سرکار تعمیراتی شعبے نوں ہر ممکن سہولت دیوے گی: وزیراعظم

وزیراعظم عمران خان نے اک وار فیر ایس عزم دا اعادہ کیتا اے سرکارتعمیراتی شعبے نوں ہر ممکن سہولت دیوے گی جد کہ تعمیراتی سرگرمیاں دے فروغ نال روزگار دے مواقع پیدا ہون گے۔ وزیراعظم عمران خان دی زیر صدارت نیشنل کوآرڈی نیشن کمیٹی برائے ہاؤسنگ، کنسٹرکشن اینڈ ڈویلپمنٹ دا ہفتہ وار اجلاس ہویا جہدے وچ ایسوسی ایشن آف بلڈرز اینڈ ڈیویلپرز آف پاکستان (آباد) دے 13نمائندگان نے ویڈیو لنک دے راہیں رلت کیتی۔اجلاس وچ تعمیراتی شعبے وچ سرکار ولوں دتی جان والی مراعات تے ایہدے نتیجے وچ شروع ہون والی سرگرمیاں دی پیشرفت دا تفصیلی جائزہ لیا گیا۔ نیشنل کوآرڈی نیشن کمیٹی برائے ہاؤسنگ، کنسٹرکشن اینڈ ڈویلپمنٹ دے اجلاس دی ہور تفصیلات دے مطابق وزیراعظم عمران خان آکھیا بلڈرز لئی ون ونڈو سہولت نوں یقینی بنان لئی کڑی نگرانی کیتی جائے گی۔ اجلاس دے اعلامیے دے مطابق اجلاس وچ بلڈرز نے وزیراعظم عمران خان نوں 1370ارب روپے دے تعمیراتی منصوبے شروع کرن دی یقین دہانی کرائی اے تے آکھیا تعمیراتی منصوبیاں تے کم دا آغاز 4توں 5مہینے وچ ہو جائے گا۔ اجلاس وچ مجموعی طور تے 13وڈے تعمیراتی گروپاں نے اگلے 6مہینے وچ اک لکھ مکاناں دی تعمیر شروع کرن دی یقین دہانی کرائی اے۔ایسوسی ایشن آف بلڈرز اینڈ ڈویلپرز (آباد) ولوں تعمیراتی شعبے وچ ہور سرمایہ کاری دی یقین دہانی کرائی گئی اے۔ اعلامیے دے مطابق نویں رہائشی منصوبیاں نوں گیس، بجلی تے دوجی بنیادی ضرورتاں دی ویلے سر فراہمی نوں یقینی بنایا جائے گا۔