہرانا اک مرحلہ ضرور اے پر ناممکن نہیں پاکستان دے خلاف وی جے بارش نہ ہوندی تے خدشہ سی کہ ونڈیز دی ٹیم سیریز وچ جت جاندی پر بارش نے پاکستان نوں بچا لیا۔