ملک امیر محمد خان

(نواب آف کالا باغ)

ایم آر شاہد

نواب آف کالا باغ امیر محمد خان اک پاسے تے روایتی انداز تے جاگیردارانہ نظام دا آخری تے مضبوط علامت سن تے دوجے پاسے اوہ پاکستان وچ ایڈمنسٹریشن دا اک مثالی کردار رہے۔ نواب آف کالاباغ ملک محمد امیر خان 20جون 1910وچ کالاباغ وچ پیدا ہوئے تے 26نومبر 1967 نوں کالاباغ وچ اوہناں نوں قتل کردتا گیا۔ ریاست کالاباغ وچ اوہناں دی بادشاہت سی تے کالاباغ دی پوری آبادی اوہناں دی رعایا سی۔ اوتھے ایہہ مشہور سی کہ کسی بزرگ نے کالاباغ دے علاقے وچ وصیت کیتی سی کہ اوہناں دی موت اتے اوہ شخص نمز جنازہ پڑھائے گا جہنے تہجد سنے کوئی نماز زندگی بھر قضا نہ کیتی ہووے۔
ایس موقع تے ملک محمد امیر خان نے کہا کہ مرن والا مر گیا لیکن ساڈے راز عیاں کر گیا۔ ملک صاحب ایچ ای سن کالج لہور تے آکسفورڈ یونیورسٹی توں فارغ التحصیل سن۔ تحریک پاکستان وچ اوہ اک نوجوان جاگیردار دی حیثیت نال شامل ہوئے تے کہیا جاندا اے کہ جدوں قائداعظم لہور وچ تحریک پاکستان لئی چندہ جمع کرن لئی آئے تے اجلاس وچ نواب آف کالاباغ وی پہلی صف وچ موجود سن۔ اوہناں نے ایس موقع تے کہیا کہ ایتھے موجود سارے لوک جنا چندہ جمع کرن گے اوہدے برابر رقم میرے ولوں تحریک پاکستان لئی مسلم لیگ لئی ہووے گی۔
ایس طرحاں قائداعظم نال ملک محمد امیر خان دا پہلا تعارف ہویا سی۔ صدر جنرل ایوب خان ملک دے پہلے فوجی حکمران سن جہڑے 1958وچ 1956 دے آئین نوں منسوخ کر کے بطور صدر تے چیف مارشل لا ایڈمنسٹریٹر برسراقتدارآئے سن تے فیر 1962 دا صدارتی بنا کے ملک وچ بنیادی جمہویت دے نام تے صدارتی نظام نافذ کیتا گیا۔ ایہو 1962 دا صدارتی دستور سی جہدے اتے حبیب جالب نے مشہور نظم ایسے دستور کو صبح بے نور کو میں نہیں مانتا میں نہیں مانتا لکھی سی تے ایس جرم تے اوہناں نوں قید ہوئی سی۔
نواب آف کالاباغ ملک امیر محمد خان 1960 توں 1966تیکر گورنر مغربی پاکستان رہے۔ کہیا جاندا اے کہ جدوں اوہناں نے گورنر دے عہدے ادا حلف چکیا تے اوہدے مگروں اوہناں نوں چیف سیکرٹری تے آئی جی سنے اعلیٰ افسراں نے بریفنگ لئی مدعو کیتا تے صوبہ مغربی پاکستان یعنی اج دے پاکستان وچ لا اینڈ آرڈر دی صورتحال بارے دسیا تے اخیر وچ جدوں اوہناں نوں خطاب دی دعوت دتی گئی تے اوہناں نے اپنی بارعب مچھ نوں تائو دتا تے بولے ایہہ لا تے دوجی مچھ نوں تائو دے کے کہیا کہ ایہہ ہے آڈر۔ اوہ انتظامی اعتبار نال بہت سخت مزاج سن۔ اوہناں دے دور اقتدار وچ پورے مغربی پاکستان وچ امن و امان دی صورتحال مثالی رہی۔ اوہناں دے دور وچ ستمبر 1965 پاک بھارت جنگ ہوئی۔ اوہناںنے ایس موقع تے تاجراں نوں گورنر ہائوس بلوایا تے سختی نال آگاہ کیتا کہ جے ملک وچ غذائی اجناس کدھرے وی مہنگی ہوئیاں یا ایہدا ذخیرہ کیتا گیا تے ایسے تاجراں دا انجام عبرتناک ہووے گا تے دنیا نے ویکھیا کہ پورے ملک وچ غذائی اجناس مہنگی ہون دے بجائے سستی ہوئیاں۔
اوہناں دے دور حکومت وچ جدوں شہنشاہ ایران محمد رضا شاہ نے پاکستان دا دورہ کیتا تے گورنر ملک امیر محمد خان ولوں اسی زمانے دی مشہور فلمی اداکارہ نیلو نوں شہنشاہ ایران دے سامنے رقص کرن دا حکم دتا گیا جہدے تے نیلو نے انکار کر دتا تے فیر نیلو نوں چکوا لیتا گیا۔ نیلو نے اپنی بے عزتی تے دلبرداشتہ ہو کے خواب آور گولیاں کھا کے خودکشی دی کوشش کیتی جہدے تے ویلے تے اوہناں نوں بے ہوشی دے عالم وچ ہسپتال پہنچایا گیا تے اوہنوں مرن توں بچا لیتا گیا مگروں مشہور رائٹر ریاض شاہد نے نیلو نال ویاہ کیتا۔ نیلو نے عیسائیت نوں ترک کر کے اسلام قبول کر لیتا تے اوہناں دا نام سنتھاالیگزینڈر دے بجائے عابد ریاض رکھیا گیا۔ اوس ویلے جدوں شہنشاہ دے سامنے رقص کرن توں انکار کرن تے نیلو نوں اغوا کر کے بے عزت کیتا گیا سی تے انقلابی شاعر حبیب جالب نے ایہہ نلم کہی سی تو کہ ناواقف آداب غلامی ہے ابھی… رقص زنجیر پا کے وی کہیا جاندا اے مگروں ایہو نظم اوہناں ریاض شاہد دی فلم زرقا وچ فلمایا گیا۔ نیلو نے ریاض شاہد دی وفات مگروں دوبارہ عیسائی مذہب قبول کر لیتا۔ وفات مگروں اوہنوں گورا قبرستان جیل روڈ اتے سپردخاک کیتا گیا۔ اوہدی قبر اتے لکھیا اے ’’عابد شاہد‘‘ ایہہ اداکار شان تے اعجاز دی والدہ سن۔