دنیا دی ودھدی آبادی

اسدمفتی

جرمنی دے دارالحکومت برلن وچ قائم تحقیقی فائونڈیشن نے دنیا دی آبادی بارے اقوام متحدہ دی سجری پیش گوئی تے مشتمل اک رپورٹ چھاپی اے۔ ایہدے وچ 2100 ورھے تک دنیا دی آبادی دی صورتحال دا جائزہ لیا گیا اے جو اہل دنیا لئی کوئی اطمینان بخش نہیں۔ خام مال دی کمی‘ زمینی درجہ حرارت وچ مسلسل وادھا تے دنیا دی ودھدی ہوئی آبادی دی تکون نے اہل دنیا لئی ایہنوں بری خبر نال جوڑیا اے۔ رپورٹ وچ دسیا گیا اے کہ جاری ورھے دنیا دی آبادی ساڑھے ست ارب تک اپڑن دی امید اے۔
میری جانکاری موجب ہر سیکنڈ دنیا دی آبادی وچ 259 بندیاں دا وادھا ہو رہیا اے۔ میرا مطلب اے اک گھنٹے وچ دنیا دی آبادی وچ دو لکھ اٹھائی ہزار 155 بندیاں دا وادھا ہو رہیا اے ایہدے توں ثابت ہویا کہ اک ورھے وچ ساڈی ایس دنیا وچ تراسی ملین بندے ہور شامل ہو جاندے نیں۔ ایہنوں تسیں انج وی کہہ سکدے او کہ دنیا بھر وچ ہر ورھے پاکستان دی لگ بھگ ادھی آبادی دا وادھا ہو رہیا اے۔ ایہو وجہ اے کہ کوئی وی وثوق نال نہیں کہہ سکدا کہ ودھدی ہوئی آبادی دے انسانی طرز زندگی تے کیہ اثرات پین گے جے اج دنیا دے سارے بندے ترقی یافتہ ملکاں دے درمیانی طبقے وانگوں زندگی گزارن تے سانوں وسیلیاں دے حصول لئی اجیہا ای اک نویں زمین دا ٹکڑا چاہیدا ہووے گا۔ 1950ء توں لے کے 1960ء دے عشرے تک دنیا بھر وچ بچیاں دی اوسط پیدائش ادھی ہو گئی سی یعنی پنچ بچیاں توں گھٹ کے ڈھائی رہ گئی سی تے ایہ خاندانی منصوبہ بندی دا نتیجہ سی۔ ایس ویلے جو عالمی آبادی اے اوہ اصل وچ ایس شعبے وچ ہون والی ترقی تے آبادی وچ ودھدے ہوئے ڈھیر وادھے تے قابو پان لئی کیتے جان والے اقدامات دا نتیجہ اے نہیں تے دنیا دی آبادی موجودہ سطح توں ڈھیر ودھ سکدی سی پر اعدادوشمار موجب دنیا دی آبادی 2025ء تک 9 ارب تک اپڑ جاوے گی۔ غریب ملک جہناں دی آبادی وچ مسلسل وادھا ہو رہیا اے جے اوتھے دی صورتحال وچ بہتری نہ آئی تے آبادی تے قابو پانا اوکھا ہو گیا تے ایہ زمین ہور تنگ ہوندی جاوے گی تے میرے حساب نال اوتھوں دی صورتحال تے قابو پانا بڑا اوکھا اے کیوں جے ایہناں معاشریاں وچ مستقبل وچ وی بچیاں دی پیدائش دی شرح وچ وادھا ہوندا رہوے گا تے جے دنیا بھر وچ بچیاں دی پیدائش دی موجودہ شرح برقرار رہی تے ایس صدی دے آخر تک خطہ ارض تے انساناں دی گنتی ستائی بلین ہو جاوے گی جہدا سدھا سادہ مفہوم ایہہ وے کہ موجودہ آبادی توں چار گنا ودھ۔ صرف نائیجیریا دی آبادی دو بلین توں ودھ جاوے گی جد کہ جرمنی تے ہالینڈ دی آبادی ادھی ہو جاوے گی۔
