میری ماں مر گئی

ایثار رانا

بھائی جان یقین کرو سب مال لال اے۔ لالولال اے یعنی ”جیہڑا بھنو اوہی لال اے”۔ میں تے اجے مریم اورنگزیب دے دو ہزار دی خوشی برداشت نہیں کر پا رہیا سی کہ عصر حاضر دے ارسطو اول احسن اقبال ولوں بچت دے نویں عظیم نسخے نے میرا ”تراہ ای کڈ دتا” مرشد نے ”ارمانی” دا سوٹ ” بروکس برادر” دی ٹائی تے بیکٹ سیمی نان دے برانڈڈ شوز پائے بلیک کافی دا سپ لاندے ہوئے نسخہ کیمیا قوم دے ہتھ پھڑا دتا۔ فرمایا قوم معاشی بحران توں نکلن لئی اک کپ چاہ گھٹ کر دیوے۔ اسیں ٹھہرے عاشق مزاج ہمیشہ اپنے قائدین دے حکم ”جھوٹی موٹی دے ککھ” گواکھ وچ پا کے جان کے ”اکھیاں مِیٹ” لین دے عادی۔ ارسطو حاضر دے فرمان اتے اسیں اپنے گھر نیانیاں تے ساڈے توں ودھ سیانیاں نوں اکٹھا کیتا۔ اوہناں نوں دسیا کہ اسیں معاشی بحران اتے قابو پانا اے تے اک کپ چاہ گھٹ کرنا اے۔ ساڈی نکی صاحبزادی اچانک اٹھ کے باہر گئی تے اسیں ساریاں نے ٹھاہ دی آواز اتے اپنے اپنے خوشحال سفنیاں توں باہر چھال ماردتی۔ دھی آئی تے اسیں چونکہ بیگم دی موجودگی وچ انج ای خاموش رہنے آں جیویں امریکی صدراں دے سامنے ساڈے غیور وزرائے اعظم۔ بیگم نے اک نظریہ ضرورت دی انتہائی ماہر جج وانگوں پچھیا ایہہ کچن وچ کیہ شرلی پٹاخے چل رہے سن؟ دھی بولی میں احسن اقبال انکل دے حکم اتے اک چاہ دا کپ گھٹ کردتا اے۔ میرے دل توں ”او تینوں لوے مولا” نکلدے نکلدے رہ گیا۔ میں آکھیا پتر ”انج دا کم نہیں کرنا سی چاہ پینا چھڈنی سی۔ پتر بولیا لو جی میں تے انکل احسن دے حکم توں متاثر ہو کے گھر دے سارے پکھاں توں دو دو اتے اتار لیتے نیں۔ اک پروالا پکھا گھٹ بجلی کھاوے گا تے بوہتی گرمی لگی وی تے اسیں اک دوجے نوں ”پھلاں نال دھرتی سجا کے پکھیاں جھل” سکنے آں۔ واہ احسن صاحب تسیں تے آئی ایم ایف’ ورلڈ بینک دے کاروبار دے پھٹے چک دتے۔ مینوں چیتا اے
ماضی وچ جدوں بابا رحمتے نے پانی دی کمی دے حوالے نال بلبلے بلند کیتے سن۔ میں واش روم وچ دو دے بجائے اک لوٹے نال کم چلانا شروع کردتا سی۔ بچت تے فیر بچت اے نا بابو۔ بادشاہ سنتا سنگھ نے آئی ایم ایف نال ڈیل دی خوشی وچ سارے قیدیاں نوں رہا کرن دا حکم دتا’ رہا ہوندے قیدیاں وچ اوہدی نظر اک بزرگ اتے پئی۔ سنتا بولیا بزرگو تسیں کدوں توں جیل وچ او’ بزرگ بولے بادشاہ سنتا میں تہاڈے والد شہنشاہ بنتا سنگھ دے دور توں قید آں۔ سنتا سنگھ دی اکھاں وچ اتھرو آ گئے تے حکم دتا کہ ”بابے نوں ڈک لواے ساڈے ابا حضور دی نشانی اے۔ موجودہ حکومت ساڈا احترام ایویں نئیں کردی۔ اسیں اوہناں دے وڈے بھرا دی نشانی آں لہذا شیر اک واری چھڈ کے سو واری فیر وی آوے تے اسیں رہنا قید ای اے۔
ماضی وچ بکرا عید آندی سی تے سانوں ٹینشن شروع ہو جاندی سی’ بچے بکرے اتے نہیں مندے سن تے سانوں بیل خریدنا پیندا سی۔ فیر قصائی صاحب دی
