اپوزیشن دا کردار یا حکومتی سہولت کار؟

تھوڑی دیر لئی تصور کر لینے آں کہ آصف علی زرداری تے میاں نواز شریف دے ذاتی اقتدار دا باب ختم ہویا،
تاں عمران خان، بلاول بھٹو تے مریم نواز شریف و شہباز شریف دی سیاست ہجے باقی اے

نعیم مسعود

پہلے ملاحظہ فرمائو بلاول بھٹو دی لب کشائی:
اپوزیشن دا کردار ادا کرن یا اعلان کرن کہ حکومت دے سہولت کار نیں!
دوجی اہم گل کہ کوچہ جمہوریت وچ دم خم نہ رہیا تے ایس دی دہلیز اُتے لوکاں دا آنا جانا وی ختم ہو جائے گا، فیر خواص تے عوام بالا خانیاں و سیاسی آستانیاں اُتے متھا ٹیک کے مراداں پائواں گے حق ملن والا قصہ تمام ہو جائے گا۔ عوام وچ موجودہ آٹے وچ لون دے برابر آتش پرستاں، سورج دی پوجا کرن والیاں تے کجھ اشرافیہ دے چوغا وچ ملبوس کجھ پنڈتاں نوں مال غنیمت تے ریاستی کشور کشائی توں کجھ حصہ ضرور مل جایا کرے گا۔ سوشل ازم و کمیونزم دے بحرِ بیکراں دے اگے جدوں آمراں دی انجمناِ سرمایہ داراں دی مجلساں تے ’’وسطیاں‘‘ دی اجتماعی عبادتاں بند بنھ دین گیاں تے عجیب و غریب قوانین جنم لین لگن گے فیر کسے نوں عمر بن خطاب یاد آن گے تے کسے نوں عمر بن عبدالعزیز، کوئی کارل مارکس نوں لبھے گا تے کوئی لینن دی جستجو پر اودوں تیکر گڈی چھٹ جان پاروں بے بسی نچ رہی ہوئے گی۔ محسن انسانیت نوں عوام یاد کر رہے ہون گے! انج غریب عوام ایکا لوجیکل فیکٹرز دے گملیاں وچ اگائے بے ثمر اشجار دا ماتم کرن گے۔
تھوڑی دیر لئی تصور کر لینے آں کہ آصف علی زرداری تے میاں نواز شریف دے ذاتی اقتدار دا باب ختم ہویا، تاں عمران خان، بلاول بھٹو تے مریم نواز شریف و شہباز شریف دی سیاست ہجے باقی اے۔ جے ایہناں ساریاں دے سیاسی برتن جمہوریت نال لبریز نہ ہوئے تے خالی برتناں وچ وی کھڑکن دے سوا کیہ ہوئے گا؟ جتھے اپوزیشن جمہوریت دی متلاشی تے دلدادہ نہ رہوے اوتھے نکیل اقتدار دے حاملین نوں حکومتی چمک دمک تے پروٹوکول دی چکا چوند وگا لے جاندے نیں نویں روایات جنم لیندیاں نیں، نت نویں قانون شکل پاندے نیں تے عوام مایوسی دے اتار چڑھائو وچ خجل ہو جاندے نیں۔ بلاول بھٹو ہون یا شہباز شریف حتیٰ کہ عمران خان وی ، کیہ ایہہ سب عوام دے ناں تے عوامی خواباں نوں تعبیر بخشن دے ناں اُتے سیاسی نہیں کردے؟ پر ایہہ سب کجھ کدوں تیکر؟ بارہا لکھ چکیا کہ پاکستان دی نوجواناں دی آبادی شماریاتی تناظر وچ 65 فیصد توں زیادہ اے۔ ایہہ نویں پود اے، ڈیجیٹل لائف تے گلوبل الیج دے باسی، کیہ اوہناں نے وی میری تے میرے توں پہلاں دی نسل وانگوں نفسیاتی غلامی ای وچ رہنا اے؟ کیہ ایہناں نوں وی سبز باغیاں تے کالے باغیاں وچ فرق پتہ نہیں؟ روٹی ، کپڑا تے مکان تے نواں پاکستان دی فلاسفی، عمل تے اہداف وچ امتیاز تے مناسبت اُتے ریسرچ ایہناں 65 فیصد وچوں اک دو فیصد والے وی نہیں کر سکدے؟ اوہ جیہڑے اسمبلی وچ کھڑے ہو کے نواز شریف دی مہنگائی نوں للکاردے سن کیہ ایہناں دا تقابلی جائزہ زرداری، نواز شریف ادوار نال کرنا مشکل اے؟ کیہ اوہ وزراء جیہڑے سدا بہاری دی علامت نیں تے موجودہ حکومت وچ وی اقتصادی و سماجی و سیاسی ترقی دے کلمات گھڑدے تے سناندے نیں ایہناں دا جائزہ تے متذکرہ دو تن فیصد والے آرام نال لے سکدے نیں؟ گر نہیں لے سکدے تے دودھ دے دودھ تے پانی دے پانی نال نا آشنا نیں تے انجوائے کردے رہن ایہو جمہوریت و سیاست دی کچی لسی!
