ٹیکس دائرہ کار وچ وسعت

حکمراناں نے جِنی چھیتی پٹرولیم مصنوعات وچ وادھا کیتا اے ایس فیصلے توں ہر طبقہ پریشان اے جہنوں کسے طور عوامی فیصلہ نہیں آکھ سکدے کیوں جے ایہدے توں عام بندے اتے مالی بوجھ ودھ گیا اے۔ ہن پیش کیتے گئے سالانہ میزانیہ دے برعکس رئیل سٹیٹ بروکرز’ تعمیرات تے سلیونز نال جڑے افراد تک ٹیکس دا دائرہ وسیع کر دتا گیا اے۔ نیز ریسٹورنٹس نوں وی ٹیکس نیٹ وچ شامل کر لیا گیا اے۔ مفاتح اسماعیل نے ایس امر دا وی عندیہ دتا اے کہ چھوٹے دکانداراں تے صرافہ تنظیماں کولوں وی ٹیکس دی ادائیگی دے حوالے نال مشاورت کیتی جاوے گی۔ سرکاری ملازماں دی بڑی تعداد کولوں وی ٹیکس وصولی لئی سالانہ آمدن گھٹ کر دتی گئی اے جد کہ پروفیشنل افراد نوں قابو کرن لئی وکھرا پروگرام تشکیل دتا جا چکیا اے۔ حکومت دا خیال اے کہ ٹیکس نیٹ ودھان دا مقصد بیرونی قرض دی بیساکھیاں اتے انحصار گھٹ کرنا تے خود انحصاری ول ودھنا اے لیکن
عام بندے اتے بوجھ ودھاندے ہوئے اشرافیہ دی مراعات وچ کمی کرن دے بجائے برقرار رکھی گئی نیں ایسے بنا اتے معاشی ماہرین متفق نیں کہ حالیہ اقدامات توں ملک دی معاشی حالت نوں بہتر بنانا اوکھا اے البتہ مہنگائی وچ ہور اضافہ یقینی اے۔ پٹرولیم مصنوعات وچ وادھے نال ای روزمرہ دی اشیا دے نال زرعی تے صنعتی خام مال دے نرخاں وچ اضافہ ہو چکیا اے۔ ایہناں حالات وچ کاشتکاری تے صنعتکاری دونویں کم جاری رکھنا اوکھا ہو گیا اے وجہ آمدن گھٹ تے لاگت دا ودھنا اے فیر وی ایہہ توقع رکھنا کہ بیرونی قرضیاں اتے انحصار ختم ہووے گا تے ہور ٹیکس نیٹ ودھان نال ملک نوں پیراں اتے کھڑا کرن وچ مدد ملے گی ایسا تصور کرنا کسے طور درست نہیں۔ بجلی تے پیٹرول دی قیمتاں وچ وادھے نال پہلاں ای لوک پریشان سی۔ ہن سوچے سمجھے بغیر ٹیکس دا دائرہ کار ودھان نال زراعت تے صنعت اتے مضر اثرات مرتب ہون گے۔ علاوہ ازیں ملک اک فلاحی ریاست بنن دی بجائے عوام دی جیباں خالی کران والی مشین بن کے رہ جاوے گا۔ پچھلے سالاں توں جہڑے ٹیکس وصولی وچ وادھے دا رجحان اے اوہ وی بغیر سوچے سمجھے کیتے جان والے اقدامات توں گھٹ ہووے گا تے وصولیاں ودھن دے بجائے ٹیکس چوری دا رجحان فروغ پاوے گا۔
بار بار عوام نوں جتایا جا رہیا اے کہ عوام دی بہتری لئی حکومت فوری عام انتخاباں ول نہیں جا رہی بلکہ ایس کوشش وچ اے کہ کسے طرح معاشی مشکلات دور کیتی جان تے ملک نوں دیوالیہ ہون توں بچایا جاوے لیکن قول و فعل دا تضاد ایس قدر اے کہ عوامی حلقے حکومتی موقف دی تائید توں قاصر نیں اوہ لوک جہڑے پچھلی حکومت توں مہنگائی پاروں ناخوش سن ۔ اوہ ہن رنجیدہ نظر آندے نیں لیکن کسے حکومتی وزیر تے مشیر دی توجہ ایس رنجیدگی ول دوائی جاوے تے جواب وچ جھٹ پچھلی حکومت دا طرفدار آکھ کے گل ختم کردتی جاندی اے۔ ایہہ رویہ ہر گز قابل تعریف یا تحسین نہیں بلکہ زمینی حقائق جھٹلان دے مترادف اے۔ پچھلی حکومت اتے ایہو الزام سی کہ اوہنے مہنگائی وچ وادھا کیتا اے لیکن ہن سوال ایہہ اے کہ کیہ اقتدار دی تبدیلی نال مہنگائی گھٹ ہوئی اے۔ ایس سوال دا کوئی ذی شعور وی جواب نہیں دے سکدا بجلی دی قیمت وچ وادھے دے باوجود عوام لمی لوڈشیڈنگ دا عذاب جھیلن اتے مجبور نیں لیکن حکمران مطمئن نیں تے اپنی پالیسیاں نوں ملکی معیشت لئی ناگزیر قرار دیندے نیں۔ ایسی بے نیازی تے بے حسی کسے طور مقبولیت وچ وادھا نہیں کر سکدی ایس لئی وزیر خزانہ نوں چاہیدا اے کہ عام بندے دی جیب توں نظر ہٹان تے حکومت دے غیر ضروری اخراجات گھٹ کرن لئی ٹھوس تے نتیجہ خیز اقدامات کرن کیوں جے محض گلاں نال بوہتی دیر عوامی نفرت نوں چھلکن توں روکیا نہیں جا سکدا۔