اجرت تے فیر خرچے تے خرچا۔ شکریہ مریم اورنگزیب صاحبہ تہاڈی وجہ نال عید کھلی ڈلی گزرے گی۔پنج بیل خریداں گا پنج اونٹ تے لاتعداد بکرے چھ ڈیپ فریزر لیتے نیں تے اوہناں دی بجلی دی مسلسل سپلائی لئی جنریٹرز وی لے لیتے نیں۔ جے تسیں دو ہزار روپے نہ دیندیاں تے ایس واری بکرا عید اتے میں اپنی قربانی دین دا سوچ رہیا سی۔ خیر نال مہنگائی نے پہلاں ای سانوں باں باں سکھا دتی اے۔ ٹیکساں نے صفائی دے نال کھل اُدھیڑ دتی اے۔ یعنی ”توبہ توبہ کرا دتی توں ظالماں” تہاڈے دو ہزار نے تے میری قسمت بدل دتی۔ میں اوہناں پیسیاں نال اک طیارہ چارٹر کراواں گا تاں جے قربانی دا گوشت ملک دے مختلف حصیاں وچ پہنچا سکاں لیکن سنیا اے کہ اگوں اوتھے وی تہاڈے دو ہزار نے لہراں بہراں کرا دتیاں ہوئیاں تے ساڈے حاتم طائی اپروچ دے بوتھے اتے خوشحالی دی چپیڑاں تاپڑ جان۔ ایہہ گل غلط اے آپی مریم اورنگزیب اسیں تے سنیا سی اوہناں ریوڑیاں ونڈدا ہووے پہلے اپنیاں دے کھیسے بھردا اے۔ ایہہ کیہ گل ہوئی پوری قوم تے دو ہزار دے جھولے لوے تے مزے وچ آکھے ”پھائی پھائی زور دی” تے ساڈے مصدق ملک بھیا دے کول زہر کھان نوں وی پیسے نہ ہون۔ خدارا اوہناں دی معصوم خواہش نوں پوری کرن وچ اوہناں دی مدد فرمائو۔ بنتا سنگھ نے اپنی رہیڑی توں تازہ تازہ جلیبیاں کڈ کے اپنے چینی دوست نوں دتیاں تے اوہ کھان دی بجائے رون لگیا۔ بنتا نے انتہائی مہنگے گھیو توں تر اپنے پرنے نال اوہدے اتھرو صاف کردیاں ہوئیاں وجہ پچھی تے اوہ بولیا ایہہ جلیبیاں نئیں چینی وچ لکھیا اے تہاڈی اماں فوت ہو گئی اے۔ ہن دسو جے سانوں ہر گل وچ فوتگی نظر آندی اے تے اوہدے وچ سنتا سنگھ دی جلیبی دا کیہ قصور۔ مرن والے تے گڑ کھا کے مر جاندے نیں خیر غیرت مند شرم نال وی مر جاندے نیں۔
جہاز کریش ہو گیا ائیر ہوسٹس بولی تسیں پیرا شوٹس بنھ کے چھال لا دیو۔ تھلے اترو گے تے ایمبولینساں کھڑی ہون گئیاں تاں جے تہانوں فوراً امداد دتی جا سکے۔ سنتا سنگھ’
بنتا سنگھ نے چھلانگ لائی سنتا نے پیرا شوٹ کھولیا تے اوہ کھل نہ سکیا۔ اوہ غصہ نال بنتا سنگھ نوں بلیا پھائیا ایہہ پیراشوٹ نئیں کھل رہیا تے توں ویکھ لئیں تھلے ایمبولینساں وی نئیں ہونیاں۔اسیں کنے خوش ہوئے ساں جدوں وزیراعظم نے قوم نوں دسیا سی کہ انڈونیشیا توں کھان دے تیل دے بحری جہاز پاکستان پہنچ رہے نیں لیکن ایہہ شپس امریکی بحری بیڑے وانگوں اجے تک نہیں پہنچ سکے۔ اپوزیشن آکھ رہی اے کہ چین دے دو ارب ڈالر وی اجے بینکاں وچ نہیں آئے۔ میرا یار سنتا بولیا بھائی جان ویکھ لینا حکومت مُک جاوے گی افغانستان توں کوئلہ وی نہیں آنا۔ بہرحال کج آوے نہ آوے جے مرد آہن چپ چپیتے آ سکدا اے تے ساڈا ببر شیر اسحاق ڈار وی ضرور آوے گا۔ لیکن ساڈی اک بنتی عرف درخواست اے کہ بہتر دے آئین دے تناظر’ قنون دی سالمیت تے انصاف دی عصمت دے تحفظ لئی خدارا اوہ وزیراعظم دے جہڑے طیارے وچ اسحاق ڈار ملک توں باہر گئے سن واپسی وی اوسے وچ ہونی چاہیدی اے۔ اخیر ایہہ ملک طاقتوراں’ وڈیریاں دا اے جنگل اے تے جنگل دے اصول دی پامالی نہیں ہونی چاہیدی۔