ہن جتھے کجھ ورھیاں وچ دنیا دی آبادی اٹھ ارب ہون والی اے اوتھے دو عشریاں وچ خوراک دی قیمت وچ دگنا وادھا ہون دا ڈر اے جے عالمی ماہرین تے رہنماواں نے دنیا وچ خوراک تے کھان پین والیاں شیواں دے نظام دی اصلاح لئی اقدامات نہ کیتے تے اگلے ویہہ ورھیاں وچ کھان پین والیاں شیواں دیاں قیمتاں دونیاں ہو جان گئیاں یعنی 2030ء تک اہم فصلاں دی اوسط قیمت وچ 180 فیصد تک وادھا ہو سکدا اے ایس وادھے وچ ماحولیاتی تبدیلی توں علاوہ آبادی دا وادھا وی شامل اے۔ ماہرین دی رائے وچ جے اسیں زمین دی ماحولیاتی تبدیلی دے ودھدے ہوئے دبائو‘ خوراک دی ودھدیاں قیمتاں تے زمین‘ پانی و توانائی دی کمی نال نبڑنا چاہنے آں تے خوراک دے نظام دی اصلاح تے تنظیم نو ضروری اے۔ اقوام متحدہ دی رپورٹ موجب شمالی افریقہ نوں قحط پاروں خوراک دی کمی دا ڈاڈھا سامنا اے۔ عالمی بینک نے وی چتاونی دتی اے کہ خوراک دیاں ودھدیاں قیمتاں لکھاں انساناں نوں غربت وچ دھکیل رہیاں نیں ایہدے نال خاص کر عورتاں تے بچے ڈاڈھے متاثر ہو رہے نیں۔ دنیا وچ ہر ستواں بندہ روزانہ بھکھ دا شکار ہو رہیا اے جد کہ دنیا ہر اک دی خوراک دین دی طاقت تے اہلیت رکھدی اے پر ایس گل وچ وی کوئی شک نہیں کہ موسم وچ ہون والیاں تبدیلیاں سنے تے خام مال وچ کمی آن والے عشریاں وچ خوراک دیاں قیمتاں وچ وادھے دا کارن بنن گئیاں۔
اجیہا بچہ جہدی آمد دے نال ای دنیا دی آبادی اٹھ ارب ہو جاوے گی دی پیدائش 15جون 2025 نوں متوقع اے جتھے دنیا دی آبادی وچ تیزی نال وادھا ہو رہیا اے اوتھے ایس صدی دے آخر تک مسلماناں دی آبادی دنیا بھر دی ادھی آبادی توں ودھ جاوے گی۔ مسلم دنیا ایس گل تے ای پھولی نہیں سماندی کہ دین اسلام تیزی نال پھیل رہیا اے جد کہ اوہناں دی تعلیم‘ ٹیکنالوجی تے سائنس دا ایہ عالم اے کہ عرب دنیا وچ فی بندہ کتاب دا تناسب ہر باراں ہزار بندیاں لئی اک کتاب اے۔ صرف سعودی عرب وچ سگرٹ پین والے ہر ورھے پنج ارب ریال دا تماکو پی جاندے نیں جہدا وزن 40 ہزار ٹن بن دا اے جد کہ ایہ رقم سعودی عرب ولوں چاول درآمد کرن دی رقم دے برابر اے۔ مسلمان ملکاں نوں چاہیدا اے کہ اوہ خوراک دی پیداوار تے منڈیاں دے نظام نوں بہتر بنان‘ نویں قنون بنان تے ایس گل نوں یقینی بنان کہ کوئی غریب بھکھا نہ رہوے کہ غریب بندہ مرن نال نہیں سگوں بھکھا مرن توں ڈردا اے۔ میں شاید غلط سنیا یاں پڑھیا سی کہ ہر انسان نوں مناسب سوجھ بجھ یاں عقل سلیم ایس لئی دتی گئی اے کہ اوہ اپنے فرائض زندگی یاں دنیاوی معاملیاں نوں ایہناں دی روشنی دے مطابق حل کرے۔٭