پنجابی دے مہان لکھاری

مشتاق بٹ (پنجابی زبان دا خدمت گزار)
مشتاق بٹ اندرون موچی دروازہ دے اک کشمیری گھرانے وچ پیدا ہوئے۔ ایہناں نے اپنی عملی زندگی دا آغاز ریلوے وچ کلرک توں کیتا فیر ذاتی محنت نال وکالت دا امتحان پاس کر کے ایہنوں اپنا مستقبل بنا کے مشہور ہوئے۔ اپنی زبان تے ثقافت دا علم بلند کرن لئی سرکاری سطح تے اوہنوں منان لئی ہر ویلے کسے نہ کسے تلاش وچ رہندے۔ پنجاب یونیورسٹی وچ ایم اے پنجابی دی کلاساں لئی مشتاق بٹ دی قیادت وچ نکلن والا مال روڈ تے جلوس اج وی پنجابی لکھن پڑھن والیاں نوں یاد ہووے گا۔
1972ء وچ لہور ریڈیو سٹیشن دے ڈائریکٹر اظہار کاظمی نال دوٹوک لفظاں دے نتیجے وچ ریڈیو تے پنجابی خبراں تے بچیاں دے پروگرام دے آغاز دا سہرا وی مشتاق بٹ دے سر اے۔ ریڈیو تے پہلی واری پنجابی خبراں پڑھن تے نیوز ریڈرز زاہدہ بٹ دے اعزاز وچ 22اپریل 1972ء نوں اولمپک ہائوس ٹمپل روڈ دے ہال وچ تقریب منعقد کرکے اوہنوں پنجابی دھی (سُپتری) دا خطاب دتا تے چادر دتی۔
مشتاق بٹ دا 17 جون 1986ء نوں لہور وچ انتقال ہویا ایہناں دی ابدی آرام گاہ قبرستان میانی صاحب وچ اے۔
قیوم اعتصامی (نامور صحافی، ادیب)
نامور صحافی، ادیب قیوم اعتصامی دا اصل ناں محمد قیوم سی۔ تخلص اعتصامی سی۔ موضع کھٹکڑاں کلاں تحصیل نواں شہر ضلع جالندھر انڈیا وچ پیدا ہوئے۔ ایہناں نے بی اے’ منشی فاضل’ ادیب فاضل تعلیم حاصل کیتی۔ یاد رہوے کہ پاکستان بن توں پہلاں ای اوہناں دے والد دا سندھ دواخانہ گجرات وچ سی۔ ایہناں دے والد محترم اپنے زمانے دے اپنے بزرگاں دے نقش قدم تے دہلی میڈیکل کالج توں سندیافتہ طبیب سن تے اکھاں دے معالج وی۔ قیوم اعتصامی نے اپنی ابتدائی تعلیم دے نال نال والد دی ہمراہی وچ باقاعدہ حکمت دی تربیت لئی۔ (جاری)