ساری دنیا وچ ٹیکس وصولی ہوندی اے محب الوطن تے ذمہ دار شہری ویلے تے ٹیکس جمع کراندے نیں تاں جے امور مملکت وچ کوئی رخنہ نہ آوے۔ ایسے ٹیکس دے عوض حکومتاں اپنے شہریاں نوں بیرونی حملہ آوراںتوں تحفظ فراہم کردیاں نیں۔ صحت تے تعلیم دی سہولتاں دیندے ہوئے اندرون ملک امن وامان نوں یقینی بنایا جاندا اے۔ ایہہ درست اے کہ ریاست دی ترقی تے خوشحالی لئی سرمائے دی
بہت اہمیت اے مگر جہڑی ریاست وصولی اتے توجہ دیوے لیکن فلاحی منصوبیاں توں اکھاں چراوے اوتھے عوام وچ اضطراب پیدا ہونا یقینی اے۔ ایہی اضطراب بعدازاں سیاسی عدم استحکام دا باعث بندا اے۔ کیسی ستم ظریفی اے کہ چند لکھ عام بندے نوں دو ہزار تھما کے سمجھیا جا رہیا اے کہ ملک وچ مہنگائی گھٹ یا کنٹرول ہو جاوے گی ۔ انج سمجھنا کسے طور درست نہیں بلکہ عوام دی اکھاں وچ دھول جھونکن دے مترادف اے۔ مفتاح اسماعیل ممکن اے ملک دی معاشی مشکلات دور کرن وچ سنجیدہ تے مخلص ہون مگر اوہناں دے اقدامات توں ایسا کوئی اشارہ نہیں ملدا کہ اوہ عوامی مشکلاں دور کرن وچ وی سنجیدہ تے مخلص نیں بلکہ انج لگدا اے کہ اوہناں دی ترجیحات وچ عام تے غریب بندے دی کوئی اہمیت نہیں ایسے لئی خزانے لئی مال جمع کرنا تے اوہناں نوں خوب یاد رہندا اے مگر تھلڑے طبقات نوں غربت دی دلدل توں کڈن دا فریضہ بھل جاندا اے۔ ٹیکس نیٹ ودھاندے ہوئے اوہناں نے تنخواہ دار طبقے نوں شکنجے وچ قابو کر لیا اے لیکن مہنگائی توں پیدا ہون والی مشکلاں دا رتی بھر احساس نہیں کیتا ایسے لئی بجلی تے پیٹرول وچ کمی کرن اتے آمادہ نہیں حالانکہ عالمی مارکیٹ وچ تیل دے نرخ ڈگ رہے نیں مگر وزیر خزانہ نوں ایہہ کمی نظر ای نہیں آندی ایسی بے حسی’ بے نیازی تے سفاکی توں کسے طور فلاحی ریاست دا تاثر نہیں بندا۔
عام تے غریب بندے دی مشکلات وچ وادھا
کرن دی بجائے حکومت نوں چاہیدا اے کہ وڈے عہدیاں اتے براجمان شخصیات دی مراعات گھٹ کرن دا طریقہ کار بناوے۔ ایسے جاگیردار جہناں دی ہزاراں ایکڑ اراضی اے اوہناں کولوں ٹیکس دی وصولی نوں یقینی بنایا جاوے۔ وزیر’ مشیر تے ممبران پارلیمنٹ سب صاحب ثروت نیں اوہناں نوں رہائش’ بجلی’ پانی’ فون پٹرول دی مفت فراہمی ختم یا گھٹ کرن اتے وی دھیان دیوے۔ نیز ایہہ جہڑے وڈے وڈے وفود غیر ملکی دوریاں اتے لے جان دا رواج بن چکیا اے اوہنوں بالکل ختم کیتا جاوے۔ ٹیکس وصولی دا دائرہ کار ودھان نال وی کرن والا بوہتا اہم کم ایہہ اے کہ ایف بی آر وچ ایسی اصلاحات لیائی جان جنہاں توں ٹیکس چوری دی حوصلہ شکنی ہووے۔ افسوسناک امر ایہہ اے کہ ایف بی آر توں لکھاں تنخواہ لین والے ٹیکس چوری وچ سہولت کار دا کردار ادا کردے نیں۔ کرن والے اصل کم دی بجائے حکومت داجدوں سہارا زور عام تے غریب بندے دی جیب خالی کران اتے ہووے گا تے کوئی وی شخص ایسے حکمراناں نوں دعاواں نہیں دیوے گا حالیہ ٹیکس نیٹ وچ توسیع ایسا عمل اے جہدے توں ملکی صنعت دا پہیہ جام ہووے گا تے جدوں برآمدات ای نہیں ہون گئیاں تے ملکی معیشت کیویں بہتر ہووے گی؟ ایس حوالے نال وی حکومت نوں سوچنا چاہیدا اے محض ٹیکس نیٹ وچ وادھے نال فیدے دے بجائے الٹا نقصان دا احتمال اے۔