جنگ نامہ حضرت امام حسینؑ

ہُن دوجا بیٹا آیا اس دا لعنتی
اس گھوڑا آن وگایا قاسم شیر تے
اللہ اوہ پُکھڑایا ڈھٹھا خارجی
سِر اُس دا چا لاہیا قاسم وڈھ کے
اس مار کے خاک رلایا اس پلیت نوں
ہُن تریجا بیٹا آیا اس دا خارجی
اس نیزا آن کے واہیا پاک امام نوں
تاں قاسم وار بچایا نیزا چا کے
شاہ مار کے کھنہ ڈاھیا کتا خارجی
اوہ بھی مار ونجایا نال ہن غضب دے
ہن چوتھا بیٹا آیا اس پلیت دا
اس آ کے شور مچایا وچ میدان دے
وڈھ کے سر وگایا اس دا ساہمنے
شاہ دہروڑ کے تازی آیا کول امام دے
ہن مینوں تریہہ گھبرایا چاچا میریا
نہیں کھپدا ایہ کھپایا کٹک یزید دا
میں کرن زیارت آیا چاچا تدھ دی
شاہ نال سینے دے لایا ملیا رو کے
ہن زینب سد بلایا پھوپھی سی اپنی
اس موتی منہ وچ پایا آہا قیمتی
اس آہا آب چھپایا اندر اپنے
شاہ چڑھیا ہو سوایا پھر ہن جنگ تے
ہے ڈاھڈا رن بھکھایا قاسم جاہ کے
تاں ارزق بیڑا چایا شاہ دے جنگ دا
گرز سو من دا چایا وچ اس ہتھ دے
توں میرا پور کھپایا آکھے شاہ نوں
تاں شاہ مونہوں فرمایا آکھے رب نوں
رکھیں شرم خدایا ایس لعین توں
اس دو ہتھڑ کر کے واہیا گرز امام نوں
رب بھوئیں وچ دھسایا گرز پلیت دا
شاہ پرت کے پچھے آیا اس لعین دا
شاہ مار کے کھنہ ڈھایا کتا خارجی
دو ٹوٹے کر وکھایا وچ میدان دے
ارزق ڈھٹھا ویکھ کے سب لشکر دھایا
اونہاں آن چوفیرے امام دے چا گھیرا پایا
تیراں، سانگاں، نیزیاں چا جھرمٹ پایا
اوتھوں قاسم شیر نوں لے تازی آیا
کول امام حسین دے ہو زخمی سی آیا
گھوڑے اتوں اٹھ کے شاہ ہتھیں لایا
ایہ بیٹا حضرت حسن دا ہو شہید سدھایا
ایہناں شعراں وچ کربلا دی جنگ دا نقشہ پیش کیتا گیا اے۔ جدوں شہزادہ قاسم تیار ہو کے لڑائی لئی میدان وچ آیا تے ہک ایہو جیہا حملہ کیتا ، لشکر وچ بھاجڑ پے گئی۔ اینیاں نوں ماریا جہناں دی گنتری وی نہیں ہو سکدی۔ عمر سعد نے ارزق نوں سدیا تے آکھیا۔ یزید کول تاں تیرا چوکھا مرتبہ اے۔مریندی فوج ویکھ کے تینوں شرم نہیں آئی۔ (جاری)