پھلاں دا بادشاہ

ایس ورھے امب مارکیٹ وچ دیر نال آیا سارا نظام اوس ذات دی مرضی نال چلدا اے پر انسان ایہنوں آپ وی چلان دی کوشش کردا اے۔ اسلام آباد وچ جون وچ گرمی دا ریکارڈ ٹُٹیا’ کجھ دن بعد جون وچ بارش تے ژالہ باری نال موسم گرمی توں فوراً سردی وچ بدلدا ویکھیا رات نوں پکھے’ اے سی بند تے لحاف دا استعمال کرنا شروع کر دتا۔ قدرت سانوں اپنی موجودگی دا احساس دواندی رہندی اے کدی گرمی توں فوراً سردی کرکے’ کدی زلزلے نال جھنجھوڑدی اے کہ اے انسان تو اپنی اوقات وچ رہ’ پر اسیں انسان نہیں شیطان بن کے کرتب وکھانے آں۔ ہر سطح تے ہر پاسے بے ایمانی ہر پاسے جھوٹ۔ کوئی شرم نہیں’ کوئی حیا نہیں۔ ہر کم وچ حداں پار کر چکے آں۔ ہر شعبے وچ سفارش’ سیاست دے اندر سیاست اے’ رشوت اسیں لینے آں’ بے ایمانی اسیں کرنے آں’ جھوٹ اسیں بولنے آں’ دوجیاں نوں دکھ کے خوشی محسوس کرنے آں۔ کسے دی مدد نہیں کردے۔ دوجیاں دے مال و زر تے قبضہ اسیں کرنے آں۔ غریباں نوں تکلیف اسیں دینے آں۔ اپنے ذاتی مفاد لئی دوجیاں دی جان لین توں گریز نہیں کردے۔ قرآن مجید وچ آ چکیا اے جو قوماں جو اسلام دے دسے گئے راہواں تے نہیں چلدیاں تے میں اوہناں نوں تباہ کر دینا واں۔ اوہناں دے دل اینے کالے ہو چکے نیں کہندے نیں ویکھی جاوے گی۔ فیر وی ہر چیز سمیٹن وچ لگے رہنے آں۔ جس ذات نے سانوں ایس عارضی دنیا وچ اتاریا اے ایتھے وی ددھ’ شہد’ رنگ برنگے میوہ جات’ خوبصورت مناظر’ خوبصورت موسم’ ہر اوہ چیز دے رکھی اے جہدے لئی جنت دی خواہش لئے پھرنے آں۔
انساناں لئی ایہ دنیا وی کسے جنت توں گھٹ نہیں۔ کیہ کیتا جاوے ایس جنت وچ وگاڑ اسیں آپ پیدا کرنے آں۔ الزام دوجیاں تے مڑھ دینے آں۔ اج اوس ذات دے دتے گئے ان گنت تحفیاں وچوں صرف امب دی ای گل کرنے آں۔ امب اوہ پھل اے جو سارے پھلاں دا بادشاہ اے۔ ایس ورھے امب نوں آندے آندے دیر ہوئی تے جہڑے امب دے رسیا لوک نیں ایہدی تلاش وچ نکلے۔ اوہناں وچ میرا بیٹا وی شامل اے۔ روز امباں دا ذکر کردا کدوں نظر آن گے۔ اک دن اوہ فریزچوں ر امب لے آیا اوہدے نال شیک بنایا ساریاں نوں پلایا۔ پچھیا ایہ کتھوں ملے کہیا اسلام آباد دے اک وڈے شاپنگ سنٹر توں جتھے دنیا دی ہر چیز ملدی اے۔ ایہدے کجھ عرصے بعد مارکیٹ وچ وی امب وکھائی دین لگ پیا۔ ظفر چوہدری’ محمد قاسم تے رمضان لغاری ورگے دوستاں نے امباں دیاں پیٹیاں دتیاں تے ایہ سلسلہ جاری اے۔ امب کھان دا مزا گھر دے بندیاں دے نال آندا اے۔ امب کھا رہیا ہووے تے ہتھ منہ صاف رہوے ایہ ممکن نہیں۔ امریکہ توں میرے کزن جان جاوید آصف خان نے انوررٹول دے بارے معلومات شیئر کیتی۔ میں ایس معلومات توں پہلاں انوررٹول نوں انوراٹھور ای کہندا رہیا تے سمجھدا رہیا کہ ایہدا تعلق کشمیر دی فیملی راٹھور نال اے پر جدوں پڑھیا تے پتہ لگا ایس امب دا راٹھور خاندان نال کوئی تعلق نہیں۔ انور رٹول امب دی اوہ قسم اے جو چھوٹا تے سبز تے شہد وانگوں مٹھا اے۔ ایس امب دا آبائی وطن اترپردیش انڈیا دا علاقہ رٹول اے۔ پاکستان بنن توں بعد انورالحق نامی رٹول توں ہجرت کرن ویلے ایس امب دیاں کجھ قلماں اپنے نال ملتان لے آیا۔ ملتان جو کدی امباں دے ناں توں مشہور سی ہن ایہ شہر سوسائٹی دے قبضے وچ آ جان نال ہزاراں امباں دے پیڑ کٹ دتے گئے۔ اوس صوبے شہر وچ ہویا جتھے عدالت’ قنون سارے ای موجود نیں پر باغات نوں ختم کرن وچ ڈر کسے نوں نہ لگا جے ایہو حالت رہی تے ساڈیاں اگلیاں نسلاں امباں نوں فوٹواں وچ ویکھن گئیاں۔ اوہ انور رٹول اوہ سی جو اپنے نال ہجرت کرن ویلے ایس امب دیاں قلماں لیایا باغ بنائے تے اک ایہ نیں جہناں نے باغ اجاڑے انساناں دے نال چرند پرند نوں بے گھر کیتا پریشان کیتا۔
پاکستان وچ انوررٹول’ چونسا’ دوسہری مشہور اے۔ لنگڑا امب وی بڑا مشہور تے پسند کیتا جاندا اے۔ ایہ امب لنگڑا نہیں ہوندا۔ ایس امب دے بارے کہیا جاندا اے بادشاہ اکبر دے زمانے اوہنوں اک لنگڑے فقیر نے باغ وچ اک پودا امب دا لایا سی۔ اوس رُکھ دے امب لنگڑے فقیر دے ناں تے بڑا مشہور ہویا۔ امباں دیاں بہت ساریاں ہانیاں نیں جو کالم وچ سما نہیں سکدیاں۔ اصل وچ امب گرم علاقیاں وچ پیدا ہون والا پھل اے۔ کچے امب دا اچار بنایا جاندا اے۔ برصغیر وچ ایہنوں سارے پھلاں دا راجا کہیا جاندا اے۔ سیب تے بیر وانگوں امب دیاں سینکڑوں نہیں ہزاراں قسماں نیں۔ امب پاکستان’ بھارت تے فلپائن دا قومی پھل اے۔ انگریزی دا لفظ مینگو تمل زبان دے لفظ مینگا توں اے سولھویں سترھویں صدی وچ جدوں برطانوی تاجراں نے جنوبی ہند نال تجارت کیتی تے اوہنوں مینگو کہیا جان لگ پیا۔ ہر ورھے دنیا وچ چار کروڑ سٹھ لکھ ٹن امب پیدا ہوندے نیں۔ امب ہن دنیا دے ہر خطے وچ پیدا ہوندا اے۔ ایہ ایشیا وچ ای نہیں افریقہ وچ وی پایا جاندا اے۔ چین’ تھائی لینڈ’ بنگلہ دیش’ اسرائیل وچ وی امب پیدا ہوندے نیں تے ڈھیر ہوندے نیں۔ امب سب توں پہلاں پنج ہزار ورھے پہلاں انڈیا وچ پیدا ہویا سی۔ دنیا دے مشہور سیاح ابن بطوطہ نے 41 صدی وچ لکھیا کہ اوہناں نے موغادیشو وچ امب نوں پھلدے پھولدے ویکھیا سی۔ سترھویں صدی وچ امب امریکہ وچ پایا جانے لگا۔ ہن امب دنیا دے ہر گوشے وچ کیرپٹن دے جزائر توں لے کے برازیل تے پیر ووچ وی پایا جاندا اے۔ انڈیا وچ اک تن سو ورھے پرانا امب دا رُکھ اے جتھے اج وی ایہدے تے امب لگدے نیں۔ امب دا پیڑ بودھ مذہب وچ مقدس سمجھیا جاندا اے۔ مہاتما بدھ اپنی عبادت امباں دے پیڑ دے تھلے کردے سن تے آرام وی ایتھے ای کردے سن۔ امباں وچ ویہہ توں ودھ وٹامنز تے معدنیات پوٹاشیم پائے جاندے نیں۔ گینز بک دے ریکارڈ دے مطابق سب توں وڈے امب دا وزن ساڑھے تن کلو اے۔ لمبائی وچ 30.48 سنٹی میٹر اے۔ سب توں چنگا امب اوہ اے جو تہاڈے ہتھ تے منہ وچ ہووے۔ امب کھاندے ہوئے شکر ادا کرو۔ موسم لاجواب اے جے معیشت نوں خطرہ نہ ہووے تے اک امب کھا لوو۔ ٭٭