عمران خان چھبہ ڈوگر تے نہیں!

مظہر بلراس

نظراں چوں اک خبر گزری اے کہ اسلام آباد وچ عمران خان تے اک ہور مقدمہ بنا دتا گیا اے ایہ مقدمہ اسلام آباد وچ آئین بچائو ریلی کڈھن تے درج کیتا گیا اے۔ حیرت دی گل اے کہ اوس دن عمران خان اسلام آباد وچ موجود ای نہیں سن پر پرچہ کٹن والیاں دی مرضی اے اوہ کنہوں کدھرے وی وکھا سکدے نیں کسے نوں وی چھلاوا بنا سکدے نیں۔ پچھلے اک ورھے توں ہر آن والا دن حیرت وچ ہور وادھا کردا جا رہیا اے کیوں جے پاکستان دی سیاسی تریخ نے ایس توں پہلاں ایہ کھیڈ نہیں سی ویکھیا ایہ حیرت انگیز کھیڈ عجیب و غریب اے۔ تسیں کسے ہور تھاں ہوندے او پرچہ کسے ہور تھاں کٹیا جاندا اے ایس اک ورھے وچ چشم فلک نے ایہ وی ویکھیا کئی شریف گھرانیاں تے ادھی رات نوں دھاوا بولیا گیا کدھرے بالاں نوں ڈرایا گیا تے کدھروں بالاں نوں چکیا گیا کدھرے عورتاں دی تذلیل کیتی گئی کدھرے کسے نوں دھریکیا گیا۔ ایس ساری صورتحال وچ اوہناں گھراں تے کیہ بیتی ہووے گی تے اوہ کیہ سوچدے ہون گے ایہ اوہو بہتر جان دے نیں پر ایہدے نال عام پاکستانی لوکاں دے بچے وی ڈر گئے سہم گئے۔ لوک تے ریاست نوں ماں دے روپ وچ ویکھدے نیں پر ایس بدسلوکی نے اوہناں دے دل توڑ دتے۔ اک ورھے توں ایہ کم اک غیرمقبول حکومت کر رہی اے۔ جے کوئی غیرمقبول وی ہووے ے ظلم وی کرے تے تماشا لان والیاں تے حیرت ہوندی اے۔ ظلم دی گواہی کسے وی پنڈ‘ قصبے یاں شہر توں لئی جا سکدی اے۔ ایس اک ورھے وچ انج وی ہویا کہ کجھ لوکاں نوں چکیا گیا‘ اوہناں نوں گھمایا پھرایا گیا پر کسے نوں ایہ نہ دسیا جا سکیا کہ اوہ کہدے کول اے؟ چکے گئے بندیاں دے ٹبر بڑا پچھا کردے تے دسیا جاندا کہ فلاں مقدمے وچ اوہ فلاں ادارے دے کول اے۔ اوہنوں عدالت وچ پیش کیتا جاندا تے ایتھوں اک نویں کھیڈ دا مڈھ بجھدا۔ ایہ کھیڈ وی حیرت تے دلچسپی تو ں خالی نہیں کہ جے کسے دی ضمانت اسلام آباد دی اک عدالت توں ہوندی تے اوہنوں نویں مقدمے وچ پھڑن لئی خیبرپختونخوا دی پولیس موجود ہوندی۔ جدوں اوہدی ضمانت پشاور ہائیکورٹ دی عدالت توں ہوندی تے اک نواں مقدمہ درج کر کے گرفتاری لئی پنجاب پولیس اپڑ جاندی۔ جدوں اوہنوں لہور یاں راولپنڈی دی عدالت وچ پیش کیتا جاندا تے نویں گرفتاری لئی سندھ پولیس دے اہلکار موجود ہوندے۔ جدوں کسے دی ضمانت سکھر‘ دادو یاں حیدرآباد توں ہوندی تے اوتھوںدی عدالت دے احاطے وچ گرفتاری لئی بلوچستان دی پولیس اپڑ جاندی۔
