پنجاب ہائوس وچ عوامی شاعر بابا نجمی دی ورھے گنڈھ دی تقریب

تقریراں کرن والیاں ایہہ پروگرام کروان اُتے پنجابی یونین تے پنجاب ہائوس انتظامیہ دا شکریہ ادا کیتا

رپورٹ: محمد ارشاد

پنجاب دی زمین، رہتل تے ادب انتہائی زرخیز ہون دے نال نال طویل تاریخ وی رکھدے نیں۔ اج دی دنیا جغرافیائی لحاظ نال ملکاں وچ تقسیم ضرور اے پر ذرائع نقل و حمل ذرائع ابلاغ تے سوشل میڈیا دی ترقی نے دنیا نوں گلوبل ویلج وچ بدل دتا اے ۔دنیا دے کسے خطے وچ وی ہون والے کسے وی واقعے دے اثرات فوری دنیا دے دوجے علاقیاں اُتے پین لگدے نیں۔ ہن پسماندہ تے ترقی پذیر ملکاں دی جغرافیائی سرحداں دی بجائے ایہناں دی ثقافت تے ادب نوں ترقی یافتہ ملکاں دی ثقافتی یلغار توں زیادہ خطرات لاحق نیں ایس قسم دے خطرات دا ساہمنا پنجابی زبان و ادب نوں وی اے جنہوں محفوظ رکھن، پنجاب دی ثقافت تے ادب نوں فروغ دین دا بیڑہ پنجابی میڈیا گروپ دے چیئر مین مدثر اقبال بٹ نے چکیا ہویا اے تے پنجابی ادب تے ثقافت دے فروغ لئی کم کرن والیاں دی دلجوئی تے حوصلہ افزائی دا کوئی موقع ہتھ توں نہیں جان دیندے ایسے مقصد لئی چھ ستمبر نوں پنجابی دے معروف شاعر بابا نجمی دی سالگرہ دی تقریب دا انعقاد پنجاب ہائوس لہور وچ کیتا گیا جس وچ پنجابی دے معروف شاعراں، ادیباں، دانشوراں تے فنکاراں نے شرکت کیتی تے بابا نجمی دی ادبی خدمات نوں سراہیا۔

پنجابی میڈیا گروپ دے چیئر مین مدثر اقبال بٹ ہوراں تقریب نال خطاب کردے ہوئے جتھے بابا نجمی دی شاعری نوں سراہیا اوتھے ایہناں نوں نوجوان بوڑھے دا خطاب دیندے ہوئے کہیا بابا نجمی دی سالگرہ دا دن بوہت خوشی دا دن اے اوہناں نے پنجابی شاعری لئی بوہت کم کیتا اے ایہناں دی شاعری اک سوچ تے فکر دی آئینہ دار اے جیہڑی آپس مل بیٹھن تے محبت دے نال جین دے سبق اُتے مبنی اے۔اوہناں نے کہیا کہ پنجاب دی ثقافت ادب دا شمار دنیا دی پرانی تہذیباں وچ ہوندا اے اج دا دن بابا عارف نجمی دی پیدائش دے حوالے نال خوشی دا دن اے ۔ ایس دن جنہی خوشی منائی جائے گھٹ اے۔ احمد رضا وٹو نے کہیا کہ بابا نجمی نوں گڑھتی ای پنجابی دی ملی اے مغربی پنجاب وچ پنجابی نوں تھاں ملی یا نہیں پر بابا نجمی دا جھنڈا اُچا ہویا اے ۔ نفیس بزمی نے کہیا کہ چھ ستمبر دا دن تاریخی دن اک 65 دی جنگ دی وجہ نال دوجے بابا نجمی دی پیدائش دی وجہ نال اے۔ یوسف پنجابی نے کہیا کہ بابا نجمی دی اوہ شخصیت اے جیہڑی پوری دنیا وچ پنجابی دا جھنڈا چکے ہوئے اے۔ زاہد حسین نے کہیا کہ بابا نجمی جہے لوک ای شاعراں دی پہچان ہوندے نیں۔ ندیم رضا نے کہیا کہ اسیں زندگی وچ بوہت سارے انج دے لوکاں نال ملنے آں جنہاں دا مطالعہ وسیع ہوندا اے پر ایہناں دا مطالعہ کتاباں دا ہوندا اے۔ بابا نجمی دا مطالعہ تجربہ دی بنیاد اُتے ہے اوہ مطالعہ نہیں بلکہ ایہناں دی آپ بیتی اے انج دے لوک ساڈا اثاثہ نیں۔ اقبال قیصر نے کہیا کہ میں ایس دن نوں صرف بابا نجمی دے یوم پیدائش دے طور اُتے جاننا واں میں آپ مزدور اں تے اک مزدور دے نال کھڑا واں۔ دیپ سعیدہ ہوراںکہیا کہ بابا نجمی اوہ شخصیت اے کہ میں اپنی ماں دے علاوہ ایہناں دے پیر چھونی آں۔
افضل ساحر نے کہیا کہ بابا نجمی نے ہمیشہ حق تے سچ اُتے مبنی شاعری کیتی اے۔ راشد محمود نے کہیا کہ بابا نجمی تے میں جھوٹ دا بوجھ نہیں پالدے، اسیں حقیقت پسندی اُتے یقین رکھنے آں۔ طارق جٹالہ نے کہیا کہ پنجابی دا ناں بابا نجمی جہے لوکاں دی وجہ نال ای زندہ اے۔
بابا نجمی نے اپنے خطاب وچ پنجابی میڈیا گروپ دے چیئر مین مدثر اقبال بٹ دی پنجابی زبان تے ثقافت دے بارے وچ خدمات نوں سراہندے ہوئے کہیا کہ اوہناں نے پنجابی میڈیا گروپ دی صورت وچ جنہا وڈا سیٹ اپ بنایا اے ایس طرح دا کوئی ہور گروپ نہیں ۔ اوہناں کہی اکہ ایہناں دی خدمات تے شخصیت کسے تعارف دی محتاج نہیں اوہناں نے تقریب دے شرکاء دا شکریہ ادا کیتا تے اپنا کلام سنا کے تقریب نوں چار چن لا دتے ۔ تقریب دے اختتام اُتے ایہناں دی سالگرہ دا کیک کٹیا گیا تے صحت تے لمبی عمر دی دعا کیتی گئی۔