امام مسجد تے ظلم دی حکومت

پرانے پاکستان وچ خودکشیاں دا موسم شروع ہو چکیا اے۔ حالات کتھوں دی کتھے جا رہے نیں تے اسیں کبوتر وانگوں اکھاں بند کر کے کس معجزے دے انتظار وچ آں۔ اک دوجے دا ڈھڈ پاڑ کے لٹی دولت واپس لیان والے فیر اکٹھے ہو کے مہنگائی دا طوفان لے آئے نیں تے اسیں اوہناں نوں اپنا مسیحا تسلیم کر رہے آں۔ عمران خان دے ساڈے تن سالہ دور وچ عوام دی خوشحالی تے ملک دی ترقی دا روشن تے سنہرا دور صرف کجھ مہینیاں دے اندر تریکی وچ تبدیل ہونا شروع ہو گیا اے۔ جی ہاں’ اوہو دورجدوں 14گھنٹے دی بدترین لوڈشیڈنگ دے خلاف پنجاب وچ خادم اعلیٰ ہتھ والا پکھا پھڑے اپنی ای حکومت دے خلاف مینار پاکستان وچ احتجاج کیتا کردے سن تے اج اوہ خود وزیراعظم تے پتر وزیراعلیٰ اے۔علی بابا تے 40چور آکھدے آکھدے اوہ خود اوہناں پاروں وزیراعظم بن گئے تے پتر نوں وزیراعلیٰ بنوا لیتا ۔ اپنے اپنے دور وچ اک دوجے اتے ارباں روپے لٹ مار دے مقدمے بنان والے اج کیویں بغل گیر ہو چکے نیں تے ساڈی بے حسی دی انتہا ویکھو۔ ساڈے ارباں روپے لٹن والے ای ساڈے اتے مسلط کر دتے گئے۔ تنکا تنکا جوڑ کے بڑی محنت نال آشیانہ بنایا سی جہڑا پی ڈی ایم نے اک ای جھٹکے وچ بکھیردتا۔ مہنگائی تے لوڈشیڈنگ پچھلے 74 ورھیاں وچ اینی نہیں ہوئی جہنی ہن اے۔ ذرا اج توں پنج سال پرانے پاکستان دا تصور کرو۔ خودکشیاں’ چوریاں’ ڈاکے’ لٹ مار تے فراڈ جنا عروج اتے سی ہن فیر اوہو صورتحال بندی جا رہی اے بلکہ اوس توں وی ودھ کے یکم جولائی توں ہن تک تن افراد ٹرین دے تھلے سر دے کے خودکشی کر چکے نیں۔ پہلاں ڈکیتی کردے ویلے ڈاکو مال لٹیا کردے سن ہن اوہ پہلاں قتل عام کردے نیں فیر مال لٹدے نیں۔ اک ہور ستم ظریفی وی ویکھو کہ جہناں دی تنخواہ 40ہزار توں گھٹ اے اوہناں نوں دو ہزار ماہانہ اضافی ملے گا تے جہناں دی تنخواہ 50ہزار توں ودھ اے اوہ ٹیکس ادا کرن گے۔ مزے دی گل تاں ایہہ اے کہ جہناں دی تنخواہ ڈیڑھ لکھ توں اتے اے اوہناں دا پٹرول’ ڈیزل’ گھر دا خرچہ’ گیس’ بجلی’ بچیاں دی سکول فیس’ ہسپتال تے ایمبولینس سب مفت اے۔ ایہنوں آکھدے نیں میثاق جمہوریت تے ساڈے امام مسجد دی تنخواہ 8ہزار توں شروع ہو کے 15ہزار اتے آ کے ختم ہو جاندی اے۔ بازار جوتی خریدن گیا اک خوبصورت چہرہ’ چٹی ٹوپی’ سنت نال سجی داڑھی تے چٹے لباس وچ ملبوس انسان نے جی آیاں نوں آکھدے ہوئے وکھرے ڈیزائن وکھائے۔ میرے پچھن اتے اوہناں نے دسیا کہ اوہ اک مدرسے وچ معلم دے پیشے نال جڑے سن تے قریب دی مسجد وچ امام نیں۔ بس ایس مہنگائی دے کارن گھریلو حالات توں مجبور ہو کے رزق حلال دی تلاش وچ اک امام تے مدرسے دا استاد ہون دے ناطے اپنی ساری حدودو قیود دا خیال رکھدے ہوئے ایس پاسے رخ کیتا تے ایتھوں مینوں ماہانہ 17ہزار ملدے نیں۔ روزانہ دا سو روپیہ تے کمیشن وکھری اے جد کہ مسجد توں کل تنخواہ 8ہزار ملدی اے ۔ میں خموش ہو گیا میرے کول لفظ ختم ہو گئے۔ میرے توں صرف اینا ہو سکیا کہ جتیاں دا ڈبہ اوہناں دے ہتھوں لے لیتا ۔ اوہ اصرار کردے رہے کہ میں پا کے چیک کروانا واں’ میری ڈیوٹی اے لیکن میں انج نہیں کرن دتا۔ میرا ضمیر مینوں بار بار آکھ رہیاسی کہ ایہناں ہتھاں نوں چم’ کسی ویلے ایہہ ہتھ مقدس کتاباں قرآن’ تفسیراں’ حدیثاں’ مسئلیاں تے دوجی اسلامی کتاباں چکیا کردے سن لیکن اج اوہو ہتھ جوتے تے چپلاں چکن اتے مجبور نیں۔ اوہناں نے وی مدرسہ وچ اینی ای کتاباں پڑھیاں نیں اوہناں اے سال لائے نیں صرف اوہدا نام مدرسہ سی۔ دین سکھن تے سکھان والیاں نوں اینی وڈی سزا تے نہ دیو۔ اوہ وی ساڈے معاشرے دا حصہ نیں۔ اسیں نکاح توں لے کے جنازے تک مولوی دے انتظار وچ ہونے آں۔ اوہ پنج ویلے مسجدوچ سانوں نمازاں پڑھاندا اے۔ ساڈے بچیاں نوں دینی تعلیم نال آشنا کردا اے۔ اوہنوں وی رہن نوں مکان چاہیدا اے۔ بچیاں لئی تعلیم دے اخراجات چاہیدے نیں تے والدین دے علاج لئی دوائیاں چاہیدیاں نیں مگر اسیں امام صاحب نوں کیہ بنا رکھیا اے حالانکہ امام اک اسلامی قیادت دا عہدہ اے۔ ایس تناظر وچ امام صاحب اسلامی عبادت دی خدمات دی قیادت کر سکدے نیں۔ نماز دی امامت کر سکدے نیں۔ کمیونٹی لیڈر دے طور تے خدمات سرانجام دے سکدے نیں تے مذہبی رہنمائی فراہم کر سکدے نیں۔ حدیث دے مطابق جہڑے شخص دا انتخاب بطور امام کیتا جاوے اوہ قرآن و سنت دا بوہتا علم رکھدا ہووے تے چنگے کردار دا حامل ہووے۔ ایہہ اصطلاح اسلام وچ اک تسلیم شدہ مذہبی سکالر یا اتھارٹی لئی وی استعمال ہوندی اے لہٰذا کسے اللہ والے نال دوستی لائو۔ اوہدی گزر بسر جانو تے اپنی ذمہ داری نبھائو۔ امام مسجد’ عالم دین یا کسے وی اللہ والے دے گھر دے افراد تے اوہدی آمدن پچھ کے اپنے گھر جیا بجٹ ذرا بنا کے ویکھو ۔اسیں سکھ نہیں سکدے تے سکھان والے دی ہمت بن کے صدقہ جاریہ تے کما سکنے آں۔ ثواب دے لالچ وچ ای سہی نیکی دی تجارت کر لو۔ اخیر وچ عمیر علی انجم دی اک نظم جہڑی آن والے حالات دا انکشاف کر رہی اے۔
یہاں سے ختم ظالم کی حکومت ہونے والی ہے
شواہد صاف کہتے ہیں بغاوت ہونے والی ہے
لٹیروں کی سیاست کا ہے سورج ڈوبنے والا
طلوع اس شہر میں تازہ قیادت ہونے والی ہے
وہ دن آنے ہی والے ہیں ملے گا حق غریبوں کو
ہمیں حاصل وہی ماضی کی عظمت ہونے والی ہے
زمیں کے ناخدائوں نے ستم کی انتہا کردی
سمجھ لو آسماں والے کی رحمت ہونے والی ہے
نقاب آخر اُترتے جارہے ہیں سب کے چہروں سے
عیاں اس قوم پر ساری حقیقت ہونے والی ہے
عمیر انجم قیامت تو خدا جانے کب آئے گے
قیامت سے مگر پہلے قیامت ہونے والی ہے۔