حالات تے بجٹ ریلیف

سعد اللہ شاہ

سویا ہوا تھا شہر تو بیدار کون تھا
سب دم بخود ہیں ایسا خطاکار کون تھا
باقی ہم ہی بچے تھے سو نظروں میں آ گئے
ہم جیسوں کا وگرنہ خریدار کون تھا
گل دردناک اے کہ ساڈے ایتھے خاص طور تے اجہے موقعے تے کہ جدوں کوئی بہانہ ہتھ لگ جاوے تے سب توں ودھ قتل سچ دا ہوندا اے۔ سچ دے نال انصاف ضروری اے بھاویں سچ آپ طاقت اے پر ایہدے لئی آئیڈل معاشرہ ضروری اے ایس توں پہلاں کہ ایہدے تے گل کیتی جاوے کہ جہڑی سراج الحق نے کیتی اے کہ ادارے حلف دی پاسداری کرن تے غیرجانبدار ہو جان اک سوال اٹھایا جا رہیا اے کہ آٹے دے نال گھن کیوں پس رہیا اے کہ ایہ سوال بن دا نہیں ساڈے اک سیاسی دانشور ملک محمد شفیق اک فکری محفل وچ ایہ گل کر رہے سن کہ ایہدے وچ تے کوئی دوجی رائے ای نہیں کہ جہڑے لوک جلائو گھیرائو وچ شریک سن اوہناں نوں قرار واقعی سزا ملنی چاہیدی اے پر پھڑن والے اوہناں دے اہل و عیال تک نوں وی پھڑ رہے نیں جہدے نال افراتفری تے خوف دی فضا جنم لے رہی اے۔ ایہدے وچ پی ٹی آئی توں علاوہ وی کجھ لوک نیں پر اوتھے موجود عبدالغفور ایڈووکیٹ نے آکھیا کہ ایہ تے پولیس دا اک طے شدہ آزمودہ طریقہ کار اے کہ جدوں تک اوہدے رشتے داراں نوں نہ پھڑیا جاوے ملزم حاضر نہیں ہوندا۔ ایتھے بہرحال تھوڑا جیہا فرق کرنا پوے گا کہ جلسے تے جلوساں وچ جان والے نوجوان بہرحال عادی مجرم نہیں ہوندے تے نہ اوہناں دے گھر والے انج دے ہوندے نیں۔ ہاں ایہدے تے سب توں چنگی پوسٹ ساڈی اردو تحریک دی فاطمہ قمر نے لائی کہ ایہ زیادتی ہووے گی کہ جو اثرورسوخ رکھدے نیں تے متذکرہ بلوے وچ شریک سن یاں سہولت کار سن اوہ معافی تلافی دے بعد پاک پوتر ہو کے اک پاسے ہوندے جا رہے نیں جو وی ریاست دی بقاء دے پچھے ہووے اوہنوں معافی نہیں ملنی چاہیدی ایہدے تے یقینا انکوائری ہونی چاہیدی اے۔ بظاہر ایہ نظر وی آ رہیا اے حالاں کہ خدیجہ شاہ نوں وی پھڑ لیا گیا اے کہ اوہ اپنا اثرورسوخ استعمال کرن دے بعد وی گرفتاری توں نہیں بچ سکی جو وی ہے ایس معاملے توں سیاسی فائدہ ہرگز نہ چکیا جاوے۔ ہن وی ویکھو کس طرح لوکاں وچ فوج لئی جذبات آ گئے نیں تے سب موجودہ سانحہ تے سخت ردعمل دے رہے نیں انج ای اک شعر ذہن وچ آ گیا:
عمر گزری ہے دربدر اپنی
ہم ہلے تھے ذرا ٹھکانے سے
خوش کن گل تے ہے کہ عمران خان مذاکرات دا کہہ رہے نیں حکومت اپنے طعنیاں توں علاوہ کیہ کرے گی۔ تسیں رانا ثناء اللہ دا بیان ویکھ لوو کہ عمران نال مذاکرات کریئے تے کیہ شہیداں دے لواحقین سانوں چھڈ دین گے ایس بیان تے تبصرہ کردے ہوئے ڈر لگدا اے جو وی اے حکومت نوں ہن موقع یاں ویلا ملیا اے کہ اپنے آپ نوں انتخاب لئی قابل قبول بنا سکے اگے دا حال تے اللہ ای جان دا اے یکایک سب کجھ کیویں بدل جاندا اے۔ انسان سمجھن توں قاصر اے اک غلط چال بساط لھویٹ دیندی اے کہ پیادے نال جیویں شاہ مر جاوے حکومت ہل چل کردی محسوس ہو رہی اے پر اوہو جو منیرنیازی نے کہیا سی:
