نوجواناں نوں ہنرمندبنائو

ڈاکٹر صغرا صدف

رویے مثبت تے سوچ تعمیری ہو جاوے تے قوم دے نوجوان تفکرات دی بھاری پنڈ چک کے خدشات دے انھے راہواں وچ بھٹکدے نیں نہ بے عملی اوہناں دی اکھاں دے دریچیاں وچ موجود سپنیاں نوں بجھا کے ناامیدی دے انھیریاں دی راہ پدھری کر پاندی اے۔ تدبیر تے محنت ہر ناممکن دے حصول دا کوئی راہ لبھ لیندی اے۔ تدبیر دی چابی ہنر دی صورت عطا ہو جاوے تے محنت نال وسیلیاں دے ہر بند صندوق تک رسائی حاصل ہو جاندی اے۔ پاکستان وچ ایس ویلے پڑھے لکھے بندیاں وچ اکثریت اجہے لوکاں دی اے جہناں دے کول ایم اے دیاں کئی ڈگریاں نیں پر ہنر دے حوالے نال زیرو نیں۔ کسے وی ملک تے سرکار لئی اوسط درجے دی ذہانت تے مخصوص مضموناں وچ سنداں حاصل کرن لین والے سارے لوکاں نوں سرکاری نوکری دینا ممکن نہیں۔ دنیا بھر وچ ہنر سکھان والے ادارے متحرک نیں سگوں کجھ ملکاں وچ طالب علمی دے دور توں ای بچیاں دی دلچسپی نوں سامنے رکھدے ہوئے اوہناں نوں کسے نہ کسے ہنر دی تربیت دتی جاندی اے۔ ساڈے ایتھے تعلیم دے بہت منصوبے تے پالیسیاں سامنے آئیاں پر ہنر تے فنون سکھان دے حوالے نال ساڈے توں ضرور کوتاہی ہوندی رہی نہیں تے س اڈے لوک تخلیقی صلاحیتاں نال وی مالا مال نیں تے محنت توں وی کتران والے نہیں۔
ایس کوتاہی پاروں بیروزگار نوجواناں دا واحد خواب کسے دور دیس وچ نوکری رہ جاندا اے جہدے لئی اوہ بڑیاں اوکڑاں برداشت کردے نیں۔ کدی اوہناں دیاں کشتیاں سمندر وچ ڈب جاندیاں نیں تے کدی اوہ کنٹینر وچ ساہ گھٹن نال مر جاندے نیں جو اپڑدے نیں اوہناں وچوں کافی ساریاں نوں اجہیاں نوکریاں کرنیاں پیندیاں نیں جو اپنے ملک وچ اوہ کدی وی کرن نوں تیار نہ ہون۔ ایہ لوک پاکستان دی تقدیر سنوار سکدے نیں جے اسیں دنیا دی ضرورتاں نوں سمجھدے ہوئے اپنے ملک وچ موجود وسیلیاں نوں استعمال کریئے۔ پچھلے دیہاڑیاں احمد شہباز خاور دی دعوت تے ٹیوٹا (TEVTA) جان دا اتفاق ہویا اوتھے لکڑی نال بنے فرنیچر‘ مٹی دے بھانڈیاں دے حوالے نال کم ویکھ کے دنگ رہ گئی۔ پلمبر توں لے کے ہر قسم دے مکینک نوں جدید تربیت دتی جا رہی اے۔ دنیا گلوبل ویلج بن چکی اے پر اسیں اج وی دنیا نال ہم آہنگ ہون دی کوشش نہیں کر رہے۔ ساڈے گوانڈھی ملکاں بھارت تے بنگلہ دیش دی معیشت دا استحکام اوہناں دے بیرون ملک رہندے شہریاں دا مرہون منت اے جو ہر ورھے ارباں ڈالر دا زرمبادلہ اپنے ملک وچ گھلدے نیں۔ عرب ملکاں توں علاوہ امریکہ و یورپ دے سفر دوران اوتھے رہندے پاکستانیاں نال گل ہوندی اے تے اوہ بڑے دکھ نال دسدے نیں کہ ساڈی سی وی وچ رٹا لگا کے حاصل کردہ سنداں توں علاوہ کجھ نہیں ہوندا۔ ساڈے تعلیمی معیار پاروں ساڈیاں ڈگریاں وی اینی قدرومنزلت نہیں رکھدیاں۔ ایس لئی ریسٹورنٹ‘ ٹیکسی ڈرائیور تے مجبوری وچ سخت مزدوری کردے ہوئے نیشنلٹی دے چکر وچ انج الجھنے آں کہ فیر اوتھوں دے ہو کے رہ جانے آں۔ ہندوستان وچ ہر ورھے لکھاں لوکاں نوں وکھووکھ ہنر سکھ کے ایس قابل بنایا جاندا اے کہ اوہ قنونی طریقے نال اپلائی کرکے بیرون ملک جا سکن تے چنگی کمائی کر سکن۔ زیادہ تر بھارتی‘ سری لنکن یاں بنگلہ دیشی ٹیکنیکل انجینئر‘ مکینک یاں آئی ٹی ایکسپرٹ ہوندے نیں ایہو وجہ اے کہ اوہناں نوں ہر پاسے نہ صرف کھلے دل نال قبول کیتا جا رہیا اے سگوں اوہناں دی آمدنی وی ساڈے پاکستانیاں توں ودھ ہوندی اے۔ اک گل ہور کہ زیادہ تر پاکستانی غیرقنونی یاں خفیہ طور تے ملک چوں باہر جاندے نیں تے ہنڈی دے راہیں پیسہ گھلنا شروع کر دیندے نیںتے ہولی ہولی عادی ہو جاندے نیں جد ہنڈی دے راہیں گھلی گئی رقم ملکی معیشت نوں کوئی سہارا نہیں دیندی۔
ٹیوٹا دے تحت وکھووکھ شہراں وچ اجہے ادارے موجود نیں جو نوجواناں نوں میٹرک دے بعد ٹیکنیکل شعبیاں وچ مہارتاں دے رہے نیں۔ احمد شہزاد خاور ورگے بندے کسے ادارے لئی نعمت وانگوں ہوندے نیں جو صرف لگے بندھے کم تک محدود تے مطمئن نہیں رہندے سگوں ادارے نوں ممکنات دی حد تک ترقی ول لے جان نوں مقصد بناندے نیں۔ صوبے وچ نوجواناں دیاں صلاحیتاں نوں بہتر طور استعمال کرن لئی اپنے ادارے تے کیہ سٹاف نوں وی ذہنی طور تے فعال کرن تے ایس طرح کمربستہ نیں کہ اگلے کجھ ورھیاں وچ ملکی ترقی وچ اہم کردار ادا کیتا جا سکے۔
لوکاں وچ ایہ شعور جگان دی وی ڈاڈھی ضرورت اے کہ روایتی تے دکھاوے دیاں ڈگریاں حاصل کرن دی تھاں تکنیکی تعلیم حاصل کرنا زیادہ سودمند اے۔ جے نصاب وچ سارے سکینڈری سکولاں وچ کجھ ہفتیاں تے مشتمل ٹیوٹا کورس لازمی قرار دتے جان تے ملازمت دے انتظار وچ مایوس تے ضائع ہون والیاں صلاحیتاں ملک دیاں تقدیر جگا سکدیاں نیں۔٭