منیا کہ بلاول بھٹو سیاست دان ای نہیں اک اسٹیٹس مین دی حیثیت نال ابھر کے سیاسی ا فق اُتے آئے نیں پر جمہوری فلک بوسی لئی ہجے محنت تے تدبر دی بوہت لوڑ اے، پنجاب وچ فیر توں جڑ پھڑن تے کے پی کے وچ رنگ پھڑن لئی ہجے روز دی عرق ریزی مقصود اے سو ایہناں دا فرمان کہ ’’اپوزیشن دا کردار ادا کرن یا اعلان کرن حکومت دے سہولت کار نیں‘‘ اوہناں نے ایہہ طعنہ خاص طور تے نون لیگ تے بالعموم مولانا فضل الرحمان نوں ماریا اے تے جملہ ایس پی ڈی ایم اُتے کسیا اے جس دی بنیاد پیپلز پارٹی ای دی آل پارٹیز کانفرنس وچ رکھی گئی تے پی ڈی ایم ایمبریالوجی دی ابتدائی وچ مولانا نراض ہو گئے سن کہ میری تقریر اُتے مائیک دانستہ بند کیتا گیا۔ مائیک دانستہ بند کیتا گیا یا نادانستہ میزبان پیپلز پارٹی تے وڈی پارٹی نون لیگ نوں ایس ساختی دور ای وچ سوچنا چاہیدا سی کہ کیہ نوخیز رفاقتاں دی حامل تے روایتی مخالف پارٹیاں دا بوجھ مولانا چک سکن گے؟ یا ایس ویلے ابتدائے عشق سی تے دونواں پارٹیاں نوں پتہ ای نہیں سی کہ ایہناں دے لوک وی جلسے جلوساں دی زینت بن سکن گے؟ شاید ایہناں ابتدائی دناں وچ ایہہ سمجھے کہ احتجاجی تحریک روایتی طور اُتے مدارس دے جوش تے دعا دی روحانیت تے قبولیت ای اُتے چلے گی؟ پیپلز پارٹی تے نون لیگ دا پی ڈی ایم دی ناکامی یا کمی اُتے جنہا وی قصور ہوئے کوئی مولانا توں وی پچھے، ایہہ بطور سربراہ کس قدر ناکام ہوئے؟ کیہ ایس ناکامی اُتے پیپلز پارٹی نوں منان تے واپس لیان لئی مولانا نوں مستعفی ہون تیکر نہیں چلے جانا چاہیدا سی؟ البتہ بلاول بھٹو زرداری نوں ایہہ ضروری یاد رکھنا چاہیدا اے کہ ہر وڈی پارٹی وچ 10-15 الیکٹ ایبل حکومتی سہولت کار تے ہر حکومت دے 10-15 ممبران اسمبلی اپوزیشن دے سہولت کار ہویا کردے نیں بلکہ مقتدر دے وی ایس دا تجربہ ابن زرداری نوں گیلابی صاحب دے سینیٹر منتخب ہون تے چیئر مین سینیٹ منتخب نہ ہون اُتے یقینا ہو گیا ہوئے گا۔
رحیم یار خان دی بھری بزم وچ کیتی جان والی بلاول بھٹو دی گل نوں رد نہیں کیتا جا سکدا پر بطور لیڈر ایہناں نوں ایہہ وی یاد رکھنا ہوئے گاکہ پی ڈی ایم دا جڑے رہنا یا پی ڈی ایم نوں جوڑے رکھنا بلاول بھٹو اُتے وی فرض سی جیہڑا فرض اوہ ادا نہ کر پائے۔ ایہہ گل وی نظر انداز نہیں کیتی جا سکدی کہ پنجاب وچ نون لیگ دا اج وی سیاسی مقابل کوئی نہیں، اگلا الیکشن ایس سطر دا تصدیق کنندہ ہوئے گا۔ اپوزیشن دے تھوڑے بوہت بھرم دا ذمہ حکومت دی کمزوریاں و ناکامیاں نے آپ چُک رکھیا اے۔ ایہہ ٹھیک کہ اگلا الیکشن پیپلز پارٹی تے نون لیگ دا اپنا اپنا اے پر نون تے پی پی پی وچ دوستی ہوئے نہ ہوئے تاں سیاسی دشمنی تحریک انصاف دے کمزور سیاسی ہتھاں نوں تے توانا کرے گی! بہرحال قوم بلاول تے مریم نال اصلی جمہوریت دی توقع رکھے ہوئے اے!