منیر اس ملک پہ آسیب کا سایہ ہے یا کیا ہے
کہ حرکت تیز تر ہے اور سفر آہستہ آہستہ
گل ہو رہی سی حکومت دی کہ اوہ لوکاں نوں لوریاں سنا رہی اے کدی روس تو ںآن والے تیل دی گل ہو رہی اے لوک وی منتظر نیں اللہ کرے اوہناں دیاں گلاں سچیاں ہون نہیں تے ساڈے لئی تے سمندر توں وی تیل نکل رہیا سی تے عین وقت تے تجربہ نکام ہو گیا اک واری شہبازشریف نے وی اک پرات تے چمچہ وجا کے دسیا سی کہ چنیوٹ توں دھات دا خزانہ نکل آیا اے۔ ہن ایہ وی کہیا جا رہیا اے کہ بجٹ وچ لوکاں نوں ریلیف دتا جاوے گا۔ ایہ خبر اخبار دی شہ سرخی وی اے پر اسیں ایس لفظ ریلیف توں چنگی طرح واقف آں سگوں ریلیف گزیدہ آں۔ ایہ حکومت پہلے وی تے سانوں ریلیف دے چکی اے کہ پٹرول ڈیڑھ سو سی تے پونے تن سو ہو گیا۔ زیادہ زور اوہناں دا لوکاں نوں عمران خان توں دور کرنا سگوں عمران نوں راہ توں ہٹانا اے کہ عمران نے انج وی شاہ محمود قریشی نوں اپنا جانشین مقرر کر دتا اے۔ حکومت اپنے گن وکھائے اپنی کارکردگی تے متاثر کرے تے گل؟ ایس ویلے مہنگائی سب توں وڈا ایشو اے آپ شہبازشریف ایہدے تے کئی واری شرمندہ ہو چکے نیں پر اوہناں دی شرمندگی یاں دلجوئی کسے کم دی نہیں۔ ایتھے تہاڈے اتھرو وی تہاڈے نہیں سمجھے جان گے لوک بھرے بیٹھے نیں خاص طور تے سرکاری تے دوجے ملازماں دیاں تنخواہواں سچ مچ ادھیاں رہ گئیاں نیں کہ بنیادی اکائی روٹی تے نان اک ورھے وچ دگنی قیمت تے چلے گئے نیں کہ پٹرول دے حساب نال ای سب کجھ چلدا اے۔ سرکاری ملازماں لئی سب توں چنگی گل بلاول نے کیتی اے اسیں سچ مچ خوش ہو گئے کہ بلاول نے تنخواہ وچ پنجاہ فیصد وادھے دا مطالبہ کیتا اے ایس طرح اسیں زرداری تے اودوں توں خوش آں جدوں اوہناں نے سرکاری ملازماں دیاں تنخواہواں وچ وادھا کیتا سی تے ن لیگ سکتے دی حالت وچ چلی گئی سی پیپلزپارٹی ہمیشہ ملازماں دے حق وچ رہی اے جد کہ ن لیگ اوہناںنوں ذاتی ملازم سمجھدی اے۔ انج ایہ کیسی مضحکہ خیز گل اے کہ پچھلی واری ملازماں دیاں تنخواہواں تے پندراں فیصد ودھائیاں گئیاں سن پر پنشنراں دی پنشن صرف پنج فیصد ودھائی گئی سی پنشن والیاں لئی آخر ایہ ظلم کیوں کہ اوہ تے کمان دے قابل وی نہیں رہے۔ اک شعر دے نال اجازت:
زمیں پہ لگتے نہیں تھے کسی کے پائوں بھی
کھلاراز کہ ان کے تو پائوں تھے ہی نہیں