پنجابی دے مہمان لکھاری

ایم آر شاہد

ضیاء ساجد اک سدھا سادا مزاح نگار سی تے اک درویش صفت اخبار نویس جو دفتر وچ بہہ کے ایڈیٹر دے طور تے کم کردے رہے نیں۔ سیاسی لیڈراں تے حکمراناں دے نال براہ راست رابطہ نہیں رہیا نہ اوہنوں کدی کوئی پلاٹ ملیا اے تے نہ ای غیرملکی تے ملکی دوریاں دا موقع ملیا۔ ضیاء ساجد ماہنامہ ”دھنک” مرحوم دے زندہ جاوید ایڈیٹر سردار سکھیرا دی دریافت سی تے ایہدے بعد ضیاء ساجد اپنیاں تحریراں’ شرارتاں تے مزاح دے راہیں دھنک تے چھائے رہے۔ ایہ رنگ رنگیلا تے چھیل چھبیلا ضیاء ساجد تقریباً ڈیڑھ ورھے تک بستر نال لگا ہویا سی اوہدے گلے وچ کینسر دریافت ہو گیا کئی مہینے دے علاج و معالجے دے بعد ایہدا کامیاب اپریشن وی ہو گیا سی۔ ایہدے علاج تے لکھاں روپیے خرچ ہو چکے سن اوہناں دیاں دو دھیاں نیں جو اک سکول وچ پڑھاندیاں تے دوجی کسے دفتر وچ کم کردی اے تے اپنے باپ دا علاج کروا رہیاں سن۔ شاید کسے وی سرکاری’ ادبی ادارے نے وزیراعلیٰ پنجاب نوں اوہناں دی حالت زار نہیں دسی نہیں تے شاید اوہ اوہناں لئی کجھ کردے۔ اوہناں دا انتقال دسمبر 2008ء وچ ہویا۔
قمرمیرٹھی (شاعر)
قمر میرٹھی دا اصل ناں قمرالدین احد تے تخلص قمر سی ایہ 1916ء وچ میرٹھ دے مقام تے پیدا ہوئے۔ تعلیم اردو’ فارسی’ انگریزی تے مکمل عبور حاصل سی اوہناں دا پیشہ ڈینٹل سرجن سی شعرگوئی دا آغاز 1933ء توں کیتا اوہناں دے والد دا ناں مولانا شمس الدین احمد سی۔
اکتوبر 1960ء وچ حضرت نشتر جالندھری دے شاگرد ہوئے تے مشورہ سخن کرن لگے اوہناں دی خداداد ذہانت توں نشتر جالندھری متاثر ہوئے بناں نہ رہ سکے ایس لئی 14 فروری 1960ء نوں اک شاندار ادبی اجتماع وچ حضرت نشتر نے اپنی زندگی وچ آپ نوں اپنی جانشینی دا شرف عطا فرمایا۔
ایہناں دی تریخ وفات 31 دسمبر 1977ء اے۔ ابدی آرام گاہ قبرستان میانی صاحب عقب ثریا عظیم ہسپتال چوک چوبرجی لہور وچ گورکن دے ڈیرے دے سامنے اے قبر پکی اے جہدے تے کتبہ سنگ مر مر دا لگا اے۔ (جاری اے)