بدقسمتی نال ایہ کھیڈ اجے وی جاری اے۔ احمقانہ فیصلے محبت دیاں فصلاں تیار نہیں کردے نفرت دے جنگل اگا دیندے نیں۔ ایہدی سجری مثال علی امین گنڈاپور نیں جو رہائی دے بعد اپنے گھر گیا تے ڈی آئی خان وچ 75 تھاواں تے اوہدا سواگت کیتا گیا۔ لوک ویہہ کلومیٹر تک اوہدے قافلے دے نال پیدل چلدے رہے۔ لوکاں نے ایس طرح ظلم تے ظالم نال نفرت دا اظہار کیتا۔ تسیں یقین کرو کہ راتاں نوں گھراں تے چھاپیاں پاروں بچے نفسیاتی مریض بن گئے۔ ایس قوم دے ذہین ترین نوجوان ظالمانہ ہتھکنڈیاں پاروں ملک چھڈن تے مجبور ہو رہے نیں۔ لوکاں نوں ایہناں ظالمانہ کاروائیاں دا سامنا صرف ایس لئی کرنا پے رہیا اے کہ اوہ عمران خان دی پیروی کر رہے نیں تے عمران خان قنون تے انصاف دیاں گلاں کر رہیا اے۔ تہاڈے س اریاں دے علم وچ اے کہ عمران خان ایچی سن کالج لہور تے آکسفورڈ یونیورسٹی برطانیہ توں پڑھیا۔ اوہ کرکٹ کھیڈدا رہیا قومی ٹیم دا کپتان بنیا۔ تہانوں ایہ وی یاد ہووے گا کہ پاکستان اوہدی کپتانی وچ ورلڈچیمپئن بنیا۔ اوہدی ماں بیما ر ہوئی تے پتہ لگا کہ اوہناں نوں کینسر اے اوہ کینسر نال لڑدے لڑدے مر گئیاں پر عمران خان دے دل و دماغ تے اجہے نقش چھڈ گئیاں کہ اوہنے کینسر ہسپتال بنان دا قصد کیتا۔ لوکاں دے منع کرن دے باوجود اوہ ایس کم وچ جت گیا۔ ہسپتال دی مہم دوران اوہنوں مسائل زدہ پاکستان ویکھن دا موقع ملیا لوکاں دے چہریاں تے لکھی ہوئی ظلم دی داستان پڑھن دا موقع ملیا۔ ایہو اوہدی سیاست دی پہلی اٹ سی نہیں تے ایتھے تے کسے دی سیاست دی پہلی اٹ سکندر مرزا تے ایوب خان نے رکھی تے کسے دی پہلی اٹ جنرل جیلانی تے ضیاء نے رکھی۔
پچھلے اک ورھے توں مافیاز تے اوہناں دے حمایتی عمران خان نوں پارٹی سنے مدھن دی کوشش کر رہے نیں۔ حیرت اے جس بندے تے ساری حیاتی کوئی مقدمہ نہیں سی بنیا ہن اوہدے تے ڈیڑھ سو دے نیڑے مقدمے نیں۔ انگریز دے کالے قنوناں دا بھرواں استعمال کیتا گیا۔ کدھرے اوہ غدار اے تے کدھرے دہشت گرد۔ اوہنوں چھبے ڈوگر توں وی بدتر بنان دی کوشش ہو رہی اے کیوں جے اینے مقدمے تے چھبے ڈوگر تے وی نہیں سن۔ خطرات دے باوجود عمران خان جدوجہد وچ مصروف اے۔ ساڈے دوست ملک سیاسی استحکام لیان دے مشورے دے رہے نیں۔ ساڈا دشمن ساڈے تے دہشت گردی دے الزام لا رہیا اے تے اجہے وچ جدوں ساڈا سابق وزیراعظم تے مقبول سیاسی رہنما عدالتاں وچ پیش ہووے گا تے ایہ ریاست لئی شرمندگی دا باعث نہیں ہووے گا کہ ملک دے اک سابق وزیراعظم نوں کدھرے ایہ دہشت گرد ثابت کرن دی کوشش ہو رہی اے تے کدھرے ایہ غدار کیوں جے ایہناں مقدمیاں دی کاروائی انٹرنیشنل میڈیا دا حصہ بنے گی تے ایس مرحلے تے ریاست نوں سوچنا ہووے گا کہ اوہ غداراں تے دہشت گرداں نوں وزیراعظم بناندی رہی اے۔ حکومتی جبر دی وجہ نال لوکاں تے ریاست وچ فاصلے پیدا ہو رہے نیں کہ بقول شاعر:
کسی کو راستہ دے دیں، کسی کو پانی نہ دیں
کہیں پہ نیل، کہیں پر فرات ہیں ہم لوگ